ഷാർലറ്റൗൺ: പ്രിൻസ് എഡ്വേർഡ് ഐലൻഡിൽ ഗ്രീൻ ഹൗസ് ഗ്യാസ് പുറന്തള്ളൽ തുടർച്ചയായ മൂന്നാം വർഷവും കുറഞ്ഞതായി ഔദ്യോഗിക റിപ്പോർട്ട്. 2023-ലെ കണക്കുകൾ പ്രകാരം പ്രവിശ്യയിലെ ആകെ പുറന്തള്ളൽ 1.59 മെഗാ ടണ്ണാണ്. ഇത് 2022-നെ അപേക്ഷിച്ച് ഏകദേശം ഒരു ശതമാനത്തിന്റെ കുറവ് രേഖപ്പെടുത്തിയതായി പ്രവിശ്യാ ഭരണകൂടം പുറത്തിറക്കിയ വാർത്താക്കുറിപ്പിൽ വ്യക്തമാക്കി. 2040-ഓടെ നെറ്റ്-സീറോ ലക്ഷ്യം കൈവരിക്കുന്നതിനുള്ള നിർണ്ണായക ചുവടുവെപ്പായാണ് ഈ മുന്നേറ്റത്തെ വിലയിരുത്തുന്നത്.
പ്രവിശ്യയിലെ ജനസംഖ്യയിൽ 17 ശതമാനം വർധനവുണ്ടായ കാലയളവിലാണ് ഈ നേട്ടം കൈവരിച്ചതെന്നത് ശ്രദ്ധേയമാണ്. വീടുകൾക്കുള്ള ഇൻസുലേഷൻ റിബേറ്റുകൾ, ഹീറ്റ് പമ്പ് പ്രോഗ്രാം തുടങ്ങിയ സർക്കാർ പദ്ധതികൾ പുറന്തള്ളൽ കുറയ്ക്കുന്നതിൽ വലിയ പങ്ക് വഹിച്ചിട്ടുണ്ട്. പുതിയ കെട്ടിടങ്ങളിൽ ജിയോതെർമൽ, ഹീറ്റ് പമ്പ് സംവിധാനങ്ങൾ ഏർപ്പെടുത്തുന്നതും നിലവിലുള്ളവ നവീകരിക്കുന്നതും ഫലം കാണുന്നുണ്ടെന്ന് ഊർജ്ജ-കാലാവസ്ഥാ വ്യതിയാന വകുപ്പ് മന്ത്രി ഗില്ലസ് ആഴ്സണോൾട്ട് അറിയിച്ചു.
ഗ്രീൻ ഹൗസ് ഗ്യാസ് പുറന്തള്ളലിന്റെ പകുതിയോളവും ഗതാഗത മേഖലയിൽ നിന്നാണെന്നും ഇത് പ്രവിശ്യ നേരിടുന്ന പ്രധാന വെല്ലുവിളിയാണെന്നും മന്ത്രി ചൂണ്ടിക്കാട്ടി. നാല് വർഷം മുൻപുള്ളതിനേക്കാൾ വലിയ വാഹനത്തിരക്കാണ് ഇപ്പോൾ അനുഭവപ്പെടുന്നത്. അടുത്ത അഞ്ച് വർഷത്തേക്കുള്ള പദ്ധതികൾ ഉൾപ്പെടുത്തി ഈ ശീതകാലത്ത് പുതിയ നെറ്റ്-സീറോ ആക്ഷൻ പ്ലാൻ പുറത്തിറക്കും. ഇലക്ട്രിക് വാഹനങ്ങൾക്കുള്ള റിബേറ്റുകൾ, ചാർജിംഗ് ഇൻഫ്രാസ്ട്രക്ചർ എന്നിവ ശക്തിപ്പെടുത്തുന്നതിലൂടെ ഗതാഗത മേഖലയിലെ മലിനീകരണം കുറയ്ക്കാനാണ് ലക്ഷ്യമിടുന്നത്.
നെറ്റ്-സീറോ ലക്ഷ്യം കൈവരിക്കുന്നതിനൊപ്പം പ്രവിശ്യയിലെ വൈദ്യുതി ഗ്രിഡ് സുസ്ഥിരമായി നിലനിർത്തുന്നതും വലിയ വെല്ലുവിളിയാണെന്ന് ആഴ്സണോൾട്ട് വ്യക്തമാക്കി. അടിയന്തര സാഹചര്യങ്ങളിൽ ബാക്കപ്പ് ജനറേഷൻ സംവിധാനങ്ങൾ ആവശ്യമാണെന്നും അദ്ദേഹം പറഞ്ഞു. 2024-2025 കാലയളവിൽ കാലാവസ്ഥാ സംരക്ഷണ പ്രവർത്തനങ്ങൾക്കായി വിവിധ വകുപ്പുകളിലായി 266.6 ദശലക്ഷം ഡോളറാണ് സർക്കാർ ചിലവഴിച്ചത്. നെറ്റ്-സീറോ കാർബൺ നിയമപ്രകാരം 2030-ഓടെ പുറന്തള്ളൽ 1.2 മെഗാ ടണ്ണിൽ താഴെ എത്തിക്കുകയാണ് പ്രവിശ്യയുടെ ലക്ഷ്യം.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
PEI’s greenhouse gas emissions decrease; third consecutive year of gains in environmentally friendly measures
