പത്തനംതിട്ട: പിണങ്ങിപ്പോയ കാമുകിയുടെ മനസ്സ് മാറ്റാൻ സിനിമയെ വെല്ലുന്ന സാഹസിക പദ്ധതിയുമായി ഇറങ്ങിയ യുവാവിനും സുഹൃത്തിനും ഒടുവിൽ പാളി. സ്കൂട്ടറിൽ സഞ്ചരിക്കുകയായിരുന്ന യുവതിയെ കാറിടിച്ച് വീഴ്ത്തിയ ശേഷം രക്ഷകനായി അവതരിച്ച് വീണ്ടും അടുപ്പത്തിലാകാൻ ശ്രമിച്ച കോന്നി സ്വദേശി രഞ്ജിത്ത് രാജനും സുഹൃത്ത് അജാസുമാണ് വധശ്രമത്തിന് അറസ്റ്റിലായത്. രഞ്ജിത്തും യുവതിയും നേരത്തെ പ്രണയത്തിലായിരുന്നുവെങ്കിലും ഇടയ്ക്ക് വെച്ച് ഇരുവരും തമ്മിൽ പിണങ്ങിയിരുന്നു. വീണ്ടും രമ്യതയിലാകാൻ രഞ്ജിത്ത് കണ്ടെത്തിയ വിചിത്രമായ വഴിയായിരുന്നു ഈ കൃത്രിമ അപകടം.
ഡിസംബർ 23-ന് വൈകുന്നേരം കോച്ചിങ് ക്ലാസ് കഴിഞ്ഞ് സ്കൂട്ടറിൽ മടങ്ങുകയായിരുന്ന യുവതിയെ രഞ്ജിത്തിന്റെ നിർദ്ദേശപ്രകാരം അജാസ് കാറിടിച്ച് വീഴ്ത്തുകയായിരുന്നു. അപകടത്തിന് ശേഷം അജാസ് കാറുമായി കടന്നുകളഞ്ഞു. തൊട്ടുപിന്നാലെ മറ്റൊരു കാറിൽ മുൻകൂട്ടി നിശ്ചയിച്ചതുപോലെ രഞ്ജിത്ത് അവിടെ എത്തുകയും നാട്ടുകാരോട് യുവതി തന്റെ ഭാര്യയാണെന്ന് കള്ളം പറഞ്ഞ് വിശ്വസിപ്പിച്ച് ആശുപത്രിയിലേക്ക് കൊണ്ടുപോവുകയും ചെയ്തു. അപകടത്തിൽ യുവതിയുടെ വലതുകൈക്കുഴ തെറ്റുകയും വിരലിന് ഒടിവ് സംഭവിക്കുകയും ചെയ്തിരുന്നു.
എന്നാൽ പോലീസിന്റെ കൃത്യമായ ഇടപെടലാണ് പ്രതികളുടെ നാടകം പൊളിച്ചത്. അപകടം നടന്ന നിമിഷം തന്നെ രഞ്ജിത്ത് സ്ഥലത്തെത്തിയതും യുവതി ഭാര്യയാണെന്ന് നാട്ടുകാരോട് തെറ്റിദ്ധരിപ്പിച്ചതും പോലീസിൽ സംശയമുണ്ടാക്കി. തുടർന്ന് സിസിടിവി ദൃശ്യങ്ങളുടെ സഹായത്തോടെ ഇടിച്ച വാഹനം കണ്ടെത്തുകയും അജാസിന്റെ ഫോൺ രേഖകൾ പരിശോധിക്കുകയും ചെയ്തതോടെയാണ് ഗൂഢാലോചന പുറത്തായത്. നിലവിൽ പ്രതികൾ രണ്ടുപേരും കൊട്ടാരക്കര സബ് ജയിലിലാണ്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Accident in cinema style to impress young woman; Young man and friend who came to her rescue arrested for attempted murder
