ഒട്ടാവ: 2026-ൽ കാനഡയിൽ സമഗ്രമായ പുതിയ നിയമങ്ങളും ചട്ടങ്ങളും പ്രാബല്യത്തിൽ വരുന്നു. ഇടത്തരക്കാർക്ക് ഗുണകരമാകുന്ന നികുതിയിളവ്, വിദേശത്ത് ജനിച്ച കാനഡക്കാർക്ക് പൗരത്വം നൽകുന്നതിനുള്ള ഭേദഗതികൾ, ബാങ്ക് ഫീസുകളിലെ നിയന്ത്രണം എന്നിവയുൾപ്പെടെ നിരവധി സുപ്രധാന തീരുമാനങ്ങളാണ് ഫെഡറൽ സർക്കാർ നടപ്പിലാക്കുന്നത്. രാജ്യത്തെ സാമ്പത്തിക സുരക്ഷിതത്വം ഉറപ്പാക്കുന്നതിനും കുടിയേറ്റ നിരക്ക് നിയന്ത്രിക്കുന്നതിനുമുള്ള നടപടികളുടെ ഭാഗമായാണ് ഈ പരിഷ്കാരങ്ങൾ.
പൗരത്വ നിയമത്തിലെ മാറ്റങ്ങൾ ‘ലോസ്റ്റ് കനേഡിയൻസ്’ (Lost Canadians) എന്ന് വിളിക്കപ്പെടുന്ന ഒന്നര ലക്ഷത്തോളം പേർക്ക് പ്രയോജനകരമാകും. വിദേശത്ത് ജനിച്ച കനേഡിയൻ മാതാപിതാക്കൾക്ക് അവരുടെ മക്കൾക്ക് പൗരത്വം കൈമാറാൻ ബിൽ സി-3 അനുമതി നൽകുന്നു. അതേസമയം, രാജ്യത്തേക്കുള്ള കുടിയേറ്റക്കാരുടെ എണ്ണത്തിൽ സർക്കാർ വലിയ കുറവ് പ്രഖ്യാപിച്ചിട്ടുണ്ട്. 2026-ൽ സ്ഥിരതാമസക്കാരുടെ (Permanent Residents) എണ്ണം 3,80,000 ആയി നിജപ്പെടുത്തി. വിദേശ വിദ്യാർത്ഥികൾക്ക് നൽകുന്ന വിസകളുടെ എണ്ണത്തിലും വൻ നിയന്ത്രണമുണ്ടാകും; ഇത് 1,55,000 ആയി കുറയ്ക്കാനാണ് ലക്ഷ്യമിടുന്നത്.
ഇടത്തരക്കാർക്കായി സർക്കാർ പ്രഖ്യാപിച്ച പുതിയ നികുതിയിളവ് 2026-ൽ പൂർണ്ണമായി പ്രാബല്യത്തിൽ വരും. 57,375 ഡോളറിന് താഴെ വാർഷിക വരുമാനമുള്ളവരുടെ നികുതി 14 ശതമാനമായി കുറച്ചു. ഇത് ഏകദേശം 2.2 കോടി ജനങ്ങൾക്ക് ഗുണകരമാകും. ആദ്യമായി വീട് വാങ്ങുന്നവർക്ക് ജി.എസ്.ടി (GST) ഇനത്തിൽ 50,000 ഡോളർ വരെ ഇളവ് നൽകുന്ന പുതിയ നിയമവും പരിഗണനയിലുണ്ട്. കൂടാതെ, കുറഞ്ഞ വരുമാനക്കാർക്കായി ഓട്ടോമാറ്റിക് ടാക്സ് ഫയലിംഗ് സംവിധാനം ഏർപ്പെടുത്തുന്നതിലൂടെ അർഹമായ ആനുകൂല്യങ്ങൾ തടസ്സമില്ലാതെ ലഭ്യമാക്കാനും സർക്കാർ ലക്ഷ്യമിടുന്നു.
ബാങ്ക് ചാർജുകളിലെ നിയന്ത്രണമാണ് സാധാരണക്കാർക്ക് ആശ്വാസകരമാകുന്ന മറ്റൊരു മാറ്റം. 2026 മാർച്ച് മുതൽ അക്കൗണ്ടിൽ പണമില്ലാത്ത പക്ഷം ഈടാക്കുന്ന എൻ.എസ്.എഫ് (NSF) ഫീസുകൾ 10 ഡോളറായി നിജപ്പെടുത്തി. നിലവിൽ ഇത് 48 ഡോളർ വരെയാണ്. വാണിജ്യ രംഗത്ത് കാനഡയിൽ നിന്നുള്ള ഉൽപ്പന്നങ്ങൾക്ക് മുൻഗണന നൽകുന്ന ‘ബൈ കനേഡിയൻ’ (Buy Canadian) നയവും ഈ വർഷം മുതൽ പൂർണ്ണമായി നടപ്പിലാക്കും. പ്രാദേശിക വ്യവസായങ്ങളെയും തൊഴിൽ മേഖലയെയും സംരക്ഷിക്കുന്നതിനാണ് ഈ നീക്കം.
ഫെഡറൽ ജീവനക്കാർക്കായി പുതിയ വിരമിക്കൽ ആനുകൂല്യങ്ങളും സർക്കാർ പ്രഖ്യാപിച്ചിട്ടുണ്ട്. 50 വയസ്സ് പൂർത്തിയായ പത്ത് വർഷത്തെ സേവനപരിചയമുള്ള ഉദ്യോഗസ്ഥർക്ക് പെൻഷൻ ആനുകൂല്യങ്ങളോടെ നേരത്തെ വിരമിക്കാൻ സാധിക്കുന്ന രീതിയിൽ നിയമങ്ങൾ പരിഷ്കരിച്ചു. ഒപ്പം, 2024-ൽ ആരംഭിച്ച ദേശീയ സ്കൂൾ ഭക്ഷണ പദ്ധതിക്ക് സ്ഥിരമായ ഫണ്ടിംഗ് നൽകാനും സർക്കാർ തീരുമാനിച്ചു. ഈ പദ്ധതി വഴി രാജ്യത്തെ നാല് ലക്ഷത്തോളം കുട്ടികൾക്ക് പോഷകാഹാരം ലഭ്യമാകുമെന്ന് ഫെഡറൽ ബജറ്റ് ഉറപ്പുനൽകുന്നു.
here-are-some-of-the-new-laws-and-rules-coming-into-effect-in-canada-in-2026
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
