ഹാളിഫാക്സ്: കാനഡയിലെ നോവ സ്കോഷ്യയിൽ പ്രീമിയർ ടിം ഹൂസ്റ്റന്റെ നേതൃത്വത്തിലുള്ള സർക്കാർ തങ്ങളുടെ ഭരണ മുൻഗണനകളിൽ വലിയ മാറ്റം വരുത്തുന്നത് വൻ ചർച്ചകൾക്ക് വഴിവെക്കുന്നു. 2024-ലെ തിരഞ്ഞെടുപ്പ് പ്രചാരണ വേളയിൽ ആരോഗ്യമേഖലയിലെ പരിഷ്കരണവും നികുതി കുറയ്ക്കലും പ്രധാന വാഗ്ദാനങ്ങളായി അവതരിപ്പിച്ച ഹൂസ്റ്റൺ, അധികാരം ലഭിച്ചതോടെ ഊർജ്ജ മേഖലയിലേക്കും പ്രകൃതിവിഭവ ഖനനത്തിലേക്കും പെട്ടെന്ന് ശ്രദ്ധ മാറ്റിയതാണ് വിമർശനങ്ങൾക്ക് കാരണമാകുന്നത്.
രണ്ടാം വട്ടവും വൻ ഭൂരിപക്ഷത്തോടെ അധികാരത്തിലേറിയ ഹൂസ്റ്റൺ സർക്കാർ, വർഷങ്ങളായി നിലനിന്നിരുന്ന ‘ഫ്രാക്കിംഗ്’ നിരോധനവും യുറേനിയം ഖനനത്തിനുള്ള വിലക്കും നീക്കം ചെയ്തു. കൂടാതെ കടലിലെ എണ്ണ, പ്രകൃതിവാതക പര്യവേഷണത്തിനായി ആഗോള ടെൻഡറുകൾ ക്ഷണിക്കുകയും ഊർജ്ജ പദ്ധതികൾക്ക് വേഗത്തിൽ അനുമതി നൽകാനായി നിയമങ്ങളിൽ ഇളവ് വരുത്തുകയും ചെയ്തു. ഈ നീക്കങ്ങളുടെ ഗൗരവം വ്യക്തമാക്കിക്കൊണ്ട് കഴിഞ്ഞ ഒക്ടോബറിൽ ഹൂസ്റ്റൺ തന്നെ പ്രവിശ്യയുടെ ഊർജ്ജ മന്ത്രിയായി ചുമതലയേറ്റു.
തിരഞ്ഞെടുപ്പ് സമയത്ത് വോട്ടർമാരോട് വെളിപ്പെടുത്താത്ത കാര്യങ്ങളാണ് ഇപ്പോൾ നടപ്പിലാക്കുന്നതെന്ന് രാഷ്ട്രീയ നിരീക്ഷകർ ചൂണ്ടിക്കാട്ടുന്നു. യുറേനിയം ഖനനത്തെക്കുറിച്ചോ ഫ്രാക്കിംഗിനെക്കുറിച്ചോ പ്രചാരണ വേളയിൽ കൃത്യമായ ചർച്ചകൾ നടന്നിരുന്നെങ്കിൽ തിരഞ്ഞെടുപ്പ് ഫലം മറ്റൊന്നാകുമായിരുന്നുവെന്ന് കേപ് ബ്രട്ടൺ യൂണിവേഴ്സിറ്റിയിലെ പ്രൊഫസർ ടോം ഉർബാനിയാക് അഭിപ്രായപ്പെട്ടു. വിവാദവിഷയങ്ങൾ ബോധപൂർവം മറച്ചുവെച്ച് വോട്ട് തേടിയോ എന്ന ചോദ്യമാണ് ഇപ്പോൾ ഉയരുന്നത്.
എന്നാൽ, അമേരിക്കൻ പ്രസിഡന്റ് ഡൊണാൾഡ് ട്രംപ് കാനഡയ്ക്കെതിരെ പ്രഖ്യാപിച്ച വ്യാപാര യുദ്ധമാണ് ഈ നയമാറ്റത്തിന് പിന്നിലെന്ന് പ്രീമിയറുടെ ഓഫീസ് വിശദീകരിക്കുന്നു. കാനഡ ഊർജ്ജ മേഖലയിൽ സ്വയംപര്യാപ്തത കൈവരിക്കേണ്ടത് അനിവാര്യമാണെന്നും സാമ്പത്തിക പ്രതിസന്ധി മറികടക്കാൻ ഇത്തരം നടപടികൾ ആവശ്യമാണെന്നുമാണ് സർക്കാരിന്റെ വാദം. ആധുനിക സാങ്കേതികവിദ്യ ഉപയോഗിക്കുന്നതിനാൽ പരിസ്ഥിതിക്ക് ഭീഷണിയുണ്ടാകില്ലെന്നും സർക്കാർ അവകാശപ്പെടുന്നു.
അതേസമയം, യുറേനിയം ഖനനം പൊതുജനാരോഗ്യത്തിന് വലിയ ഭീഷണിയാണെന്ന് പരിസ്ഥിതി പ്രവർത്തകർ മുന്നറിയിപ്പ് നൽകുന്നു. വേണ്ടത്ര ചർച്ചകൾ നടത്താതെയും ഗോത്രവർഗ്ഗ സമൂഹങ്ങളുമായി ആലോചിക്കാതെയുമാണ് സർക്കാർ തീരുമാനങ്ങൾ എടുക്കുന്നതെന്ന് മിക്മാക് ഗോത്രത്തലവന്മാരും പരാതിപ്പെട്ടു. പ്രകൃതിവാതക പര്യവേഷണം കാർബൺ ബഹിർഗമനം കുറയ്ക്കുമെന്ന സർക്കാരിന്റെ അവകാശവാദത്തെയും സാങ്കേതിക വിദഗ്ധർ സംശയത്തോടെയാണ് കാണുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
N.S. premier ran on taxes and health care, but pivoted in 2025 to focus on energy
