വിൻഡ്സർ: വിൻഡ്സർ നഗരത്തിൽ 2026 സാമ്പത്തിക വർഷത്തിൽ നികുതി വർദ്ധനവ് പൂർണ്ണമായും ഒഴിവാക്കിക്കൊണ്ടുള്ള ബജറ്റ് മേയർ ഡ്രൂ ഡിൽകെൻസ് അവതരിപ്പിച്ചു. യുഎസുമായുള്ള വ്യാപാര അനിശ്ചിതത്വങ്ങൾ നഗരത്തെ ബാധിച്ച പശ്ചാത്തലത്തിലാണ് നികുതി വർദ്ധിപ്പിക്കേണ്ടതില്ലെന്ന തീരുമാനം കൈക്കൊണ്ടതെന്ന് തിങ്കളാഴ്ച രാവിലെ പുറത്തിറക്കിയ ബജറ്റ് രേഖയിൽ മേയർ വ്യക്തമാക്കി. ജനങ്ങൾ നേരിടുന്ന ജീവിതച്ചെലവ് വർദ്ധനവിന് പരിഹാരമായാണ് ഈ നടപടിയെന്ന് അദ്ദേഹം അറിയിച്ചു. ബജറ്റിൽ ഭേദഗതികൾ നിർദ്ദേശിക്കുന്നതിനായി സിറ്റി കൗൺസിലിന് 30 ദിവസത്തെ സമയം അനുവദിച്ചിട്ടുണ്ട്.
നികുതി വർദ്ധനവ് ഒഴിവാക്കുമ്പോഴും റോഡുകൾ, ഓടകൾ, മറ്റ് അടിസ്ഥാന സൗകര്യങ്ങൾ എന്നിവയുടെ വികസനത്തിനായി 317.3 ദശലക്ഷം ഡോളർ ക്യാപിറ്റൽ ബജറ്റായി വകയിരുത്തിയിട്ടുണ്ട്. അതേസമയം, നികുതിയില്ലാത്ത ബജറ്റിലെ കുറവ് നികത്താൻ വിവിധ സേവന നിരക്കുകൾ വർദ്ധിപ്പിക്കാനാണ് ഭരണകൂടത്തിന്റെ നീക്കം. 2026 ഏപ്രിൽ 1 മുതൽ ട്രാൻസിറ്റ് നിരക്ക് 3.75 ഡോളറിൽ നിന്ന് 4 ഡോളറായി ഉയർത്താൻ നിർദ്ദേശമുണ്ട്. പാർക്കിംഗ് മീറ്റർ സമയം രാത്രി 9 മണി വരെ നീട്ടുന്നതിലൂടെ കൂടുതൽ വരുമാനം കണ്ടെത്താനും ലക്ഷ്യമിടുന്നു.
നികുതി വർദ്ധനവ് ഒഴിവാക്കിയെങ്കിലും സേവന നിരക്കുകൾ വർദ്ധിപ്പിക്കുന്നത് സാധാരണക്കാരെ ബാധിക്കുമെന്ന് വാർഡ് 1 കൗൺസിലർ ഫ്രെഡ് ഫ്രാൻസിസ് ആശങ്ക പ്രകടിപ്പിച്ചു. ബജറ്റിലെ തൊഴിൽ സംബന്ധമായ ക്രമീകരണങ്ങൾ സേവനങ്ങളെയും ജീവനക്കാരുടെ ജീവിതത്തെയും എപ്രകാരം ബാധിക്കുമെന്ന് പരിശോധിക്കേണ്ടതുണ്ടെന്നും അദ്ദേഹം വ്യക്തമാക്കി. ഇതിനാൽ ബജറ്റ് 0 ശതമാനം നികുതി നിരക്കിൽ തന്നെ നിലനിൽക്കുമോ എന്നതിൽ അദ്ദേഹം സംശയം പ്രകടിപ്പിച്ചു. ബജറ്റിലെ തൊഴിൽ പ്രശ്നങ്ങൾ ക്ലോസ്ഡ് ഡോർ മീറ്റിംഗുകളിൽ ചർച്ച ചെയ്യും.
പ്രധാന പദ്ധതികളിൽ വിൻസർ പോലീസ് സർവീസിന് മുൻവർഷത്തേക്കാൾ 5.6 ശതമാനം വർദ്ധനവോടെ 6.2 ദശലക്ഷം ഡോളർ അധികമായി അനുവദിച്ചു. സാൻഡ്പോയിന്റ് ബീച്ചിൽ പുതിയ സ്പ്ലാഷ് പാഡ് നിർമ്മിക്കുന്നതിനായി 1.5 ദശലക്ഷം ഡോളർ മാറ്റിവെച്ചിട്ടുണ്ട്. 2024-ലെ മാസ്റ്റർ പ്ലാനിന്റെ ഭാഗമായി ബീച്ച് വികസനം പൂർത്തിയാക്കുന്നതിലൂടെ കുട്ടികൾക്കും കുടുംബങ്ങൾക്കും കൂടുതൽ സൗകര്യങ്ങൾ ലഭ്യമാകുമെന്ന് വാർഡ് 7 കൗൺസിലർ ആഞ്ചലോ മാരിഗ്നാനി വിലയിരുത്തി.
ബജറ്റുമായി ബന്ധപ്പെട്ട പൊതുജനങ്ങളുടെ അഭിപ്രായങ്ങൾ കേൾക്കുന്നതിനായി 2026 ജനുവരി 12-ന് രാവിലെ 10 മണിക്ക് സിറ്റി മീറ്റിംഗ് നിശ്ചയിച്ചിട്ടുണ്ട്. നഗരസഭയുടെ ഔദ്യോഗിക വെബ്സൈറ്റിൽ 2026-ലെ നിർദ്ദിഷ്ട ബജറ്റ് രേഖകൾ ലഭ്യമാണ്. വിൻസറിലെ നിലവിലെ വളർച്ചയ്ക്ക് അനുയോജ്യമായ രീതിയിലാണ് ബജറ്റ് രൂപകൽപ്പന ചെയ്തിരിക്കുന്നതെന്ന് മേയർ ഡ്രൂ ഡിൽകെൻസ് വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
0% tax increase: Budget for 2026 announced in Windsor; Development a priority
