കാനഡയിൽ വീണ്ടും നിയമക്കുരുക്ക്: ഒന്റാരിയോയിൽ ഇമിഗ്രേഷൻ സ്ട്രീമുകൾ വെട്ടിക്കുറച്ചു; മലയാളികളടക്കമുള്ള ഇന്ത്യൻ ഉദ്യോഗസ്ഥർ പ്രതിസന്ധിയിൽ

ടൊറന്റോ: ഒന്റാരിയോയിൽ കുടിയേറ്റ നിയമങ്ങളിൽ വരുത്തിയ അപ്രതീക്ഷിത മാറ്റങ്ങൾ ആയിരക്കണക്കിന് വിദേശ ഉദ്യോഗസ്ഥരെയും വിദ്യാർത്ഥികളെയും പ്രതിസന്ധിയിലാക്കുന്നു. സ്ഥിരതാമസത്തിനുള്ള (Permanent Residency) നടപടിക്രമങ്ങൾ ലഘൂകരിച്ചിരുന്ന ‘ഒന്റാരിയോ ഇമിഗ്രന്റ് നോമിനി പ്രോഗ്രാമിൽ’ (OINP) വരുത്തിയ നിയന്ത്രണങ്ങളാണ് അപേക്ഷകരുടെ ഭാവി അനിശ്ചിതത്വത്തിലാക്കിയത്. ഫെഡറൽ സർക്കാരിന്റെ കുടിയേറ്റ നിയന്ത്രണ നയത്തിന്റെ ഭാഗമായാണ് പ്രവിശ്യാ സർക്കാരിന്റെ ഈ നീക്കം.

നിലവിലുള്ള ഒൻപത് വിഭാഗങ്ങളെ (Entry Categories) നാലായി ചുരുക്കാനാണ് ഒന്റാറിയോ സർക്കാർ ആലോചിക്കുന്നത്. ഇതിൽ പ്രധാനപ്പെട്ട Skilled Trades Stream ഒന്റാരിയോ സർക്കാർ ഇതിനോടകം റദ്ദാക്കി കഴിഞ്ഞു. വ്യാജ രേഖകൾ സമർപ്പിച്ച് അപേക്ഷ നൽകുന്നവരുടെ എണ്ണം വർധിച്ചതിനാലാണ് ഇത്തരമൊരു തീരുമാനമെന്ന് മന്ത്രാലയം ഔദ്യോഗികമായി അറിയിച്ചു. ഇതോടെ ആറുവർഷമായി കാനഡയിൽ ജോലി ചെയ്യുന്ന ഇന്ത്യൻ എൻജിനീയറായ അങ്കിത് കുമാർ പട്ടേൽ ഉൾപ്പെടെയുള്ള 2,600-ഓളം അപേക്ഷകർ രാജ്യം വിടേണ്ടി വരുന്ന സാഹചര്യമാണ് നിലവിലുള്ളത്.

നിശ്ചിത സ്ട്രീമുകളിൽ അപേക്ഷ നൽകി കാത്തിരിക്കുന്നവരിൽ പാകിസ്ഥാനിൽ നിന്നുള്ള മുഹമ്മദ് ഹസീബ് അഹമ്മദിനെപ്പോലെയുള്ള ഉന്നത വിദ്യാഭ്യാസമുള്ളവരും ആശങ്കയിലാണ്. ആർട്ടിഫിഷ്യൽ ഇന്റലിജൻസിൽ ബിരുദാനന്തര ബിരുദം പൂർത്തിയാക്കിയ അഹമ്മദ്, തന്റെ സ്ട്രീം റദ്ദാക്കപ്പെടുമോ എന്ന ഭയത്താൽ ഉപരിപഠന നടപടികൾ താൽക്കാലികമായി നിർത്തിവെച്ചിരിക്കുകയാണ്. 2024 സാമ്പത്തിക വർഷത്തിൽ മാത്രം ഒൻപത് ലക്ഷത്തോളം അപേക്ഷകൾ ലഭിച്ച സാഹചര്യത്തിൽ, കുടിയേറ്റം സുസ്ഥിരമായ നിലയിൽ എത്തിക്കാനാണ് ഫെഡറൽ സർക്കാർ ശ്രമിക്കുന്നത്.

അതേസമയം, നിയമങ്ങളിൽ വരുത്തിയ മാറ്റത്തിനെതിരെ ശക്തമായ പ്രതിഷേധമാണ് ഉയരുന്നത്. ഒന്റാറിയോ എൻ.ഡി.പി (NDP) ഉൾപ്പെടെയുള്ള പ്രതിപക്ഷ പാർട്ടികൾ സർക്കാരിന്റെ നടപടിയെ ‘തൊഴിൽ ദുരന്തം’ എന്നാണ് വിശേഷിപ്പിച്ചത്. വർഷങ്ങളോളം കാനഡയുടെ സമ്പദ്‌വ്യവസ്ഥയ്ക്കായി അധ്വാനിച്ചവരോടുള്ള വഞ്ചനയാണിതെന്ന് പ്രതിഷേധക്കാർ ആരോപിക്കുന്നു. അപേക്ഷകരിൽ കാണുന്ന ക്രമക്കേടുകൾ പരിഹരിക്കാൻ സ്ട്രീം പൂർണ്ണമായും നിർത്തലാക്കുന്നത് ശരിയല്ലെന്നാണ് നിയമവിദഗ്ധരുടെ പക്ഷം.

വരുന്ന വർഷങ്ങളിൽ കുടിയേറ്റ പരിശോധനകൾ കൂടുതൽ കടുപ്പിക്കുമെന്നാണ് സൂചന. 2026 വർഷം അപേക്ഷകരെ സംബന്ധിച്ച് കടുത്ത വെല്ലുവിളികൾ നിറഞ്ഞതായിരിക്കുമെന്ന് ഇമിഗ്രേഷൻ അഭിഭാഷകർ മുന്നറിയിപ്പ് നൽകുന്നു. ഒന്റാറിയോയിൽ സ്ഥിരതാമസത്തിനുള്ള വഴി അടഞ്ഞതോടെ ന്യൂസിലൻഡ് ഉൾപ്പെടെയുള്ള മറ്റ് രാജ്യങ്ങളിലേക്ക് കുടിയേറാൻ സാധ്യതകൾ തേടുകയാണ് പല അപേക്ഷകരും. ആരോഗ്യ മേഖലയിലുള്ളവർക്കും മികച്ച തൊഴിൽ നൈപുണ്യമുള്ളവർക്കും മാത്രമായി പുതിയ പാതകൾ രൂപീകരിക്കാനാണ് നിലവിൽ സർക്കാർ ശ്രമിക്കുന്നത്.

ontario-immigration-program-trades-canada

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt