വിന്നിപെഗ്: വിന്നിപെഗിൽ മോഷണവാഹനം ഉപയോഗിച്ച് സിറ്റി ട്രാൻസിറ്റ് ബസിനെ ഇടിച്ചുതെറിപ്പിക്കുകയും അപകടകരമായ രീതിയിൽ വാഹനമോടിക്കുകയും ചെയ്ത 16-കാരൻ അറസ്റ്റിൽ. കഴിഞ്ഞ ദിവസം വിന്നിപെഗിന്റെ വടക്കൻ മേഖലയിലാണ് സംഭവം. വാഹന മോഷണം, മാരകായുധങ്ങൾ കൈവശം വെക്കൽ ഉൾപ്പെടെ പന്ത്രണ്ടിലധികം കുറ്റങ്ങളാണ് പ്രായപൂർത്തിയാകാത്ത പ്രതിക്കെതിരെ ചുമത്തിയിരിക്കുന്നത്.
കഴിഞ്ഞ ദിവസം പുലർച്ചെ മോഷ്ടിക്കപ്പെട്ട 2014 മോഡൽ മാസ്ഡ 3 ജിടി (2014 Mazda 3 GT) വാഹനമാണ് അപകടമുണ്ടാക്കിയത്. നഗരത്തിൽ സംശയാസ്പദമായ സാഹചര്യത്തിൽ കണ്ട വാഹനം നിർത്താൻ പോലീസ് ആവശ്യപ്പെട്ടെങ്കിലും ഡ്രൈവർ വേഗത്തിൽ ഓടിച്ചുപോവുകയായിരുന്നു. തുടർന്ന് ട്രാഫിക് സിഗ്നലുകൾ അവഗണിച്ച് പാഞ്ഞ വാഹനം സിറ്റി ട്രാൻസിറ്റ് ബസിന്റെ വശത്തേക്ക് ഇടിച്ചുകയറി.
അപകടത്തിൽ ആർക്കും പരിക്കേറ്റിട്ടില്ലെന്ന് പോലീസ് സ്ഥിരീകരിച്ചു. ബസിൽ ഇടിച്ചതിന് പിന്നാലെ വാഹനം ഉപേക്ഷിച്ച് ഓടി രക്ഷപ്പെടാൻ ശ്രമിച്ച യുവാവിനെ പിന്തുടർന്ന് പിടികൂടുകയായിരുന്നു. പ്രതി നിലവിൽ പോലീസ് കസ്റ്റഡിയിലാണ്.
അറസ്റ്റിന് പിന്നാലെ പോലീസ് നടത്തിയ പരിശോധനയിൽ വാഹനത്തിനുള്ളിൽ നിന്ന് തോക്ക് കണ്ടെടുത്തു. തോക്കിലെ സീരിയൽ നമ്പറുകൾ മായ്ച്ചുകളഞ്ഞ നിലയിലായിരുന്നു. കൂടാതെ തോക്കിൽ ഉപയോഗിക്കുന്ന അധിക മാഗസിനും വെപ്പൺ ലൈറ്റും പോലീസ് കണ്ടെടുത്തിട്ടുണ്ട്. ഗതാഗത നിയമങ്ങൾ ലംഘിച്ചതിനും അനധികൃതമായി ആയുധം കൈവശം വെച്ചതിനുമുള്ള നടപടികൾ പോലീസ് ഊർജിതമാക്കി.
winnipeg-stolen-vehicle-bus-collision
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
