ടൊറന്റോ: കാനഡയുടെ വിവിധ ഭാഗങ്ങളിൽ വരും ദിവസങ്ങളിൽ അതിശൈത്യവും ശക്തമായ മഞ്ഞുവീഴ്ചയും തുടരുമെന്ന് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഒന്റാറിയോയുടെ തെക്കൻ മേഖലകളിൽ ഐസ് മഴയ്ക്കും (Freezing rain) ടൊറന്റോ ഉൾപ്പെടെയുള്ള പ്രദേശങ്ങളിൽ ശക്തമായ മഞ്ഞുവീഴ്ചയ്ക്കും സാധ്യതയുണ്ടെന്ന് എൻവയോൺമെന്റ് കാനഡ അറിയിച്ചു. ശൈത്യകാലം കടുക്കുന്നതോടെ ജനജീവിതം ദുസ്സഹമാകുമെന്നാണ് റിപ്പോർട്ടുകൾ സൂചിപ്പിക്കുന്നത്.
ഒന്റാറിയോയിലെ വിൻഡ്സർ മേഖലയിലും ഗ്രേറ്റർ ടൊറന്റോ ഏരിയയുടെ (GTA) ചില ഭാഗങ്ങളിലും വൈകുന്നേരത്തോടെ ഐസ് മഴ പെയ്യാൻ സാധ്യതയുണ്ട്. ടൊറന്റോയുടെ വടക്കൻ പ്രദേശങ്ങളിൽ അഞ്ച് മുതൽ 12 സെന്റീമീറ്റർ വരെ മഞ്ഞുവീഴ്ചയുണ്ടാകാം. സാൾട്ട് സ്റ്റെ. മേരി മുതൽ തണ്ടർ ബേ വരെയുള്ള വടക്കൻ മേഖലകളിൽ 20 സെന്റീമീറ്റർ വരെ മഞ്ഞുവീഴ്ചയ്ക്കും ഐസ് മഴയ്ക്കും സാധ്യതയുണ്ടെന്ന് അധികൃതർ വ്യക്തമാക്കി. മഞ്ഞ് കട്ടപിടിക്കുന്നത് റോഡ് ഗതാഗതത്തിന് വലിയ വെല്ലുവിളിയാകും.
അതേസമയം, രാജ്യത്തിന്റെ കിഴക്കൻ തീരത്തുള്ള ന്യൂഫൗണ്ട്ലാന്റ് ആൻഡ് ലാബ്രഡോറിൽ കനത്ത മഞ്ഞുകാറ്റ് (Blizzard) തുടരുകയാണ്. ലാബ്രഡോറിന്റെ കിഴക്കൻ തീരത്ത് ഏകദേശം 60 സെന്റീമീറ്റർ വരെ മഞ്ഞുവീഴ്ചയുണ്ടാകുമെന്നാണ് പ്രവചനം. കനത്ത മഞ്ഞുവീഴ്ചയെത്തുടർന്ന് വെള്ളിയാഴ്ച രാവിലെ വരെ ഏകദേശം 5,300 ഉപഭോക്താക്കൾക്ക് വൈദ്യുതി ബന്ധം നഷ്ടമായതായി ന്യൂഫൗണ്ട്ലാന്റ് പവർ അറിയിച്ചു. വൈദ്യുതി പുനഃസ്ഥാപിക്കാനുള്ള ശ്രമങ്ങൾ തുടരുകയാണ്.
പടിഞ്ഞാറൻ കാനഡയിലും സ്ഥിതി ഭിന്നമല്ല. ആൽബർട്ട, ബ്രിട്ടീഷ് കൊളംബിയയുടെ വടക്കൻ ഭാഗങ്ങൾ, യുക്കോൺ എന്നിവിടങ്ങളിൽ അതിശൈത്യം (Extreme cold) തുടരുമെന്ന് അധികൃതർ മുന്നറിയിപ്പ് നൽകി. താപനില വൻതോതിൽ താഴാൻ സാധ്യതയുള്ളതിനാൽ അതീവ ജാഗ്രത പാലിക്കണമെന്ന് നിർദ്ദേശമുണ്ട്. ശൈത്യകാലം കനക്കുന്നതോടെ അത്യാവശ്യ കാര്യങ്ങൾക്കല്ലാതെ പുറത്തിറങ്ങുന്നത് ഒഴിവാക്കണമെന്നും യാത്രക്കാർ കാലാവസ്ഥാ വിവരങ്ങൾ ശ്രദ്ധിക്കണമെന്നും അധികൃതർ അറിയിച്ചു.
freezing-rain-snow-expected-in-parts-of-ontario-as-newfoundland-braces-for-blizzards
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
