ടൊറോന്റോ: നോർത്ത് യോർക്കിൽ ബുധനാഴ്ച ഉച്ചയ്ക്ക് ശേഷം വാഹനം കെട്ടിടത്തിലേക്ക് ഇടിച്ചുകയറിയുണ്ടായ അപകടത്തിൽ ഒരാൾ മരിക്കുകയും നാല് പേർക്ക് പരിക്കേൽക്കുകയും ചെയ്തതായി പൊലീസ് അറിയിച്ചു. നിയന്ത്രണം വിട്ട വാഹനം കെട്ടിടത്തിന്റെ മുൻഭാഗത്തേക്ക് ഇടിച്ചുകയറുകയായിരുന്നുവെന്ന് പൊലീസ് വ്യക്തമാക്കി. വാഹനത്തിന്റെ ഡ്രൈവർ, യാത്രക്കാരൻ, മറ്റ് രണ്ട് കാൽനടയാത്രക്കാർ എന്നിവരെ നിസാര പരിക്കുകളോടെ ആശുപത്രിയിൽ പ്രവേശിപ്പിച്ചു. പരിക്കേറ്റ മറ്റൊരു സ്ത്രീയെ ട്രോമ കെയർ യൂണിറ്റിലേക്ക് മാറ്റിയിട്ടുണ്ട്.
സ്ഥാപനത്തിനുള്ളിൽ നിന്നിരുന്ന വ്യക്തിയാണ് അപകടത്തിൽ കൊല്ലപ്പെട്ടത്. വാഹനം ഇടിച്ചുകയറിയ സമയത്ത് ഇയാൾക്ക് അവിടെനിന്ന് മാറാൻ സാധിച്ചില്ലെന്നും കെട്ടിടത്തിനും വാഹനത്തിനും ഇടയിൽ കുടുങ്ങുകയുമായിരുന്നുവെന്നും ഡ്യൂട്ടി ഇൻസ്പെക്ടർ ജോൺ റോസ് അറിയിച്ചു. അപകടത്തിൽപ്പെട്ടയാളെ രക്ഷപ്പെടുത്താൻ ശ്രമിച്ചെങ്കിലും പിന്നീട് മരണം സ്ഥിരീകരിക്കുകയായിരുന്നുവെന്ന് പൊലീസ് വ്യക്തമാക്കി.
ഡഫറിൻ സ്ട്രീറ്റ്, ഫിഞ്ച് അവന്യൂ മേഖലയിലാണ് അപകടം നടന്നതെന്ന് പൊലീസ് സ്ഥിരീകരിച്ചു. ഡ്രൈവർക്ക് വാഹനത്തിന്റെ നിയന്ത്രണം നഷ്ടപ്പെട്ടതാണ് അപകടത്തിലേക്ക് നയിച്ചതെന്ന് പ്രാഥമിക അന്വേഷണത്തിന് ശേഷം ഉദ്യോഗസ്ഥർ അറിയിച്ചു. സംഭവത്തിൽ കൂടുതൽ അന്വേഷണം നടന്നുവരികയാണ്.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Accident: Vehicle crashes into building in North York; one dead, four injured
