ഒട്ടാവ: കാനഡയിലെ അന്താരാഷ്ട്ര വിദ്യാർത്ഥികൾക്ക് ഇനി കടുത്ത ജാഗ്രതയുടെ കാലം. 2025 ഡിസംബറിൽ ഇമിഗ്രേഷൻ വിഭാഗം (IRCC) പുറത്തിറക്കിയ പുതിയ നിർദ്ദേശങ്ങൾ പ്രകാരം സ്റ്റഡി പെർമിറ്റുകളുടെ കാലാവധിയിലും പി.ജി.ഡബ്ല്യു.പി (PGWP) യോഗ്യതകളിലും നിർണ്ണായക മാറ്റങ്ങൾ വരുത്തിയിരിക്കുകയാണ്. മലയാളി വിദ്യാർത്ഥികൾ ഉൾപ്പെടെയുള്ള ആയിരക്കണക്കിന് പ്രവാസികളെ ഈ പരിഷ്കാരം നേരിട്ട് ബാധിക്കും.
പാത്ത്വേ അല്ലെങ്കിൽ പ്രീ-റെക്വിസിറ്റ് പ്രോഗ്രാമുകൾ ചെയ്യുന്ന വിദ്യാർത്ഥികൾക്ക് ലഭിച്ചിരുന്ന വലിയ ആനുകൂല്യമാണ് ഇപ്പോൾ നിർത്തലാക്കിയത്. മുൻപ് ഇത്തരം കോഴ്സുകൾ കഴിഞ്ഞാൽ ഒരു വർഷം വരെ അധികമായി കാനഡയിൽ തുടരാമായിരുന്നു എങ്കിൽ ഇനി മുതൽ കോഴ്സ് കഴിഞ്ഞ് വെറും 90 ദിവസം മാത്രമേ കാനഡയിൽ തുടരാൻ അനുവാദമുണ്ടാകൂ. ഇംഗ്ലീഷ്/ഫ്രഞ്ച് ഭാഷാ പഠനത്തിനോ അക്കാദമിക് അപ്ഗ്രേഡിംഗിനോ എത്തിയവർ കോഴ്സ് കഴിഞ്ഞ് മൂന്ന് മാസത്തിനുള്ളിൽ തന്നെ അടുത്ത പ്രധാന കോഴ്സിലേക്ക് അപേക്ഷിക്കുകയോ വിസ പുതുക്കുകയോ ചെയ്തിരിക്കണം. ഇതിൽ ചെറിയ വീഴ്ച വരുത്തിയാൽ പോലും രാജ്യം വിടേണ്ടി വരുമെന്ന സ്ഥിതിയാണ് നിലവിലുള്ളത്.
വർക്ക് പെർമിറ്റ് അഥവാ പി.ജി.ഡബ്ല്യു.പി നിയമങ്ങളിലും വലിയ രീതിയിലുള്ള ഏകീകരണം സർക്കാർ കൊണ്ടുവന്നു. 2025 മാർച്ച് 11 മുതൽ കോളേജ് ഡിപ്ലോമക്കാരെയും യൂണിവേഴ്സിറ്റി ബിരുദധാരികളെയും ഒരേ മാനദണ്ഡത്തിലായിരിക്കും വിലയിരുത്തുക. ഡിഗ്രി കഴിഞ്ഞവർക്ക് CLB 7 ഭാഷാ യോഗ്യത നിർബന്ധമാക്കിയപ്പോൾ കോളേജ് ഡിപ്ലോമക്കാർക്ക് CLB 5 മതിയാകും. എന്നാൽ 2024 നവംബർ ഒന്നിന് മുൻപ് ആദ്യമായി സ്റ്റഡി പെർമിറ്റിന് അപേക്ഷിച്ചവർക്ക് വലിയ ആശ്വാസ വാർത്തയുണ്ട്. ഇവർ പഠിക്കുന്ന കോഴ്സ് ഏത് മേഖലയിലുള്ളതായാലും വർക്ക് പെർമിറ്റിന് അർഹരായിരിക്കും. പിന്നീട് സ്റ്റഡി പെർമിറ്റ് പുതുക്കിയവർക്കും ഈ ഇളവ് ബാധകമാണ്.
പഠനം കഴിഞ്ഞ് വർക്ക് പെർമിറ്റിനായി അപേക്ഷ നൽകി കാത്തിരിക്കുന്ന സമയത്ത് (Maintained Status) ജോലി ചെയ്യുന്നതിലും സർക്കാർ വ്യക്തത നൽകി. കോഴ്സ് കഴിഞ്ഞ് 180 ദിവസത്തിനുള്ളിൽ ഏതെങ്കിലും ഘട്ടത്തിൽ നിങ്ങൾക്ക് നിയമപരമായ പഠനാനുമതി ഉണ്ടായിരിക്കണം എന്നത് നിർബന്ധമാണ്. പഠനകാലത്ത് മുഴുവൻ സമയ വിദ്യാർത്ഥിയായിരിക്കണം എന്ന നിബന്ധനയിൽ അവസാന സെമസ്റ്ററിൽ മാത്രം ഇളവ് നൽകിയിട്ടുണ്ട്. കോഴ്സ് പൂർത്തിയാക്കാൻ കുറഞ്ഞ വിഷയങ്ങൾ മാത്രം മതിയെങ്കിൽ അവസാന സെമസ്റ്ററിൽ പാർട്ട് ടൈം പഠനം അനുവദനീയമാണ്.
ചുരുക്കത്തിൽ കാനഡയിലെ ഇമിഗ്രേഷൻ നിയമങ്ങൾ കൂടുതൽ കർക്കശമാവുകയാണ്. പഴയതുപോലെ കോഴ്സ് കഴിഞ്ഞ ശേഷം സാവകാശം തീരുമാനങ്ങൾ എടുക്കാൻ ഇനി വിദ്യാർത്ഥികൾക്ക് സാധിക്കില്ല. ഓരോ നീക്കവും കൃത്യമായ സമയപരിധിക്കുള്ളിൽ ചെയ്തില്ലെങ്കിൽ വർക്ക് പെർമിറ്റും തുടർപഠനവും പ്രതിസന്ധിയിലാകും.
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
International Students In Canada Must Know These 2 New IRCC Updates
