ന്യൂഡൽഹി: പുതുവർഷത്തിലേക്ക് രാജ്യം ചുവടുവെക്കുമ്പോൾ ഗതാഗത മേഖലയിൽ വിപ്ലവകരമായ മാറ്റങ്ങൾക്കാണ് കേന്ദ്ര സർക്കാർ തുടക്കമിടുന്നത്. ടോൾ പിരിവ് രീതി മുതൽ മലിനീകരണ നിയന്ത്രണങ്ങൾ വരെ നീളുന്ന പുതിയ പരിഷ്കാരങ്ങൾ സാധാരണക്കാരുടെ യാത്രാ അനുഭവത്തെ അടിമുടി മാറ്റും. 2026 അവസാനത്തോടെ രാജ്യത്തെ ദേശീയപാതകളിൽ നിന്ന് പരമ്പരാഗത ടോൾ പ്ലാസകൾ പൂർണ്ണമായും ഒഴിവാക്കി ‘മൾട്ടി ലെയ്ൻ ഫ്രീ ഫ്ലോ’ (MLFF) സംവിധാനം നടപ്പിലാക്കുമെന്ന് കേന്ദ്ര റോഡ് ഗതാഗത മന്ത്രി നിതിൻ ഗഡ്കരി രാജ്യസഭയിൽ വ്യക്തമാക്കിയിട്ടുണ്ട്.
ഹൈവേകളിൽ വാഹനം നിർത്താതെ തന്നെ ടോൾ ഈടാക്കുന്ന അത്യാധുനിക സാങ്കേതികവിദ്യയാണ് പുതിയ വർഷത്തിന്റെ പ്രധാന ആകർഷണം. സാറ്റലൈറ്റ് അധിഷ്ഠിത ട്രാക്കിംഗ്, ആർട്ടിഫിഷ്യൽ ഇന്റലിജൻസ് (AI) അധിഷ്ഠിത നമ്പർ പ്ലേറ്റ് തിരിച്ചറിയൽ സംവിധാനം എന്നിവ വഴിയാണ് ടോൾ പിരിക്കുക. നിലവിൽ ഫാസ്ടാഗ് വഴി ടോൾ പ്ലാസകളിൽ കാത്തുനിൽപ്പ് കുറഞ്ഞെങ്കിലും, പുതിയ സംവിധാനം വരുന്നതോടെ വാഹനങ്ങൾ നിർത്തേണ്ട സാഹചര്യം പൂർണ്ണമായും ഒഴിവാകും. മണിക്കൂറിൽ 80 കിലോമീറ്റർ വേഗതയിൽ സഞ്ചരിക്കുന്ന വാഹനങ്ങളിൽ നിന്നുപോലും കൃത്യമായി ടോൾ ഈടാക്കാൻ ഈ സംവിധാനത്തിലൂടെ സാധിക്കും.
ഇന്ധന നഷ്ടം കുറയ്ക്കുന്നതിലൂടെ രാജ്യത്തിന് പ്രതിവർഷം 1,500 കോടി രൂപയുടെ ലാഭമാണ് സർക്കാർ ലക്ഷ്യമിടുന്നത്. കൂടാതെ ടോൾ പിരിവിലെ സുതാര്യത ഉറപ്പാക്കുന്നതിലൂടെ വരുമാനത്തിൽ 6,000 കോടി രൂപയുടെ വർധനയും പ്രതീക്ഷിക്കുന്നു. ടോൾ പ്ലാസകളിലെ തിരക്ക് ഒഴിവാകുന്നത് ചരക്ക് ഗതാഗതത്തിന്റെ വേഗത വർദ്ധിപ്പിക്കുകയും ലോജിസ്റ്റിക്സ് ചെലവ് കുറയ്ക്കുകയും ചെയ്യും. ഇത് രാജ്യത്തെ സാമ്പത്തിക മേഖലയ്ക്ക് വലിയ കരുത്തേകുമെന്നാണ് വിലയിരുത്തൽ.
പരിസ്ഥിതി സംരക്ഷണത്തിന്റെ ഭാഗമായി മലിനീകരണ നിയന്ത്രണ നിയമങ്ങൾ കടുപ്പിക്കാനാണ് മറ്റൊരു നീക്കം. ഇതിന്റെ ആദ്യപടിയായി രാജ്യതലസ്ഥാനമായ ഡൽഹി ഉൾപ്പെടെയുള്ള നഗരങ്ങളിൽ ഡിസംബർ പകുതിയോടെ തന്നെ ‘നോ പിയുസി, നോ ഫ്യൂവൽ’ (No PUC, No Fuel) നയം പ്രാബല്യത്തിൽ വന്നിട്ടുണ്ട്. സാധുവായ മലിനീകരണ നിയന്ത്രണ സർട്ടിഫിക്കറ്റ് (PUC) ഇല്ലാത്ത വാഹനങ്ങൾക്ക് പെട്രോൾ പമ്പുകളിൽ നിന്ന് ഇന്ധനം നൽകില്ല. ഒഡീഷ ഉൾപ്പെടെയുള്ള കൂടുതൽ സംസ്ഥാനങ്ങൾ ഈ നയം നടപ്പിലാക്കാൻ ഒരുങ്ങുന്നത് വാഹന ഉടമകൾക്ക് വലിയ ജാഗ്രതാനിർദ്ദേശം നൽകുന്നു.
ഗതാഗത നിയമലംഘനങ്ങൾ തടയാൻ ഹൈവേകളിൽ എ.ഐ ക്യാമറകളുടെ നിരീക്ഷണം കൂടുതൽ ശക്തമാക്കും. അമിതവേഗതയിൽ സഞ്ചരിക്കുന്ന വാഹനങ്ങളെ സാറ്റലൈറ്റ് സംവിധാനം വഴി നിരീക്ഷിക്കാനും ഓട്ടോമാറ്റിക്കായി പിഴ ഈടാക്കാനും പുതിയ സാങ്കേതികവിദ്യയ്ക്ക് സാധിക്കും. വാഹനങ്ങൾ കൈമാറ്റം ചെയ്യുമ്പോഴോ രജിസ്ട്രേഷൻ പുതുക്കുമ്പോഴോ നിലവിലുള്ള എല്ലാ ടോൾ കുടിശ്ശികകളും ഇ-ചെല്ലാൻ പിഴകളും നിർബന്ധമായും അടച്ചു തീർക്കണമെന്ന കർശന വ്യവസ്ഥയും പുതുവർഷത്തിൽ നടപ്പിലാക്കും.
ഗ്രീൻഫീൽഡ് ഹൈവേകളുടെ നിർമ്മാണത്തിന് കൂടുതൽ മുൻഗണന നൽകുന്നതോടെ യാത്രകൾ കൂടുതൽ സുഗമമാകും. ഇലക്ട്രിക് വാഹനങ്ങൾക്ക് കൂടുതൽ പ്രോത്സാഹനം നൽകുന്നതിനൊപ്പം ഹൈവേകളിൽ ചാർജിംഗ് സൗകര്യങ്ങൾ വർദ്ധിപ്പിക്കാനും സർക്കാർ പദ്ധതിയിടുന്നുണ്ട്. ഇന്ധനവിലയിൽ അന്താരാഷ്ട്ര വിപണിക്കനുസരിച്ചുള്ള മാറ്റങ്ങൾ ഉണ്ടാകുമെങ്കിലും, ഗതാഗത സംവിധാനങ്ങൾ ഡിജിറ്റൈസ് ചെയ്യുന്നതിലൂടെയും തടസ്സങ്ങൾ ഒഴിവാക്കുന്നതിലൂടെയും സാധാരണക്കാരന്റെ യാത്രാച്ചെലവിൽ വലിയ കുറവുണ്ടാകുമെന്നാണ് അധികൃതർ നൽകുന്ന സൂചന.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
New rules on highways await travelers in the new year; The country’s transportation sector is changing, everything you need to know
