ന്യൂ ബ്രൺസ്വിക്: ന്യൂ ബ്രൺസ്വിക് പ്രൊവിൻഷ്യൽ നോമിനി പ്രോഗ്രാമിന്റെ (PNP) ഏറ്റവും പുതിയ നറുക്കെടുപ്പിൽ 110 അപേക്ഷകർക്ക് ക്ഷണം ലഭിച്ചു. ഡിസംബർ 9-ന് നടന്ന തിരഞ്ഞെടുപ്പിൽ ന്യൂ ബ്രൺസ്വിക് എക്സ്പ്രസ് എൻട്രി സ്ട്രീം, ന്യൂ ബ്രൺസ്വിക് സ്കിൽഡ് വർക്കർ സ്ട്രീം എന്നീ വിഭാഗങ്ങളിലെ അപേക്ഷകർക്കാണ് അവസരം ലഭിച്ചത്. ഡിസംബർ 8 രാത്രി 11:59 വരെയുള്ള അപേക്ഷകൾ പരിഗണിച്ചാണ് ഈ നടപടി. എല്ലാ തൊഴിൽ മേഖലകളിലുമുള്ള ഫ്രഞ്ച് ഭാഷാ അറിവുള്ള ഉദ്യോഗാർത്ഥികളെയാണ് ഈ റൗണ്ടിൽ പ്രധാനമായും ലക്ഷ്യമിട്ടത്.
തിരഞ്ഞെടുക്കപ്പെട്ടവരിൽ ഭൂരിഭാഗവും സ്കിൽഡ് വർക്കർ സ്ട്രീമിന് കീഴിലുള്ളവരാണ്. ന്യൂ ബ്രൺസ്വിക് എക്സ്പ്രസ് എൻട്രി സ്ട്രീമിലെ എംപ്ലോയ്മെന്റ് ഇൻ ന്യൂ ബ്രൺസ്വിക് സ്ട്രീമിലൂടെ 8 പേർക്കും, സ്കിൽഡ് വർക്കർ സ്ട്രീമിലെ ന്യൂ ബ്രൺസ്വിക് എക്സ്പീരിയൻസ്, ന്യൂ ബ്രൺസ്വിക് ഗ്രാജ്വേറ്റ്സ് സ്ട്രീമിലൂടെ 102 പേർക്കും ക്ഷണം ലഭിച്ചു. ഈ ഘട്ടത്തിൽ അപേക്ഷ സമർപ്പിക്കുന്നവരുടെ രേഖകൾ 2026-ൽ ആയിരിക്കും പ്രോസസ്സ് ചെയ്യുകയെന്ന് അധികൃതർ വ്യക്തമാക്കി.
എക്സ്പ്രസ് എൻട്രി സ്ട്രീമിലേക്ക് യോഗ്യത നേടുന്നതിന് ഉദ്യോഗാർത്ഥികൾക്ക് സാധുവായ എക്സ്പ്രസ് എൻട്രി പ്രൊഫൈൽ ഉണ്ടായിരിക്കണം. കഴിഞ്ഞ 12 മാസമായി പ്രവിശ്യയിൽ താമസിക്കുന്നവരും, യോഗ്യരായ തൊഴിലുടമകൾക്ക് കീഴിൽ ടീയർ (TEER) 0-3 വിഭാഗത്തിൽപ്പെട്ട ജോലികളിൽ പൂർണ്ണസമയ പരിചയമുള്ളവരുമായിരിക്കണം ഇവർ. കൂടാതെ സി.എൽ.ബി (CLB) ലെവൽ 7 ഭാഷാ നൈപുണ്യവും കുറഞ്ഞത് ഹൈസ്കൂൾ വിദ്യാഭ്യാസ യോഗ്യതയും അനിവാര്യമാണ്.
സ്കിൽഡ് വർക്കർ സ്ട്രീമിലെ ന്യൂ ബ്രൺസ്വിക് എക്സ്പീരിയൻസ് വിഭാഗത്തിൽ അപേക്ഷിക്കാൻ നിലവിലെ തൊഴിലുടമയുടെ പിന്തുണയും ആറുമാസത്തെ പ്രവൃത്തിപരിചയവും ആവശ്യമാണ്. ന്യൂ ബ്രൺസ്വിക് ഗ്രാജ്വേറ്റ്സ് വിഭാഗത്തിന് കീഴിൽ പ്രവിശ്യയിലെ അംഗീകൃത വിദ്യാഭ്യാസ സ്ഥാപനങ്ങളിൽ (DLI) നിന്ന് പഠനം പൂർത്തിയാക്കിയവർക്കാണ് മുൻഗണന. എന്നാൽ ചില പ്രത്യേക തൊഴിൽ മേഖലകളിൽ ജോലി ചെയ്യുന്നവരെ ഈ തിരഞ്ഞെടുപ്പുകളിൽ പരിഗണിച്ചിട്ടില്ലെന്നും ഔദ്യോഗിക അറിയിപ്പിൽ പറയുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
ഒരു അംഗീകൃത ഇമിഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)
New Brunswick Provincial Nominee Program: Here are the details of the draw held on December 9
