ദിലീപ് ചിത്രം ‘ഭഭബ’ തിയേറ്ററുകളിൽ; ‘മാഡ്‌നെസ്’ ആണ് മെയിൻ, സോഷ്യൽ മീഡിയയിൽ പ്രേക്ഷകരുടെ പ്രതികരണങ്ങൾ സജീവം

ദിലീപിനെ പ്രധാന കഥാപാത്രമാക്കി പുതുമുഖ സംവിധായകനായ ധനഞ്ജയ് ശങ്കർ സംവിധാനം ചെയ്ത ‘ഭ ഭ ബ’ ഡിസംബർ 18-ന് തിയറ്ററുകളിൽ റിലീസ് ചെയ്തു. 2017-ലെ നടി ആക്രമിക്കപ്പെട്ട കേസിൽ കോടതി വെറുതെ വിട്ടതിന് പത്ത് ദിവസത്തിന് ശേഷമാണ് ദിലീപിന്റെ ഈ ബിഗ് ബജറ്റ് ചിത്രം പ്രദർശനത്തിനെത്തുന്നത്. വിനീത് ശ്രീനിവാസൻ, ധ്യാൻ ശ്രീനിവാസൻ എന്നിവരും ചിത്രത്തിൽ പ്രധാന വേഷങ്ങളിൽ അണിനിരക്കുന്നുണ്ട്.

യുവതാരങ്ങളായ ഫഹിം സഫറും നൂറിൻ ഷെരീഫും ചേർന്ന് തിരക്കഥയൊരുക്കിയ ചിത്രം ഒരു പക്കാ കൊമേഴ്സ്യൽ എന്റർടൈനറായാണ് ഒരുക്കിയിരിക്കുന്നത്. ചിത്രത്തിന്റെ ട്രെയിലറിലും സിനിമയുടെ പ്രമോഷനുകളിലും ദിലീപിന്റെ തിരിച്ചുവരവ് എന്ന സൂചന നൽകുന്ന രീതിയിലുള്ള മെറ്റാ-കമന്ററികൾ ഉൾപ്പെടുത്തിയിട്ടുണ്ട്. തമിഴ് താരം വിജയ്‌യുടെ ‘ഗില്ലി’ സിനിമയുമായി ബന്ധപ്പെട്ട പരാമർശങ്ങളും ചിത്രത്തിൽ ഉൾക്കൊള്ളിച്ചിട്ടുണ്ടെന്ന് പ്രേക്ഷകർ വ്യക്തമാക്കി.

സോഷ്യൽ മീഡിയ പ്ലാറ്റ്‌ഫോമുകളിലെ ആദ്യ പ്രതികരണങ്ങൾ പ്രകാരം ചിത്രത്തിന് പലതരത്തിലുള അഭിപ്രായങ്ങളാണ് ലഭിക്കുന്നത്. ചിത്രത്തിലെ ഹ്യൂമർ രംഗങ്ങളും സിനിമയിലെ വിവിധ റഫറൻസുകളും ആരാധകർക്കിടയിൽ സ്വീകാര്യത നേടുന്നുണ്ടെങ്കിലും, യുക്തിരഹിതമായ അവതരണവും തിരക്കഥയിലെ പോരായ്മകളും ചില പ്രേക്ഷകർ ചൂണ്ടിക്കാട്ടുന്നുണ്ട്. ഒരു വിഭാഗം പ്രേക്ഷകർ ചിത്രത്തെ ‘മാഡ്‌നെസ് എന്റർടൈനർ’ എന്ന് വിശേഷിപ്പിക്കുമ്പോൾ മറ്റു ചിലർ ചിത്രം ശരാശരി മാത്രമാണെന്ന് പറയുന്നുണ്ട്.

ചിത്രത്തിൽ സൂപ്പർ താരം മോഹൻലാൽ അതിഥി വേഷത്തിൽ എത്തുന്നു എന്നത് വലിയ രീതിയിൽ വാർത്താപ്രാധാന്യം നേടിയിരുന്നു. മോഹൻലാലിന്റെ സാന്നിധ്യവും ഷാൻ റഹ്‌മാൻ, ഗോപി സുന്ദർ എന്നിവർ ഒരുക്കിയ സംഗീതവും ചിത്രത്തിന് മികച്ച കളക്ഷൻ നേടിക്കൊടുക്കാൻ സഹായിക്കുമെന്ന് വ്യാപാര മേഖലയിലുള്ളവർ കണക്കുകൂട്ടുന്നു. ചിത്രത്തിന്റെ ആദ്യദിന പ്രീ-സെയിൽ ബിസിനസ് ഏകദേശം 4.5 കോടി രൂപ കടന്നതായാണ് റിപ്പോർട്ടുകൾ സൂചിപ്പിക്കുന്നത്.

അതേസമയം, നടനെതിരെയുള്ള മുൻകാല വിവാദങ്ങൾ സ്ത്രീ പ്രേക്ഷകരെയും കുടുംബങ്ങളെയും തിയറ്ററുകളിൽ നിന്ന് അകറ്റുമോ എന്ന ആശങ്ക സിനിമാ വിപണിയിലുണ്ട്. നടനെ വെറുതെ വിട്ടുകൊണ്ടുള്ള വിധി വന്ന പശ്ചാത്തലത്തിലും സാമൂഹിക മാധ്യമങ്ങളിൽ വലിയ തോതിലുള്ള ചർച്ചകളും പ്രതിഷേധങ്ങളും നിലനിൽക്കുന്നുണ്ട്. വരും ദിവസങ്ങളിലെ തിയറ്ററുകളിലെ തിരക്ക് അടിസ്ഥാനമാക്കിയാകും ചിത്രത്തിന്റെ വാണിജ്യ വിജയം നിശ്ചയിക്കപ്പെടുക എന്ന് നിരീക്ഷകർ വ്യക്തമാക്കി.

കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt

Dileep’s film ‘Bhabhaba’ in theaters; ‘Madness’ is the main one, audience reactions are active on social media