ന്യൂഫൗണ്ട്ലാൻഡ് ധനക്കമ്മി ഒരു ബില്യൺ ഡോളറിനടുത്ത്: ഏപ്രിൽ ബജറ്റിനേക്കാൾ മൂന്നിരട്ടി വർദ്ധന

സ്റ്റാൻഹോപ്പ്: ന്യൂഫൗണ്ട്ലാൻഡ് ആൻഡ് ലാബ്രഡോർ (NL) പ്രവിശ്യയുടെ ധനക്കമ്മി ഏപ്രിൽ ബജറ്റിലെ കണക്കുകളേക്കാൾ മൂന്നിരട്ടിയായി വർദ്ധിച്ച് $940 മില്യൺ ഡോളറിലെത്തിയതായി ധനമന്ത്രി ക്രെയ്ഗ് പാർഡി അറിയിച്ചു. 2025-26 വർഷത്തെ സാമ്പത്തിക അവലോകനം അവതരിപ്പിക്കവെയാണ് മന്ത്രി ഈ ഗൗരവമേറിയ വിവരം പങ്കുവെച്ചത്. പുകയില കേസ് സെറ്റിൽമെന്റിൽ നിന്നുള്ള വരുമാനം ബഡ്ജറ്റിൽ നിന്ന് നീക്കം ചെയ്തതും എണ്ണവിലയിലെ ഇടിവും പ്രധാന കാരണങ്ങളായി മന്ത്രി ചൂണ്ടിക്കാട്ടി.

ഏപ്രിൽ മാസത്തിൽ മുൻ ലിബറൽ ഭരണകൂടം അവതരിപ്പിച്ച 2025-26 ബജറ്റിൽ $372 മില്യൺ ഡോളറായിരുന്നു ധനക്കമ്മി രേഖപ്പെടുത്തിയിരുന്നത്. ഒരു വർഷത്തിനുള്ളിൽ ലഭിക്കേണ്ട $520 മില്യൺ ഡോളർ പുകയില കേസ് സെറ്റിൽമെന്റ് വരുമാനം ബജറ്റിൽ ഉൾപ്പെടുത്തിയതിലൂടെയാണ് കമ്മി ഈ നിലയിൽ എത്തിയത്. എന്നാൽ, മറ്റ് അറ്റ്ലാന്റിക് പ്രവിശ്യകളിൽ നിന്ന് വ്യത്യസ്തമായി ഒരു വർഷത്തെ വരുമാനമായി ഇത് കണക്കാക്കിയതിൽ ലിബറൽ ഭരണകൂടത്തിന് നിയമസഭയിൽ വിമർശനം നേരിടേണ്ടി വന്നിരുന്നു.

ഓഡിറ്റർ ജനറലിന്റെ അഭിപ്രായത്തോട് തങ്ങളുടെ സർക്കാർ യോജിക്കുന്നുവെന്നും ഈ വരുമാനം ഒറ്റവർഷത്തേക്ക് കണക്കുകളിൽ ചേർക്കാൻ പാടില്ലായിരുന്നുവെന്നും ധനമന്ത്രി ക്രെയ്ഗ് പാർഡി വ്യക്തമാക്കി. പുകയില കേസ് സെറ്റിൽമെന്റ് തുക നീക്കം ചെയ്തതോടെ കമ്മി വർധിച്ചതായും അദ്ദേഹം അറിയിച്ചു. ഇതിന് പുറമെ, കുറഞ്ഞ എണ്ണവിലയും ധനക്കമ്മി വർദ്ധനവിന് കാരണമായി. ഏപ്രിൽ ബജറ്റിൽ ബാരലിന് $73 യുഎസ് ഡോളറാണ് എണ്ണവില കണക്കാക്കിയിരുന്നത്. എന്നാൽ, ഡിസംബർ 16-ലെ കണക്കനുസരിച്ച് ഇത് $66 യുഎസ് ഡോളറിലേക്ക് താഴ്ന്നു. എണ്ണവില കുറഞ്ഞതുൾപ്പെടെയുള്ള കാരണങ്ങളാൽ സെപ്റ്റംബറിൽ ലിബറൽ സർക്കാർ ധനക്കമ്മി $626 മില്യണായി പുനർനിർണ്ണയിച്ചിരുന്നു.

പുകയില സെറ്റിൽമെന്റ് ഒഴിവാക്കിയതും എണ്ണവിലയിലെ ഇടിവും കാരണം പ്രവിശ്യയുടെ മൊത്തം വരുമാനത്തിൽ $347 മില്യൺ ഡോളറിന്റെ കുറവുണ്ടായി. കൂടാതെ, ചെലവുകൾ $220.9 മില്യൺ ഡോളറായി ഉയർന്നു. ആരോഗ്യപരിപാലന മേഖലയിലെ പ്രതീക്ഷിച്ചതിലും ഉയർന്ന $430 മില്യൺ ഡോളറിന്റെ ചെലവാണ് വർധനവിന് പ്രധാന കാരണം. വർദ്ധിച്ച ആരോഗ്യ ചെലവുകൾ മുൻ ഭരണകൂടത്തിൽ നിന്ന് ‘കൈമാറി കിട്ടിയ’താണെന്ന് മന്ത്രി ഊന്നിപ്പറഞ്ഞു. ചെലവുകൾ ‘കൂടുതൽ സമർത്ഥമായി’ കൈകാര്യം ചെയ്യുമെന്നും വരുമാനം വർദ്ധിപ്പിക്കാൻ ശ്രമിക്കുമെന്നും മന്ത്രി അറിയിച്ചു. ധനക്കമ്മി കുറയ്ക്കുന്നതിനുള്ള പ്രത്യേക നടപടികൾ 2026-27-ലെ ബഡ്ജറ്റിൽ വെളിപ്പെടുത്തുമെന്നും അദ്ദേഹം കൂട്ടിച്ചേർത്തു.

ധനക്കമ്മിയിലെ വർധനവ് ശ്രദ്ധേയമായ കാര്യമാണെന്ന് മെമ്മോറിയൽ യൂണിവേഴ്സിറ്റിയിലെ ഇക്കണോമിക്സ് വിഭാഗം മേധാവി ലിൻ ഗാംബിൻ പ്രതികരിച്ചു. ദൈനംദിന ആവശ്യങ്ങൾക്കായി പ്രവിശ്യ കടമെടുക്കുന്നതിലെ വർധനവ് ആശങ്കാജനകമാണ്. ഇത് ഭാവിയിൽ കടം വാങ്ങുന്നതിനുള്ള നിരക്കുകൾ വർദ്ധിപ്പിക്കാൻ കാരണമായേക്കാം. ഉയർന്ന ധനക്കമ്മിയുടെ പശ്ചാത്തലത്തിൽ നികുതി കുറയ്ക്കാനുള്ള തിരഞ്ഞെടുപ്പ് വാഗ്ദാനം പാലിക്കുന്നത് സർക്കാരിന് വെല്ലുവിളിയാകുമെന്നും ഗാംബിൻ മുന്നറിയിപ്പ് നൽകി. അതേസമയം, പ്രതിപക്ഷ നേതാവ് ജോൺ ഹോഗൻ, ധനമന്ത്രിയുടെ പ്രഖ്യാപനം വ്യക്തമായ ഉത്തരങ്ങൾ നൽകുന്നതിൽ പരാജയപ്പെട്ടുവെന്ന് വിമർശിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Newfoundland fiscal deficit nears $1 billion: three times higher than April budget