പ്രസവാനന്തര വിഷാദത്തെ പേടിക്കേണ്ട! ആദ്യ ഗുളികയ്ക്ക് ഹെൽത്ത് കാനഡയുടെ അംഗീകാരം!

ടൊറന്റോ: പ്രസവാനന്തര വിഷാദരോഗം (Postpartum Depression – PPD) ചികിത്സിക്കാൻ മാത്രമായി രൂപകൽപ്പന ചെയ്ത ആദ്യത്തെ ഗുളികയ്ക്ക് കാനഡയിൽ അംഗീകാരം ലഭിച്ചു. ‘സുരാനോളോൺ’ (Zuranolone) എന്ന രാസനാമത്തിൽ ‘സുർസുവായ്’ (Zurzuvae) എന്ന ബ്രാൻഡ് നാമത്തിൽ വിപണിയിൽ എത്തുന്ന മരുന്നിനാണ് ഹെൽത്ത് കാനഡ അംഗീകാരം നൽകിയത്.

ഒരു ദിവസം ഒരു ഗുളിക വീതം 14 ദിവസത്തേക്ക് കഴിക്കേണ്ട ഈ മരുന്ന്, വെറും മൂന്ന് ദിവസത്തിനുള്ളിൽ തന്നെ വിഷാദ ലക്ഷണങ്ങളിൽ നിന്ന് ആശ്വാസം നൽകാൻ ശേഷിയുള്ളതാണ്. യു.എസ്, യുകെ, യൂറോപ്യൻ യൂണിയൻ എന്നിവിടങ്ങളിൽ നേരത്തെ അംഗീകാരം ലഭിച്ച മരുന്നാണിത്

ഗർഭകാലത്തും പ്രസവശേഷവും അഞ്ചിൽ ഒരാൾക്ക് വിഷാദമോ ഉത്കണ്ഠാ രോഗമോ ഉണ്ടാകാറുണ്ടെന്നാണ് കണക്കുകൾ. സാധാരണയായി PPD ചികിത്സിക്കാൻ ഉപയോഗിക്കുന്ന എസ്.എസ്.ആർ.ഐ (SSRI) വിഭാഗം ആൻ്റി ഡിപ്രസൻ്റ് മരുന്നുകൾ ഫലം കണ്ടു തുടങ്ങാൻ കൂടുതൽ സമയമെടുക്കുകയും, ദീർഘകാലം ഉപയോഗിക്കേണ്ടിവരുകയും ചെയ്യും. എന്നാൽ സുരാനോളോൺ രണ്ടാഴ്ചത്തെ കോഴ്സ് മാത്രമാണ് ആവശ്യമുള്ളതെന്നും വേഗത്തിൽ ഫലം നൽകുമെന്നതും ഈ മരുന്നിനെ വേറിട്ടു നിർത്തുന്നു.

ഗർഭകാലത്തെ ഹോർമോൺ വ്യതിയാനങ്ങളുമായി ബന്ധപ്പെട്ടാണ് പലപ്പോഴും പ്രസവാനന്തര വിഷാദം ആരംഭിക്കുന്നത്. ഹോർമോണായ പ്രോജസ്റ്ററോണിന്റെ ഒരു ഉപോൽപ്പന്നമായ ‘അല്ലോപ്രെഗ്നാനോളോണിന്റെ’ സിന്തറ്റിക് രൂപമാണ് സുരാനോളോൺ. ഇത് തലച്ചോറിലെ ഗാമാ-അമിനോബ്യൂട്ടറിക് ആസിഡ് (GABA) റിസപ്റ്ററുകളിൽ പ്രവർത്തിച്ച് മാനസികാവസ്ഥയെ നിയന്ത്രിക്കുന്നു.

ആർക്കൊക്കെ ഉപയോഗിക്കാം?

മിതമായതും കഠിനവുമായ പ്രസവാനന്തര വിഷാദരോഗം ഉള്ളവർക്കാണ് ഈ മരുന്ന് ശുപാർശ ചെയ്യുന്നത്. വിഷാദമുള്ള മാനസികാവസ്ഥ, കടുത്ത മാനസികാവസ്ഥാ മാറ്റങ്ങൾ, തീവ്രമായ ഉത്കണ്ഠ അല്ലെങ്കിൽ പരിഭ്രാന്തി, കുഞ്ഞുമായി അടുപ്പം സ്ഥാപിക്കാൻ കഴിയാത്ത അവസ്ഥ, ഉറക്കക്കുറവിനും അപ്പുറമുള്ള കടുത്ത ക്ഷീണം, ചില സന്ദർഭങ്ങളിൽ ജീവിക്കാൻ ആഗ്രഹിക്കാത്ത ചിന്തകൾ തുടങ്ങിയവയെല്ലാം PPD-യുടെ ലക്ഷണങ്ങളാണ്.

ശ്രദ്ധിക്കേണ്ട കാര്യങ്ങൾ:

മരുന്ന് കഴിക്കുമ്പോൾ മയക്കം, തലകറക്കം, തലവേദന തുടങ്ങിയ പാർശ്വഫലങ്ങൾ ഉണ്ടാകാൻ സാധ്യതയുണ്ട്. കൂടാതെ, കുഞ്ഞിന് സുരക്ഷിതമാണെന്ന് തെളിയിക്കുന്ന കൂടുതൽ പഠനങ്ങൾ വരുന്നതുവരെ ഈ മരുന്ന് ഉപയോഗിക്കുമ്പോൾ മുലയൂട്ടരുത് എന്നും ഡോക്ടർമാർ മുന്നറിയിപ്പ് നൽകുന്നു. മരുന്ന് കഴിച്ചു തുടങ്ങുന്ന ആദ്യ ദിവസങ്ങളിൽ കുഞ്ഞിനെ പരിചരിക്കാൻ സഹായത്തിന് ഒരാൾ കൂടെയുണ്ടായിരിക്കുന്നത് ഉചിതമാണ്.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt

Health Canada approves 1st pill to treat postpartum depression