ഫ്രെഡറിക്ടൺ: ന്യൂ ബ്രൺസ്വിക് പ്രവിശ്യാ സർക്കാരിൻ്റെ ഉടമസ്ഥതയിലുള്ള NB Liquor-ന് വേണ്ടി നിർമ്മിച്ച ഒരു പരസ്യ വീഡിയോ വിവാദത്തിൽ. ആർട്ടിഫിഷ്യൽ ഇൻ്റലിജൻസ് (AI) ഉപയോഗിച്ച് സൃഷ്ടിച്ച വീഡിയോ ആണിതെന്ന് അറിഞ്ഞതോടെ കലാകാരന്മാരുടെ സമൂഹത്തിൽ നിന്ന് വലിയ പ്രതിഷേധം ഉയർന്നിരുന്നു. ഇതിന് പിന്നാലെയാണ് സർക്കാർ പരസ്യം പിൻവലിച്ചത്.
ക്രിസ്മസ് ആഘോഷങ്ങളുമായി ബന്ധപ്പെട്ട് ഒരു വീട്ടിലേക്ക് ആളുകൾ മദ്യക്കുപ്പികളുമായി വരുന്ന രംഗങ്ങളാണ് AI ഉപയോഗിച്ച് നിർമ്മിച്ച ഈ വീഡിയോ പരസ്യത്തിൽ ഉണ്ടായിരുന്നത്.എന്നാൽ, പരസ്യത്തിലെ ലൈറ്റിംഗിലെ അസ്വാഭാവികതയും, മദ്യക്കുപ്പികളിലെ ലേബലുകളിലെ എഴുത്തുകൾ വായിക്കാൻ കഴിയാത്ത അവസ്ഥയും കാരണം ഇത് AI നിർമ്മിതമാണെന്ന് കാഴ്ചക്കാർ വേഗത്തിൽ തിരിച്ചറിഞ്ഞു. ന്യൂ ബ്രൺസ്വിക്കിലെ പ്രാദേശിക അഭിനേതാക്കളെയും കലാകാരന്മാരെയും ജോലിക്കെടുക്കുന്നതിന് പകരം AI സാങ്കേതികവിദ്യ ഉപയോഗിച്ച് പരസ്യം ചെയ്തതിനെതിരെ കലാകാരന്മാരുടെ സമൂഹം ശക്തമായ എതിർപ്പുമായി രംഗത്തെത്തി. ഇത് തദ്ദേശീയ കലാകാരന്മാരുടെ അവസരങ്ങളെ ഇല്ലാതാക്കുന്നു എന്ന് അവർ ആരോപിച്ചു.
ആക്ഷേപം ഉയർന്നയുടൻ തന്നെ, NB Liquor-ൻ്റെ ചുമതലയുള്ള മന്ത്രി ലൂക്ക് റാൻഡാൽ പരസ്യം പിൻവലിക്കാൻ നിർദ്ദേശം നൽകി. “ഈ വിഷയത്തിൽ ന്യൂ ബ്രൺസ്വിക് നിവാസികളുടെ അഭിപ്രായങ്ങളെ ഞങ്ങൾ മാനിക്കുന്നു. സാധ്യമാകുന്നിടത്തെല്ലാം ന്യൂ ബ്രൺസ്വിക്കിലെ അഭിനേതാക്കളെ ഉപയോഗിക്കുന്നുണ്ടെന്ന് ഉറപ്പാക്കേണ്ടത് പ്രധാനമാണ്,” മന്ത്രി വ്യക്തമാക്കി.
38,000 ഡോളർ മാത്രം ചെലവുവന്ന ഈ ചെറിയ കാമ്പെയ്നിൻ്റെ ചിലവ് കുറയ്ക്കുന്നതിൻ്റെ ഭാഗമായാണ് AI ഉപയോഗിച്ചത് എന്ന് NB Liquor വക്താവ് ഫ്ലോറൻസ് ഗൗട്ടൺ അറിയിച്ചു. എങ്കിലും, ഈ വിവാദ വീഡിയോ ഇനി പെയ്ഡ് സോഷ്യൽ മീഡിയ പ്ലാറ്റ്ഫോമുകളിലോ മറ്റ് പരസ്യ ചാനലുകളിലോ ഉപയോഗിക്കില്ലെന്നും അവർ വ്യക്തമാക്കി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New Brunswick government pulls AI-generated ad amid backlash from arts community
