ഫിഫ ലോകകപ്പ് നറുക്കെടുപ്പുമായി ബന്ധപ്പെട്ട് കാനഡ പ്രധാനമന്ത്രി മാർക്ക് കാർണി, യു.എസ്. പ്രസിഡന്റ് ഡൊണാൾഡ് ട്രംപ്, മെക്സിക്കൻ പ്രസിഡന്റ് ക്ലൗഡിയ ഷീൻബൗം എന്നിവർ നാളെ വാഷിംഗ്ടൺ ഡി.സി.യിൽ കൂടിക്കാഴ്ച നടത്തും. ലോകകപ്പിന്റെ ഒരുക്കങ്ങൾക്കായുള്ള സൗഹൃദപരമായ ഒത്തുചേരൽ എന്നതിലുപരിയായി, നിലവിലെ വ്യാപാര തർക്കങ്ങളും പ്രധാനമായും ചർച്ചാവിഷയമാകും. മൂന്ന് രാജ്യങ്ങൾ സംയുക്തമായി ആതിഥേയത്വം വഹിക്കുന്ന ലോകകപ്പിന്റെ നറുക്കെടുപ്പിലാണ് നേതാക്കൾ ഒരുമിക്കുന്നത്. ഇതിനിടയിൽ, കാർണി ട്രംപുമായും ഷീൻബൗമുമായും പ്രത്യേകമായി ചർച്ചകൾ നടത്തുമെന്ന് പ്രധാനമന്ത്രിയുടെ ഓഫീസ് അറിയിച്ചു. ഷീൻബൗം യു.എസ്. പ്രസിഡന്റുമായും സ്വകാര്യ ചർച്ചകൾ നടത്തും.
കാനഡയും യു.എസും തമ്മിൽ നിലനിൽക്കുന്ന തീരുവ യുദ്ധത്തിന്റെ (Tariff Trade War) പശ്ചാത്തലത്തിൽ ഈ കൂടിക്കാഴ്ചക്ക് വലിയ രാഷ്ട്രീയ പ്രാധാന്യമുണ്ട്. ഒന്റാരിയോ സർക്കാർ പുറത്തിറക്കിയ തീരുവകളെ വിമർശിക്കുന്ന പരസ്യത്തെ ചൊല്ലി ഒക്ടോബറിൽ ട്രംപ് കാനഡയുമായുള്ള വ്യാപാര ചർച്ചകൾ നിർത്തിവച്ചിരുന്നു. പരസ്യത്തിൽ മുൻ പ്രസിഡന്റ് റൊണാൾഡ് റീഗനെ ഉപയോഗിച്ചതിൽ ട്രംപ് അതൃപ്തി രേഖപ്പെടുത്തി. തുടർന്ന് പ്രധാനമന്ത്രി കാർണി ക്ഷമ ചോദിക്കുകയും ചർച്ചകൾ പുനരാരംഭിക്കാൻ തയ്യാറാണെന്ന് അറിയിക്കുകയും ചെയ്തിരുന്നു. എന്നാൽ, പുതുവർഷത്തിനു മുമ്പ് ഒരു കരാറുണ്ടാകാൻ സാധ്യതയില്ലെന്നാണ് കാനഡയിലെ യു.എസ്. അംബാസഡർ പീറ്റ് ഹോക്സ്ട്രേ സൂചിപ്പിച്ചത്. കാനഡ-യു.എസ്-മെക്സിക്കോ ഉടമ്പടി (CUSMA) ആറു വർഷത്തിന് ശേഷം നിർബന്ധിതമായി പുനഃപരിശോധിക്കാനുള്ള കാലാവധി അടുത്തിരിക്കെ ട്രംപിന്റെ പുതിയ പരാമർശങ്ങൾ അന്തരീക്ഷം കലുഷിതമാക്കി. ഉടമ്പടി കാലഹരണപ്പെടാൻ ഒരു വർഷം മാത്രം അവശേഷിക്കെ, കരാർ “ഒന്നുകിൽ കാലഹരണപ്പെടാൻ അനുവദിക്കുകയോ അല്ലെങ്കിൽ മെക്സിക്കോയുമായും കാനഡയുമായും മറ്റൊരു കരാർ ഉണ്ടാക്കുകയോ” ചെയ്യുമെന്ന് ട്രംപ് പറഞ്ഞിരുന്നു.
ഈ സന്ദർശനത്തിന് മുന്നോടിയായി, കനേഡിയൻ പ്രധാനമന്ത്രി കാർണി സെപ്റ്റംബറിൽ മെക്സിക്കോ സിറ്റിയിൽ ഷീൻബൗമുമായി കൂടിക്കാഴ്ച നടത്തിയിരുന്നു. ട്രംപിന്റെ തീരുവ ഭീഷണികൾക്കിടയിലും പരസ്പര ബന്ധം ശക്തിപ്പെടുത്താൻ ഇരു നേതാക്കളും അന്ന് പ്രതിജ്ഞയെടുത്തിരുന്നു. അതേസമയം, മൂന്ന് രാജ്യങ്ങളും തമ്മിലുള്ള സ്വതന്ത്ര വ്യാപാര കരാറിന്റെ പുനരവലോകനത്തെക്കുറിച്ചുള്ള വാദം കേൾക്കൽ വാഷിംഗ്ടണിൽ തുടരുകയാണ്. ഉടമ്പടി പ്രകാരം, കരാർ 16 വർഷത്തിന് ശേഷം അവസാനിക്കും, എന്നാൽ ഒരു രാജ്യത്തിന് ആറ് മാസത്തെ നോട്ടീസ് നൽകി കരാറിൽ നിന്ന് പിന്മാറാൻ സാധിക്കും. നിലവിലെ തർക്കങ്ങൾക്കിടയിലും, കരാറിന്റെ പരിധിയിൽ വരുന്ന ചരക്കുകൾക്ക് ട്രംപിന്റെ തീരുവകളിൽ നിന്ന് കാനഡയ്ക്കും മെക്സിക്കോയ്ക്കും ഇളവ് ലഭിക്കുന്നുണ്ട്.
ട്രംപും ഷീൻബൗമുമായുള്ള ആദ്യ മുഖാമുഖമാണിത്. ലോകകപ്പ് നറുക്കെടുപ്പ് വേദിയിൽ ചുരുങ്ങിയ സമയത്തേക്കുള്ള അനൗപചാരിക കൂടിക്കാഴ്ചകൾ മാത്രമാണ് പ്രതീക്ഷിക്കുന്നതെങ്കിലും, ട്രംപും കാർണിയുമായുള്ള ബന്ധത്തിലെ വിള്ളൽ നികത്താനും വ്യാപാര ചർച്ചകൾക്ക് ഒരു വഴി തുറക്കാനും ഈ അവസരം കാർണി ഉപയോഗിക്കുമോ എന്ന് രാഷ്ട്രീയ നിരീക്ഷകർ ഉറ്റുനോക്കുന്നു. നയതന്ത്ര തലത്തിൽ ഒരു വഴിത്തിരിവ് ഉണ്ടാകാനുള്ള സാധ്യതകൾ കുറവാണെങ്കിൽ പോലും, മൂന്ന് നോർത്ത് അമേരിക്കൻ രാജ്യങ്ങൾ തമ്മിലുള്ള ബന്ധം സുദൃഢമാക്കാനുള്ള ഒരു സൗഹൃദപരമായ വേദി എന്ന നിലയിൽ ഈ ഒത്തുചേരൽ പ്രാധാന്യമർഹിക്കുന്നു.
