മോൺട്രിയൽ: ക്യുബെക്കിലെ പുതിയ സർക്കാർ അവതരിപ്പിച്ച ബിൽ 7, പ്രവശ്യയിലെ ഭരണപരമായ കാര്യക്ഷമത വർദ്ധിപ്പിക്കാൻ ലക്ഷ്യമിടുമ്പോഴും, കാലാവസ്ഥാ വ്യതിയാനത്തിനെതിരായ പ്രവിശ്യയുടെ പ്രതിബദ്ധതയെക്കുറിച്ച് വലിയ ചോദ്യങ്ങളുയർത്തുകയാണ്. ഏകദേശം $1.8 ബില്യൺ മിച്ചമുള്ള, കാലാവസ്ഥാ പ്രവർത്തനങ്ങൾക്കായി മാത്രം നീക്കിവച്ച ‘ഗ്രീൻ ഫണ്ടി’ന്റെ (Fonds d’électrification et de changements climatiques – FECC) തുക, പ്രവിശ്യയുടെ കടം വീട്ടാനും റോഡ് ശൃംഖലയുടെ വികസനത്തിനും അല്ലെങ്കിൽ പെട്രോളിന്റെ നികുതി കുറയ്ക്കാനും ഉപയോഗിക്കാൻ ധനമന്ത്രിക്ക് അധികാരം നൽകുന്നതാണ് ഈ ബിൽ. ഇത് കാർബൺ വിപണിയിലൂടെ (cap-and-trade system) ലഭിക്കുന്ന തുക കാലാവസ്ഥ ലക്ഷ്യങ്ങളിൽ നിന്ന് വ്യതിചലിക്കുന്നതിന് കാരണമാകുമെന്ന ഭയം പാരിസ്ഥിതിക ഗ്രൂപ്പുകളിലും പ്രതിപക്ഷ പാർട്ടികളിലും ശക്തമാക്കിയിട്ടുണ്ട്.
ഗ്രീൻ ഫണ്ടിന്റെ മിച്ചം പൂർണ്ണമായും പ്രവിശ്യയുടെ കടം വീട്ടുന്നതിനുള്ള ‘ജനറേഷൻസ് ഫണ്ടിലേക്ക്’ മാറ്റുമെന്നാണ് ധനകാര്യ മന്ത്രിയുടെ ഓഫീസ് അറിയിച്ചിരിക്കുന്നത്. ഇത് ‘അന്തർതലമുറ സമത്വം’ (intergenerational equity) ഉറപ്പാക്കാൻ സഹായിക്കുമെന്നാണ് അവരുടെ വാദം. എന്നാൽ, കാലാവസ്ഥാ പ്രതിസന്ധിയുടെ പശ്ചാത്തലത്തിൽ, ഫണ്ട് വകമാറ്റുന്നത് “തികച്ചും നിരുത്തരവാദിത്തപരമാണെ”ന്ന് ക്യുബെക്ക് സോളിഡയർ (Québec Solidaire) പോലുള്ള പ്രതിപക്ഷ പാർട്ടികൾ വിമർശിച്ചു. മാത്രമല്ല, കാർബൺ നികുതിയുടെ ഉയർന്ന ഇന്ധനവില ചെറുകിട ബിസിനസ്സുകൾക്ക് പ്രയാസമുണ്ടാക്കുന്നുവെന്ന കനേഡിയൻ ഫെഡറേഷൻ ഓഫ് ഇൻഡിപെൻഡന്റ് ബിസിനസിന്റെ (CFIB) വാദം പരിഗണിച്ച്, ഗ്രീൻ ഫണ്ട് ഉപയോഗിച്ച് ഇന്ധന വില കുറയ്ക്കുന്നത്, ഫോസിൽ ഇന്ധനങ്ങളുടെ ഉപഭോഗം കുറയ്ക്കുന്നതിനുള്ള അടിസ്ഥാന ലക്ഷ്യത്തിന് വിരുദ്ധമാകുമെന്ന് സാമ്പത്തിക വിദഗ്ദ്ധരും അഭിപ്രായപ്പെട്ടു.
നിലവിൽ, ക്യുബെക്ക് അതിന്റെ ഹരിതഗൃഹ വാതക ബഹിർഗമനം 1990-ലെ നിലവാരത്തേക്കാൾ 37.5 ശതമാനം കുറയ്ക്കുക എന്ന 2030 ലക്ഷ്യം കൈവരിക്കുന്നതിൽ പിന്നിലാണെന്ന റിപ്പോർട്ടുകൾക്കിടയിലാണ് ഫണ്ട് വകമാറ്റാനുള്ള നീക്കം. മിച്ചം ഉണ്ടായിട്ടും കാലാവസ്ഥാ പദ്ധതികൾക്ക് ഫണ്ട് ഉപയോഗിക്കാത്തത് ആശങ്കയുണ്ടാക്കുന്നുവെന്ന് പരിസ്ഥിതി ഗ്രൂപ്പുകൾ ചൂണ്ടിക്കാട്ടുന്നു. അതേസമയം, ക്യുബെക്കിന്റെ സ്വതന്ത്ര കാലാവസ്ഥാ ഉപദേശക സമിതി 2030 ലക്ഷ്യം നിലനിർത്തുകയോ വർദ്ധിപ്പിക്കുകയോ ചെയ്യണമെന്ന് ശുപാർശ ചെയ്യുന്ന റിപ്പോർട്ട് ഈ ആഴ്ച പുറത്തുവിട്ടിട്ടുണ്ട്. ഈ ബിൽ പാസായാൽ, ക്യുബെക്കിന്റെ ഭാവിയിലെ കാലാവസ്ഥാ നയരൂപീകരണത്തിൽ വലിയ സ്വാധീനം ചെലുത്താൻ സാധ്യതയുണ്ടെന്നാണ് വിദഗ്ധർ പറയുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
'To pay off $1.8 billion climate fund debt'; What is Quebec doing? Bill 7 in huge controversy!
