ഒന്റാരിയോ : പ്രതിഷേധങ്ങൾക്കിടയിലും കാനഡയിലെ നയാഗ്ര വെള്ളച്ചാട്ടത്തിനടുത്തുള്ള മറൈൻലാൻഡ് അമ്യൂസ്മെന്റ് പാർക്കിൽ ശേഷിക്കുന്ന 30 ബെലൂഗ തിമിംഗലങ്ങൾക്ക് “ഏറ്റവും നല്ല ജീവിതം” ഉറപ്പാക്കാൻ ഒന്റാറിയോ “എന്തും ചെയ്യുമെന്ന്” പ്രീമിയർ ഡഗ് ഫോർഡ് പ്രഖ്യാപിച്ചു. തിങ്കളാഴ്ച നടന്ന വാർത്താസമ്മേളനത്തിലാണ് ഫോർഡ് ഇക്കാര്യം വ്യക്തമാക്കിയത്. ശേഷിക്കുന്ന തിമിംഗലങ്ങളെ കയറ്റി അയക്കാൻ പാർക്ക് ഒട്ടാവയോട് അനുമതി തേടിയിട്ടുണ്ടെന്ന് ഫെഡറൽ ഉദ്യോഗസ്ഥൻ നേരത്തെ സ്ഥിരീകരിച്ചിരുന്നു. ബെലൂഗകളുടെ ആരോഗ്യത്തെക്കുറിച്ചുള്ള ആശങ്കകൾ വർദ്ധിക്കുന്നതിനിടെയാണ് ഈ നീക്കം. തങ്ങളുടെ തീരുമാനം തിമിംഗലങ്ങളുടെ ആരോഗ്യത്തെ ആശ്രയിച്ചായിരിക്കുമെന്ന് ഫിഷറീസ് മന്ത്രി ജോവാൻ തോംസൺ ചൊവ്വാഴ്ച പറഞ്ഞിരുന്നു. എന്നിരുന്നാലും, ഇതുവരെ അന്തിമ തീരുമാനം എടുത്തിട്ടില്ലെന്ന് ഫിഷറീസ് ആൻഡ് ഓഷ്യൻസ് ഡിപ്പാർട്ട്മെന്റ് (DFO) വ്യാഴാഴ്ച അറിയിച്ചു.
തിമിംഗലങ്ങളുടെ സംരക്ഷണവും ആരോഗ്യവും വർഷങ്ങളായി കാനഡയിൽ വലിയ ചർച്ചാവിഷയമാണ്. ഈ സീസണിൽ തുറക്കാതിരുന്ന മറൈൻലാൻഡിൽ സംസ്ഥാനം പതിവായി പരിശോധനകൾ നടത്തുന്നുണ്ടെന്ന് ഫോർഡ് പറഞ്ഞു. “അവർ ഈ തിമിംഗലങ്ങളെ പരിപാലിക്കേണ്ടതുണ്ട്. എനിക്ക് അവയോട് സഹതാപമുണ്ട്. ഫെഡറൽ സർക്കാർ അംഗീകരിക്കുകയാണെങ്കിൽ, ഈ തിമിംഗലങ്ങൾക്ക് മനോഹരമായ ഒരു പുതിയ വീട് കണ്ടെത്തണം. അവിടുത്തെ അവസ്ഥ ഭയങ്കരമാണ്. അവയെ ബന്ധിയാക്കിയിരിക്കുകയാണ്… അവർക്ക് ഏറ്റവും നല്ല ജീവിതം നൽകാൻ ഞങ്ങൾ എന്തും ചെയ്യും.” ഫോർഡ് വ്യക്തമാക്കി. 2019 മുതൽ 19 ബെലൂഗകളാണ് മറൈൻലാൻഡിൽ ചത്തുപോയത്. അവസാനത്തെ ഓർക്കയായ കിസ്ക 2023-ലും ചത്തു. COVID-19 അടച്ചുപൂട്ടലുകൾ ഒഴിച്ചുനിർത്തിയാൽ, 60 വർഷത്തെ ചരിത്രത്തിൽ ആദ്യമായിട്ടാണ് മറൈൻലാൻഡ് ഈ വർഷം തുറക്കാതിരുന്നത്. ഇതോടെ, ശേഷിക്കുന്നവയുടെ ഭാവിയെക്കുറിച്ച് ആശങ്കകൾ ഉയർന്നിരുന്നു.
അതിനിടെ, ബെലൂഗകളെ കയറ്റി അയക്കുന്നതിലെ കാലതാമസം തുടർച്ചയായ അവഗണനയ്ക്കും ദുരുപയോഗത്തിനും തുല്യമാണെന്ന് ഒന്റാറിയോ ഗ്രീൻ പാർട്ടി നേതാവ് മൈക്ക് ഷ്രൈനർ അഭിപ്രായപ്പെട്ടു. മറൈൻലാൻഡിനും വിദഗ്ദ്ധർക്കുമൊപ്പം ചേർന്ന് തിമിംഗലങ്ങളുടെ ആരോഗ്യത്തിനായി ഒരു കർമ്മ പദ്ധതി തയ്യാറാക്കാൻ അദ്ദേഹം ഫോർഡിനോട് ആവശ്യപ്പെട്ടു. തിമിംഗലങ്ങളെ വിനോദത്തിനായി ചൂഷണം ചെയ്യാത്ത സുരക്ഷിതമായ ഒരു കടൽ തീരത്തെ സങ്കേതത്തിലേക്ക് മാറ്റണമെന്നും ഷ്രൈനർ ആവശ്യപ്പെട്ടു. ലോകത്തിലെ ഏറ്റവും വലിയ മറൈൻ തീം പാർക്കുകളിലൊന്നായ ചൈനയിലെ ചിമെലോംഗ് ഓഷ്യൻ കിംഗ്ഡം, ബെലൂഗകളെ വാങ്ങുന്നത് പരിഗണിക്കുന്നതായി പറഞ്ഞിട്ടുണ്ട്. തിമിംഗലങ്ങൾക്ക് യാത്ര ചെയ്യാൻ കഴിയുമോയെന്ന് നിർണ്ണയിക്കുന്നതിൽ അവയുടെ ആരോഗ്യം ഒരു പ്രധാന ഘടകമായിരിക്കുമെന്ന് മറൈൻ സസ്തനി ഗവേഷണ യൂണിറ്റ് ഡയറക്ടർ ഡോ. ആൻഡ്രൂ ട്രൈറ്റ്സ് വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
Poor health: The journey of 30 belugas is now in the hands of the government
