കനേഡിയൻ കുടുംബങ്ങൾക്ക് തിരിച്ചടിയായി താരിഫ് വർധന; ബജറ്റ് നിയന്ത്രിക്കാൻ ശ്രദ്ധിക്കേണ്ട കാര്യങ്ങൾ

ടൊറന്റോ: ഇറക്കുമതി ചെയ്യുന്ന സാധനങ്ങളുടെ താരിഫ് വർധന കച്ചവട സ്ഥാപനങ്ങളെ മാത്രമല്ല, കനേഡിയൻ കുടുംബങ്ങളുടെ ദൈനംദിന ബജറ്റിനെയും നേരിട്ട് ബാധിക്കുമെന്ന മുന്നറിയിപ്പുമായി സാമ്പത്തിക വിദഗ്ധർ. താരിഫ് നിരക്കുകളിലുണ്ടാകുന്ന മാറ്റങ്ങൾ ദൈനംദിന ഉപയോഗ സാധനങ്ങളായ പലവ്യഞ്ജനങ്ങൾ, ഗാർഹിക ഉത്പന്നങ്ങൾ എന്നിവയുടെ വില വർദ്ധിപ്പിക്കാൻ കാരണമാകും. ഈ സാഹചര്യത്തിൽ വില വർധനവ് നേരിടാൻ ഉപഭോക്താക്കൾക്ക് ചില പ്രായോഗിക ബജറ്റ് മാർഗങ്ങൾ നിർദ്ദേശിക്കുകയാണ് വിദഗ്ധനായ ക്രിസ്റ്റഫർ ല്യൂ.

മറ്റു രാജ്യങ്ങളിൽ നിന്ന് കാനഡയിലേക്ക് ഇറക്കുമതി ചെയ്യുന്ന സാധനങ്ങൾക്ക് സർക്കാർ ചുമത്തുന്ന ഒരുതരം നികുതിയാണ് താരിഫ്. കനേഡിയൻ അതിർത്തി സേവന ഏജൻസിക്ക് (സിബിഎസ്എ) താരിഫ് തുക അടച്ചതിന് ശേഷം മാത്രമേ കമ്പനികൾക്ക് ഇറക്കുമതി ചെയ്യുന്ന സാധനങ്ങൾ കസ്റ്റംസിൽ നിന്ന് പുറത്തിറക്കാൻ സാധിക്കൂ. താരിഫ് ചുമത്തുന്നത് ഇറക്കുമതി ചെയ്യുന്ന കമ്പനിയാണെങ്കിലും, ഈ അധിക ചെലവ് ഉപഭോക്താക്കളിലേക്കാണ് കൈമാറുന്നത്. ഇത് സാധനങ്ങളുടെ വില വർധനവിന് കാരണമാവുകയും സാമ്പത്തിക ബാധ്യത ഉപഭോക്താക്കളിൽ എത്തുകയും ചെയ്യുന്നു.

താരിഫ് വർധനവ് കാരണം കനേഡിയൻ ഉത്പന്നങ്ങൾക്ക് അമേരിക്കയിലടക്കം ഉയർന്ന വില നൽകേണ്ടി വരുന്നത് വിൽപ്പന കുറയാൻ കാരണമാകും. ഇതോടെ വിദേശ കമ്പനികൾ കുറഞ്ഞ താരിഫുള്ള രാജ്യങ്ങളെ ആശ്രയിച്ചേക്കാം. കനേഡിയൻ ഉത്പന്നങ്ങളുടെ ആവശ്യം കുറയുന്നത് ചില നിർമ്മാതാക്കളെ തൊഴിൽ ശക്തി കുറയ്ക്കാൻ നിർബന്ധിതരാക്കിയേക്കാം. ഇത് രാജ്യത്തെ തൊഴിലില്ലായ്മയിലേക്കും നയിച്ചേക്കാമെന്നും സാമ്പത്തിക വിദഗ്ധർ മുന്നറിയിപ്പ് നൽകുന്നു.

താരിഫ് വർധനവിനനുസരിച്ച് ബജറ്റിൽ മാറ്റങ്ങൾ വരുത്തേണ്ടത് അത്യാവശ്യമാണ്. ഇതിനായി സ്ഥിരമായി വാങ്ങുന്ന ഇറക്കുമതി ഉത്പന്നങ്ങളുടെ ഒരു പട്ടിക തയ്യാറാക്കുക. വസ്ത്രങ്ങൾ, ചെറിയ ഉപകരണങ്ങൾ, ഇറക്കുമതി ചെയ്ത ഭക്ഷണ സാധനങ്ങൾ എന്നിവ ഇതിൽ ഉൾപ്പെടുത്താം. ഈ സാധനങ്ങളുടെ വില വർഷത്തിൽ ഒരു തവണയെങ്കിലും ‘കാനഡ താരിഫ് ഫൈൻഡർ’ പോലുള്ള ടൂളുകൾ ഉപയോഗിച്ച് ട്രാക്ക് ചെയ്യാം. വിലവർധനവ് നേരിടാൻ പ്രതിമാസ ബജറ്റിൽ ഒരു ചെറിയ തുക നീക്കിവയ്ക്കുന്നത് ബുദ്ധിപരമായ നീക്കമാകും.

വില വർധിക്കുന്ന ഈ സാഹചര്യത്തിൽ സ്മാർട്ടായി സാധനങ്ങൾ വാങ്ങുന്നതിലൂടെ പണം ലാഭിക്കാം. ലോയൽറ്റി പ്രോഗ്രാമുകൾ, ക്യാഷ്ബാക്ക് റിവാർഡുകൾ, കൂപ്പണുകൾ എന്നിവ പരമാവധി പ്രയോജനപ്പെടുത്തുക. വലിയ അളവിൽ സാധനങ്ങൾ മൊത്തമായി വാങ്ങുന്നതും ചെലവ് കുറഞ്ഞ പ്രാദേശിക ഉത്പന്നങ്ങളിലേക്ക് മാറുന്നതും സാമ്പത്തിക ഭാരം കുറയ്ക്കാൻ സഹായിക്കും. താരിഫും അതിൻ്റെ സാമ്പത്തിക പ്രത്യാഘാതങ്ങളും നമ്മുടെ നിയന്ത്രണത്തിലല്ലെങ്കിലും, ബജറ്റ് നിയന്ത്രിച്ച് മുന്നോട്ട് പോകാൻ ഈ മാർഗ്ഗങ്ങൾ സഹായിക്കും. ഉത്പന്നങ്ങളിൽ മാറ്റം വരുത്തുകയോ, വില കുറയുമ്പോൾ മാത്രം സാധനങ്ങൾ വാങ്ങാൻ ശ്രമിക്കുകയോ ചെയ്യുന്നത് സാമ്പത്തികമായി സുരക്ഷിതമായിരിക്കാൻ സഹായകമാകും.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82