മോൺട്രിയൽ; മോൺട്രിയലിൽ പുതിയ ഫ്രഞ്ച് ഭാഷാ നിയമങ്ങൾക്കെതിരെ ഇംഗ്ലീഷ് സംസാരിക്കുന്നവരുടെ കൂട്ടായ്മയായ TALQ രംഗത്ത്. നഗരത്തിലെ സർക്കാർ സേവനങ്ങൾക്കായി എത്തുന്നവരോട് ഫ്രഞ്ചിൽ മാത്രം സംസാരിക്കണമെന്ന് നിർദ്ദേശിക്കുന്ന പുതിയ നയം റദ്ദാക്കണമെന്നാണ് ഇവരുടെ ആവശ്യം. ഈ നിയമം ഇംഗ്ലീഷ് സംസാരിക്കുന്നവരുടെ അവകാശങ്ങൾ ലംഘിക്കുന്നതാണെന്ന് അവർ ചൂണ്ടിക്കാട്ടുന്നു. നവംബർ രണ്ടിന് നടക്കുന്ന മേയർ തിരഞ്ഞെടുപ്പിൽ ഇത് ഒരു പ്രധാന വിഷയമാകുമെന്നും TALQ മുന്നറിയിപ്പ് നൽകി.
കഴിഞ്ഞ കുറച്ചു മാസങ്ങൾക്കിടെയാണ് നഗരസഭ ഈ പുതിയ നിയമങ്ങൾ നടപ്പിലാക്കിയത്. ഇതിന്റെ ഭാഗമായി ജീവനക്കാർക്ക് ചില നിർദ്ദേശങ്ങൾ നൽകിയിട്ടുണ്ട്. ആരെങ്കിലും ഇംഗ്ലീഷിൽ സംസാരിച്ചാൽ പോലും ആദ്യം ഫ്രഞ്ചിൽ മറുപടി നൽകണം. ഇംഗ്ലീഷ് ഭാഷാ ലംഘനങ്ങൾ ശ്രദ്ധയിൽപ്പെട്ടാൽ അത് റിപ്പോർട്ട് ചെയ്യാനും നിർദ്ദേശമുണ്ട്. ചില പൗരന്മാർക്ക് ഇംഗ്ലീഷിൽ വിവരങ്ങൾ അറിയാൻ നിയമപരമായി അവകാശമുണ്ടെങ്കിൽ പോലും ഫ്രഞ്ച് നിർബന്ധമാക്കുന്നുണ്ട്. ഇത് ശരിയായ രീതിയല്ലെന്ന് TALQ പറയുന്നു.
ഈ നിയമങ്ങൾ ഇംഗ്ലീഷ് സംസാരിക്കുന്നവരെ മോൺട്രിയലിൽ നിന്ന് അകറ്റാൻ ശ്രമിക്കുന്നതിന് തുല്യമാണ്. എല്ലാവർക്കും അവരവരുടെ ഭാഷയിൽ സേവനം ലഭിക്കാൻ അവകാശമുണ്ട്. ജീവനക്കാർക്ക് സ്വന്തമായി കാര്യങ്ങൾ തീരുമാനിക്കാൻ അവസരം നൽകണം. ജനങ്ങൾക്ക് ആവശ്യമായ സേവനങ്ങൾ വേഗത്തിൽ നൽകാൻ അവരെ അനുവദിക്കണം. അല്ലാതെ നിയമലംഘനങ്ങൾ റിപ്പോർട്ട് ചെയ്യാൻ അവരോട് ആവശ്യപ്പെടുന്നത് തെറ്റാണ്, ഇത് ജീവനക്കാർക്കും പൊതുജനങ്ങൾക്കും ഇടയിൽ ഭയവും സംശയവും ഉണ്ടാക്കുന്നു. TALQ പ്രസിഡന്റ് ഈവ ലുഡ്വിഗ് പറഞ്ഞു.
പ്രധാനമന്ത്രി ഫ്രാങ്കോയിസ് ലെഗോൾട്ടിന്റെ സർക്കാർ 2022-ൽ പാസാക്കിയ ബിൽ 96 എന്ന നിയമമാണ് ഇത്തരം പുതിയ നടപടികൾക്ക് പിന്നിൽ. ഫ്രഞ്ച് ഭാഷയെ സംരക്ഷിക്കുക എന്നതാണ് ഈ നിയമത്തിന്റെ ലക്ഷ്യം. എന്നാൽ ഇത് ഇംഗ്ലീഷ് സംസാരിക്കുന്നവരുടെ അവകാശങ്ങൾ ഇല്ലാതാക്കുന്നുവെന്നാണ് TALQ ഉൾപ്പെടെയുള്ള ഇംഗ്ലീഷ് ഗ്രൂപ്പുകളുടെ പ്രധാന ആരോപണം. ഈ നിയമത്തിനെതിരെ പല കോടതി കേസുകളും നിലവിലുണ്ട്.
ബിൽ 96 ന്റെ ഫലമായി പല പ്രശ്നങ്ങളും ഇതിനോടകം ഉണ്ടായിട്ടുണ്ട്. ഒരു മുനിസിപ്പൽ ലൈബ്രറിയിൽ ഇംഗ്ലീഷ് പുസ്തക ക്ലബ്ബിന് സ്ഥലം നിഷേധിച്ചത് വലിയ വിവാദമായിരുന്നു.പിന്നീട് ഈ തീരുമാനം പിൻവലിച്ചു. ബസുകളിലെ സന്ദേശങ്ങളിൽ നിന്ന് “Go” എന്ന വാക്ക് ഒഴിവാക്കിയതും ഒരു പബ്ബിലെ പേര് മാറ്റാൻ ആവശ്യപ്പെട്ടതും ഇതിന്റെ ഭാഗമായുണ്ടായ മറ്റ് പ്രശ്നങ്ങളാണ്. ഈ നിയമം ഇംഗ്ലീഷ് സംസാരിക്കുന്നവരെ മാത്രമല്ല, ഫ്രഞ്ച് സംസാരിക്കുന്നവരെയും ബുദ്ധിമുട്ടിക്കുന്നുണ്ടെന്ന് TALQ ചൂണ്ടിക്കാട്ടുന്നു.
ഇതിനുദാഹരണമായി, സഗ്വേണെ മേഖലയിലെ ഒരു കളിപ്പാട്ടക്കടയുടെ പ്രശ്നം അവർ എടുത്തുപറഞ്ഞു. കളിപ്പാട്ടങ്ങളുടെ പെട്ടിയിൽ ഫ്രഞ്ച് വിവരങ്ങൾ കുറവാണെന്ന് ആരോപിച്ച് കടക്ക് നോട്ടീസ് ലഭിച്ചു. തുടർന്ന് കളിപ്പാട്ടങ്ങളുടെ വിവരങ്ങൾ ഫ്രഞ്ചിലേക്ക് വിവർത്തനം ചെയ്ത് പെട്ടിയിൽ ഒട്ടിക്കേണ്ടിവന്നു. ഇത് വലിയ സമയവും പണവും ചെലവാക്കുന്ന പ്രവൃത്തിയാണെന്ന് കടയുടമ പറഞ്ഞു. ഇംഗ്ലീഷ് സംസാരിക്കുന്നവർ ക്യൂബെക്കിന്റെ വളർച്ചയ്ക്ക് വലിയ സംഭാവനകൾ നൽകിയിട്ടുണ്ടെന്നും അവരെ അകറ്റി നിർത്തുന്നത് ശരിയല്ലെന്നും TALQ കൂട്ടിച്ചേർത്തു.
No French, just English!; Protest against Montreal's language policy
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
