ലുലു ഗ്രൂപ്പ് ചെയർമാൻ എം.എ. യൂസഫലിയെ പിന്നിലാക്കി ജോയ് ആലുക്കാസ് ഗ്രൂപ്പ് ചെയർമാൻ ജോയ് ആലുക്കാസ് ഏറ്റവും സമ്പന്നനായ മലയാളിയായി. ഫോബ്സ് പുറത്തുവിട്ട റിയൽ ടൈം ബില്യണയർ പട്ടിക അനുസരിച്ച്, 6.7 ബില്യൺ ഡോളർ (ഏകദേശം 59,000 കോടി രൂപ) ആസ്തിയുമായി പട്ടികയിൽ 563-ാം സ്ഥാനത്താണ് അദ്ദേഹം. കഴിഞ്ഞ കുറേ വർഷങ്ങളായി ഈ പട്ടികയിൽ ഒന്നാം സ്ഥാനത്തുണ്ടായിരുന്ന എം.എ. യൂസഫലി ഇതോടെ രണ്ടാം സ്ഥാനത്തേക്ക് പിന്തള്ളപ്പെട്ടു. അതേസമയം, ഇന്ത്യയിലെ അതിസമ്പന്നരിൽ റിലയൻസ് ഇൻഡസ്ട്രീസ് മേധാവി മുകേഷ് അംബാനി ഒന്നാം സ്ഥാനവും, അദാനി ഗ്രൂപ്പ് ചെയർമാൻ ഗൗതം അദാനി രണ്ടാം സ്ഥാനവും നിലനിർത്തി.
എം.എ. യൂസഫലിയുടെ ആസ്തി 5.4 ബില്യൺ ഡോളർ (ഏകദേശം 47,500 കോടി രൂപ) ആണ്, ഫോബ്സ് പട്ടികയിൽ അദ്ദേഹത്തിന്റെ സ്ഥാനം 743 ആണ്. ഏറ്റവും സമ്പന്നരായ മലയാളികളുടെ പട്ടികയിൽ ജെംസ് എജ്യുക്കേഷൻ ചെയർമാൻ സണ്ണി വർക്കിയാണ് മൂന്നാം സ്ഥാനത്തുള്ളത്. 4 ബില്യൺ ഡോളർ ആസ്തിയുള്ള അദ്ദേഹത്തിന്റെ ഫോബ്സ് റാങ്ക് 998 ആണ്. കൂടാതെ രവി പിള്ള (ആർ.പി. ഗ്രൂപ്പ്), ടി.എസ്. കല്യാണരാമൻ (കല്യാൺ ജ്വല്ലേഴ്സ്), എസ്. ഗോപാലകൃഷ്ണൻ (ഇൻഫോസിസ്), എസ്.ഡി. ഷിബുലാൽ (ഇൻഫോസിസ്) തുടങ്ങിയ പ്രമുഖ മലയാളികളും പട്ടികയിൽ ഇടംപിടിച്ചിട്ടുണ്ട്.
ലോകത്തിലെ അതിസമ്പന്നരുടെ പട്ടികയിൽ ടെസ്ല മേധാവി ഇലോൺ മസ്ക് 400 ബില്യൺ ഡോളർ ആസ്തിയുമായി ഒന്നാം സ്ഥാനത്തും, ഒറാക്കിൾ സ്ഥാപകൻ ലാറി എലിസൺ 287 ബില്യൺ ഡോളറുമായി രണ്ടാം സ്ഥാനത്തുമാണ്. ഈ പട്ടികയിലെ സ്ഥാനങ്ങൾ ദിനംപ്രതി മാറിക്കൊണ്ടിരിക്കാറുണ്ട്. ഈ ആസ്തി കണക്കുകൾ ഫോബ്സ്, ബ്ലൂംബർഗ് തുടങ്ങിയ സ്ഥാപനങ്ങൾ അപ്പപ്പോൾ ലഭ്യമാക്കുന്ന വിവരങ്ങളെ അടിസ്ഥാനമാക്കിയുള്ളതാണ്.
കാനഡ വാർത്തകൾ മലയാളത്തിൽ ലഭിക്കുവാൻ താഴെയുള്ള ലിങ്ക് വഴി Canada Talks വാട്സ്ആപ്പ് ഗ്രൂപ്പിൽ അംഗമാകൂ : https://chat.whatsapp.com/JNSnrvnSqw1DUJljLTLp82
Did you know that Yusuf Ali is the second richest Malayali... this man is holding the first place?
