തന്റെ ചിത്രങ്ങൾ അനുവാദമില്ലാതെ പരസ്യങ്ങളിൽ ഉപയോഗിക്കുന്നതിനെതിരെ നടി ഐശ്വര്യ റായ് നിയമനടപടിക്കൊരുങ്ങുന്നു. തന്റെ വ്യക്തിപരമായ അവകാശങ്ങൾ സംരക്ഷിക്കണമെന്നും ചിത്രങ്ങളും ശബ്ദവും വാണിജ്യ ആവശ്യങ്ങൾക്കായി ഉപയോഗിക്കുന്നത് തടയണമെന്നും ആവശ്യപ്പെട്ട് ഐശ്വര്യ റായ് ഡൽഹി ഹൈക്കോടതിയിൽ ഹർജി നൽകി. ഇതുമായി ബന്ധപ്പെട്ട് ഇടക്കാല ഉത്തരവിറക്കാമെന്ന് കോടതി അറിയിച്ചു. ഉത്തരവ് ഉടൻ വെബ്സൈറ്റിൽ പ്രസിദ്ധീകരിക്കും. കേസിൽ വിശദമായ വാദം കേൾക്കുന്നതിനായി കേസ് അടുത്ത വർഷം ജനുവരി 15-ലേക്ക് മാറ്റി.
നടിയുടെ പബ്ലിസിറ്റി, വ്യക്തിത്വ അവകാശങ്ങൾ എന്നിവ സംരക്ഷിക്കണമെന്ന് അഭിഭാഷകൻ സന്ദീപ് സേഥി കോടതിയിൽ ആവശ്യപ്പെട്ടു. അനാവശ്യമായി നടിയുടെ ചിത്രങ്ങൾ ഉപയോഗിക്കുന്ന വെബ്സൈറ്റുകളുടെ യുആർഎല്ലുകൾ നീക്കം ചെയ്യാൻ ഗൂഗിളിനോട് നിർദ്ദേശിക്കണമെന്നും അദ്ദേഹം ആവശ്യപ്പെട്ടു. ഈ വിഷയത്തിൽ നടിയുടെ ചിത്രങ്ങൾ അനധികൃതമായി ഉപയോഗിക്കുന്ന എല്ലാ സ്ഥാപനങ്ങൾക്കെതിരെയും നടപടിയെടുക്കുമെന്ന് ഹൈക്കോടതി വ്യക്തമാക്കി. കൂടുതൽ ഉത്തരവുകൾ പിന്നീട് പുറപ്പെടുവിക്കുമെന്നും കോടതി അറിയിച്ചു.
ഐശ്വര്യ റായ്ക്ക് പിന്നാലെ ഭർത്താവും നടനുമായ അഭിഷേക് ബച്ചനും ഡൽഹി ഹൈക്കോടതിയിൽ ഹർജി നൽകി. ‘ബോളിവുഡ് ടി ഷോപ്പ്’ എന്ന വെബ്സൈറ്റിനെതിരെയാണ് അഭിഷേക് ബച്ചൻ കോടതിയെ സമീപിച്ചിരിക്കുന്നത്. ബോളിവുഡ് താരങ്ങളുടെ ചിത്രങ്ങൾ ഉപയോഗിച്ച് ടി-ഷർട്ടുകൾ നിർമ്മിക്കുന്ന വെബ്സൈറ്റാണ് ഇത്. അനുമതിയില്ലാതെ തന്റെ ചിത്രങ്ങളും ശബ്ദവും വാണിജ്യപരമായ ആവശ്യങ്ങൾക്ക് ഉപയോഗിക്കുന്നത് തടയണമെന്ന് അഭിഷേക് ബച്ചൻ ഹർജിയിൽ ആവശ്യപ്പെട്ടു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
After Aishwarya Rai, Abhishek Bachchan moves to Delhi High court to protect personality rights
