പ്രായം വെറുമൊരു സംഖ്യ മാത്രമാണെന്ന് തെളിയിച്ച് 106 വയസ്സുള്ള ഒരു മുത്തശ്ശിയുടെ വീഡിയോ സമൂഹമാധ്യമങ്ങളിൽ വൈറലാകുന്നു. നാലാം തലമുറയിലെ കൊച്ചുമകൾക്കൊപ്പം ഷോപ്പിംഗിന് പോയ മുത്തശ്ശിയുടെ ഊർജ്ജസ്വലതയാണ് എല്ലാവരെയും ആകർഷിക്കുന്നത്. പഞ്ചാബിലെ ഒരു ഷോപ്പിംഗ് മാളിൽ വെച്ചാണ് ഈ രംഗങ്ങൾ ചിത്രീകരിച്ചിരിക്കുന്നത്.
മുത്തശ്ശിയുടെ കൊച്ചുമകളായ യഷ്വി രഹേജയാണ് ഈ മനോഹരമായ വീഡിയോ ഇൻസ്റ്റാഗ്രാമിൽ പങ്കുവെച്ചത്. കാറിൽ നിന്നിറങ്ങി വോക്കറിന്റെ സഹായത്തോടെ മാളിലേക്ക് കയറുന്നിടത്ത് നിന്നാണ് വീഡിയോ ആരംഭിക്കുന്നത്. തുടർന്ന്, തനിക്ക് ഇഷ്ടപ്പെട്ട വസ്ത്രങ്ങൾ തിരഞ്ഞെടുക്കുന്നതും, അത് അളവെടുക്കുന്നതും, കൊച്ചുമകൾക്കൊപ്പം ഭക്ഷണം കഴിക്കുന്നതും വീഡിയോയിലുണ്ട്.
ഈ വീഡിയോയ്ക്ക് താഴെ നിരവധി പേരാണ് കമന്റുകളുമായി എത്തുന്നത്. മുത്തശ്ശിയുടെ ചുറുചുറുക്കും സന്തോഷവും എല്ലാവർക്കും പ്രചോദനമാണെന്ന് പലരും കുറിച്ചു. പ്രായത്തെ വെറും സംഖ്യയാക്കി മാറ്റുന്ന ഈ മുത്തശ്ശിക്ക് സോഷ്യൽ മീഡിയ നിറയെ അഭിനന്ദനങ്ങളാണ്.
