വാഴ്സോ: പ്രധാനമന്ത്രി മാർക്ക് കാർണി പോളണ്ട് സന്ദർശനത്തിനായി വാഴ്സോയിലെത്തി. പോളണ്ടുമായി കൂടുതൽ ശക്തമായ ബന്ധം സ്ഥാപിക്കുകയാണ് സന്ദർശനത്തിന്റെ പ്രധാന ലക്ഷ്യം. പ്രധാനമന്ത്രിയായി ചുമതലയേറ്റ ശേഷം കാർണിയുടെ ആദ്യ പോളണ്ട് സന്ദർശനമാണിത്. പോളണ്ടിലെത്തിയ കാർണി, യൂറോപ്പിൽ നിലയുറപ്പിച്ചിട്ടുള്ള കനേഡിയൻ സൈനികരുമായി കൂടിക്കാഴ്ച നടത്തി. ശേഷം പോളിഷ് പ്രധാനമന്ത്രി ഡൊണാൾഡ് ടസ്കുമായി ഔദ്യോഗിക ചർച്ചകൾ നടത്തും.
വ്യാപാരം, പ്രതിരോധം, ഊർജ്ജം എന്നീ മേഖലകളിൽ കാനഡയും പോളണ്ടും തമ്മിൽ തന്ത്രപ്രധാനമായ പങ്കാളിത്തം രൂപീകരിക്കുന്നതുമായി ബന്ധപ്പെട്ട ചർച്ചകൾക്ക് ഇരു നേതാക്കളും മുൻഗണന നൽകും. യുക്രെയ്നിന്റെ സ്വാതന്ത്ര്യ ദിനാഘോഷത്തിൽ പങ്കെടുക്കുന്നതിനായി പ്രധാനമന്ത്രി കാർണി ഞായറാഴ്ച യുക്രെയ്നിൽ അപ്രതീക്ഷിത സന്ദർശനം നടത്തിയിരുന്നു. യുക്രെയ്ൻ സന്ദർശനത്തിന് ശേഷമാണ് അദ്ദേഹം പോളണ്ടിലെത്തിയത്.
പോളണ്ട് സന്ദർശനത്തിന് ശേഷം കാർണി ജർമ്മനിയിലേക്ക് തിരിക്കും. ജർമ്മനിയിലെ ഉദ്യോഗസ്ഥരുമായും വ്യവസായ പ്രമുഖരുമായും അദ്ദേഹം കൂടിക്കാഴ്ച നടത്തും. ബുധനാഴ്ച ലാത്വിയ സന്ദർശനത്തോടെ അദ്ദേഹത്തിന്റെ യൂറോപ്യൻ പര്യടനം അവസാനിക്കും.
റഷ്യ-യുക്രെയ്ൻ യുദ്ധം തുടരുന്ന സാഹചര്യത്തിൽ, കിഴക്കൻ യൂറോപ്യൻ രാജ്യങ്ങളുമായുള്ള ബന്ധം ശക്തിപ്പെടുത്താനുള്ള കാനഡയുടെ ശ്രമങ്ങളുടെ ഭാഗമായാണ് കാർണിയുടെ ഈ സന്ദർശനം വിലയിരുത്തപ്പെടുന്നത്. അന്താരാഷ്ട്ര തലത്തിൽ കാനഡയുടെ പങ്ക് വർദ്ധിപ്പിക്കാനും ഈ സന്ദർശനം ലക്ഷ്യമിടുന്നു.
