വേർപിരിയൽ ഭീഷണിയിൽ ആൽബർട്ട: ജനങ്ങളുടെ മനസ്സറിയാൻ ഹിതപരിശോധന വരുന്നു

കാനഡയിൽ നിന്ന് ആൽബർട്ട വേർപിരിയുന്നതിനെതിരെ മുൻ ഡെപ്യൂട്ടി പ്രീമിയർ തോമസ് ലുകാസുകിൻ്റെ നേതൃത്വത്തിൽ ഒരു ജനകീയ മുന്നേറ്റം ശക്തിപ്പെടുന്നു. “ഇതൊരു മുഴുവൻ സമയ ജോലിയായി മാറിയിരിക്കുകയാണെന്നും, തനിക്ക് ഈ വിഷയത്തിൽ വലിയ താൽപ്പര്യമുണ്ടെന്നും പറഞ്ഞിരിക്കുകയാണ് മുൻ പ്രോഗ്രസീവ് കൺസർവേറ്റീവ് ഡെപ്യൂട്ടി പ്രീമിയർ കൂടിയായ ലുകാസുകി.

ആൽബർട്ട കാനഡയുടെ ഭാഗമാക്കി നിലനിർത്തുക എന്നത് ഔദ്യോഗിക നയമാക്കണോ എന്ന് ചോദിക്കുന്ന ഒരു ഹിതപരിശോധന നടത്താൻ ഏകദേശം 294,000 പേരുടെ ഒപ്പുകൾ ശേഖരിക്കാനാണ് അദ്ദേഹത്തിൻ്റെ ‘ഫോറെവർ കനേഡിയൻ’ (Forever Canadian) എന്ന പദ്ധതി ലക്ഷ്യമിടുന്നത്. ഒക്ടോബർ അവസാനത്തോടെ ഈ ഒപ്പുകൾ ശേഖരിക്കേണ്ടതുണ്ട്.

ലുകാസുകിന്റെ അഭിപ്രായത്തിൽ, ഈ വിഷയത്തിൽ ആൽബർട്ടയിലെ ആളുകളെ കണ്ടെത്തുക എന്നത് വലിയ വെല്ലുവിളിയല്ല, മറിച്ച് ഒപ്പ് ശേഖരിക്കാനുള്ള ഫോറം അവരിലേക്ക് എത്തിക്കുക എന്നതാണ് ഏറ്റവും വലിയ വെല്ലുവിളി. ഇതിനായി ഏകദേശം 3,000 സന്നദ്ധപ്രവർത്തകർ ഇപ്പോൾ അദ്ദേഹത്തോടൊപ്പം പ്രവർത്തിക്കുന്നു. ഇവൻ്റുകൾ സംഘടിപ്പിക്കാനും മറ്റ് സഹായങ്ങൾ നൽകാനും ആയിരക്കണക്കിന് ആളുകളുണ്ട്.

ലുകാസുകിന്റെ വാക്കുകളിൽ, ഇത് “വളരെ നന്നായി സംഘടിപ്പിച്ച ഒരുതരം കുഴപ്പമാണ്.” ഡോഗ് പാർക്കുകൾ, ഡ്രൈവ്‌വേകൾ, ഫാർമേഴ്‌സ് മാർക്കറ്റുകൾ, വേനൽക്കാല മേളകൾ, മൃഗശാലകൾ എന്നിവിടങ്ങളിൽ പോലും ഒപ്പ് ശേഖരണ പരിപാടികൾ നടക്കുന്നുണ്ട്. അടുത്തിടെ കാൽഗറിയിൽ രണ്ട് സന്നദ്ധപ്രവർത്തകർ ഒറ്റ ദിവസംകൊണ്ട് 8,000 ഒപ്പുകൾ ശേഖരിച്ചത് ഇതിനൊരു ഉദാഹരണമാണ്.

ആൽബർട്ടയെ കാനഡയിൽ നിന്ന് വേർപെടുത്താൻ ശ്രമിക്കുന്ന ഒരു വിഭാഗം ആളുകളും സജീവമായി പ്രവർത്തിക്കുന്നുണ്ട്. “ആൽബർട്ട പ്രോസ്പെരിറ്റി പ്രോജക്റ്റ്” (Alberta Prosperity Project – APP) എന്ന സംഘടനയുടെ ഒരു ഹിതപരിശോധനാ ചോദ്യം ഇപ്പോൾ കോടതിയുടെ പരിഗണനയിലാണ്. ആൽബർട്ട ഒരു പരമാധികാര രാജ്യമാകണോ എന്ന ചോദ്യം ഭരണഘടനാപരമാണോ എന്ന് കോടതി പരിശോധിക്കും. പുതിയ നിയമം അനുസരിച്ച്, ഹിതപരിശോധനക്ക് വേണ്ട ഒപ്പുകളുടെ എണ്ണം ഏകദേശം 177,000 ആയി കുറച്ചിട്ടുണ്ട്, ഒപ്പം ഒപ്പുകൾ ശേഖരിക്കാനുള്ള സമയം നാല് മാസമായി വർദ്ധിപ്പിക്കുകയും ചെയ്തു. അതിനാൽ, തങ്ങളുടെ ചോദ്യത്തിന് അനുമതി ലഭിച്ചാൽ പെട്ടെന്ന് ഒപ്പുകൾ ശേഖരിക്കാൻ കഴിയുമെന്നാണ് എപിപി പറയുന്നത്.

അതേസമയം, നിലവിലെ യുണൈറ്റഡ് കൺസർവേറ്റീവ് പ്രീമിയർ ഡാനിയൽ സ്മിത്ത് ഈ വിഷയത്തിൽ ഒരു പക്ഷം പിടിക്കാൻ തയ്യാറായിട്ടില്ല. കാനഡയിൽ ഒരു പരമാധികാര അൽബെർട്ടയെ പിന്തുണയ്ക്കുന്നുണ്ടെന്ന് അവർ പറയുന്നുണ്ടെങ്കിലും, ലുകാസുകിന്റെ ഹർജിയിൽ ഒപ്പിടാൻ അവർ വിസമ്മതിച്ചു.

എന്നാൽ ലുകാസുകിന്റെ ഈ പ്രസ്ഥാനം രാഷ്ട്രീയത്തിന് അതീതമാണ്. മുൻ പ്രീമിയർ എഡ് സ്റ്റെൽമാക്ക്, റിഫോം പാർട്ടിയുടെ സ്ഥാപക അംഗം ഇയാൻ മക്ക്ലെൻഡ്, എൻഡിപി നേതാവായിരുന്ന റേ മാർട്ടിൻ എന്നിവർ അദ്ദേഹത്തിന് പിന്തുണ പ്രഖ്യാപിച്ചിട്ടുണ്ട്. 12-ാം വയസ്സിൽ പോളണ്ടിൽ നിന്ന് കാനഡയിലേക്ക് വന്ന ലുകാസുകിന് ജനാധിപത്യം തകരുമ്പോൾ എന്താണ് സംഭവിക്കുന്നതെന്ന് നേരിട്ടറിയാം. “കാനഡ തൻ്റെ കുടുംബത്തിന് ഒരു രണ്ടാം ജീവിതം നൽകിയെന്നും സ്വന്തം രാജ്യത്തോടുള്ള സ്നേഹമാണ് ഈ പോരാട്ടത്തിന് തന്നെ പ്രേരിപ്പിക്കുന്നതെന്നും അദ്ദേഹം വ്യക്തമാക്കി.

Alberta under threat of secession: Referendum coming to know the will of the people