വിന്നിപെഗിൽ ആംബുലൻസുകളുടെ കുറവ്: അഗ്നിശമന സേനാംഗങ്ങളും പൊതുജനങ്ങളും കടുത്ത പ്രതിസന്ധിയിൽ

വിന്നിപെഗിൽ ആംബുലൻസുകളുടെ ക്ഷാമം കാരണം പൊതുജനങ്ങളുടെ ജീവൻ അപകടത്തിലാണെന്ന് ഫയർ ഫൈറ്റേഴ്സ് യൂണിയൻ. ആവശ്യത്തിന് ജീവനക്കാരില്ലാത്തതിനാൽ, ശനിയാഴ്ച നഗരത്തിലെ 19 ആംബുലൻസുകളിൽ 9 എണ്ണം മാത്രമാണ് പ്രവർത്തനക്ഷമമായിരുന്നത്. ഇതിന് പുറമേ, 11 കമ്മ്യൂണിക്കേഷൻസ് ഓപ്പറേറ്റർമാരിൽ 6 പേർ മാത്രമാണ് ഡ്യൂട്ടിയിലുണ്ടായിരുന്നതെന്ന് യുണൈറ്റഡ് ഫയർ ഫൈറ്റേഴ്സ് ഓഫ് വിന്നിപെഗ് (UFFW) പ്രസിഡന്റ് നിക്ക് കാസ്പർ പറഞ്ഞു. 8 ലക്ഷത്തിലധികം ജനസംഖ്യയുള്ള നഗരത്തിൽ 9 ആംബുലൻസുകൾ മാത്രമുള്ളത് പ്രതികരണ സമയത്തിൽ വലിയ കാലതാമസമുണ്ടാക്കുന്നു. ഇത് ഗുരുതരമായ പ്രത്യാഘാതങ്ങൾ സൃഷ്ടിക്കുമെന്നും അദ്ദേഹം കൂട്ടിച്ചേർത്തു.

ജീവനക്കാരുടെ കുറവ് കാരണം ആംബുലൻസുകളുടെ സേവനത്തിൽ തടസ്സമുണ്ടായതായി വിന്നിപെഗ് ഫയർ പാരാമെഡിക് സർവീസ് (WFPS) ചീഫ് ക്രിസ്റ്റ്യൻ ഷ്മിത്ത് സമ്മതിച്ചു. അവധിയെടുക്കുന്നവരും, രോഗാവധിയിലുള്ളവരും, ദീർഘകാല അവധിയിലുള്ളവരും ഉൾപ്പെടെയുള്ള നിരവധി ജീവനക്കാരുടെ അഭാവമാണ് ഇതിന് കാരണമെന്നും അദ്ദേഹം ഇമെയിൽ പ്രസ്താവനയിലൂടെ വ്യക്തമാക്കി. ആംബുലൻസ് ക്ഷാമം കാരണം എല്ലാ വൈദ്യസഹായ കോളുകളിലും ആദ്യം എത്തുന്നത് ഫയർ ക്രൂവാണ്. ആംബുലൻസ് എത്തി രോഗിയെ കൊണ്ടുപോകുന്നത് വരെ അവർ കാത്തിരിക്കേണ്ടി വരുന്നു. ഈ സമയങ്ങളിൽ അഗ്നിശമന സേനാംഗങ്ങൾക്ക് മറ്റു അടിയന്തര സാഹചര്യങ്ങളിൽ ഇടപെടാൻ കഴിയാതെ വരുന്നത് അപകട സാധ്യത വർദ്ധിപ്പിക്കുന്നു.

അഗ്നിശമന സേവന രംഗത്ത് ഓരോ സെക്കൻഡിനും വലിയ വിലയുണ്ടെന്ന് യൂണിയൻ പ്രസിഡന്റ് നിക്ക് കാസ്പർ പറഞ്ഞു. ഒരു തീപിടുത്തം 30-60 സെക്കൻഡിനുള്ളിൽ ഇരട്ടിയാകാം. ആംബുലൻസിനായുള്ള കാത്തിരിപ്പ് വലിയ ദുരന്തങ്ങൾക്ക് വഴിവെക്കും. അടുത്തിടെ നടന്ന ചില തീപിടുത്തങ്ങളിലെ പ്രതികരണ സമയത്തിന്റെ വലിയ കാലതാമസം അദ്ദേഹം ചൂണ്ടിക്കാട്ടി. ലക്ഷ്യമിടുന്ന നാല് മിനിറ്റിന് പകരം, 2021 മുതൽ പ്രതികരണ സമയം ഇരട്ടിയായി വർധിച്ചു. നഗരത്തിലെ ജീവനക്കാരുടെ എണ്ണം വർദ്ധിപ്പിക്കണമെന്ന് 2009-ലെ ഓഡിറ്റ് റിപ്പോർട്ട് മുതൽ അധികൃതർക്ക് അറിയാമായിരുന്നിട്ടും നടപടിയൊന്നും ഉണ്ടായില്ലെന്നും അദ്ദേഹം കുറ്റപ്പെടുത്തി. അതേസമയം, 2025 അവസാനത്തോടെ 50-ലധികം പുതിയ അഗ്നിശമന സേനാംഗങ്ങളെയും 25 പാരാമെഡിക്കുകളെയും നിയമിക്കുമെന്ന് ചീഫ് ക്രിസ്റ്റ്യൻ ഷ്മിത്ത് അറിയിച്ചു.

ഈ പ്രതിസന്ധി അഗ്നിശമന സേനാംഗങ്ങളിൽ കടുത്ത മാനസിക സമ്മർദ്ദമുണ്ടാക്കുന്നതായി യൂണിയൻ പ്രസിഡന്റ് പറയുന്നു. ഇത് കൂടുതൽ ജീവനക്കാർക്ക് അവധിയെടുക്കേണ്ട സാഹചര്യമുണ്ടാക്കുന്നു. 2024-ൽ മാനസിക പ്രശ്‌നങ്ങൾ കാരണം 17,600 മണിക്കൂർ ജോലിയാണ് നഷ്ടമായത്. കഴിഞ്ഞ വർഷം 10 മില്യൺ ഡോളറിൽ അധികം തുക ജീവനക്കാരുടെ ഓവർടൈം വേതനത്തിനായി ചിലവഴിച്ചു. ഈ തുക കൊണ്ട് 70 മുഴുവൻ സമയ ജീവനക്കാരെ നിയമിക്കാമായിരുന്നു. പൊതുജനങ്ങൾക്ക് സേവനം കുറയുകയും ചെലവ് കൂടുകയും ചെയ്യുന്ന ഈ അവസ്ഥയിൽ അധികൃതർ ഇപ്പോഴും നിസ്സംഗത തുടരുകയാണെന്നും കാസ്പർ കൂട്ടിച്ചേർത്തു.

Ambulance shortage in Winnipeg: Firefighters and the public in dire straits