കാനഡയിൽ വീടുകളുടെ വിൽപ്പന കുതിച്ചുയരുകയാണ്. കഴിഞ്ഞ വർഷത്തെ അപേക്ഷിച്ച് ഈ വർഷം ജൂലൈയിൽ ഭവന വിൽപ്പനയിൽ 6.6% വർധനവാണുണ്ടായത്. മന്ദഗതിയിലായിരുന്ന ഭവന വിപണി വീണ്ടും സജീവമായിക്കൊണ്ടിരിക്കുകയാണെന്ന് കനേഡിയൻ റിയൽ എസ്റ്റേറ്റ് അസോസിയേഷൻ (CREA) വ്യക്തമാക്കുന്നു. കഴിഞ്ഞ മാസം മൊത്തം 45,973 വീടുകളാണ് വിറ്റഴിച്ചത്, ഇത് 2024 ജൂലൈയിലെ 43,122 എന്ന കണക്കിനെക്കാൾ കൂടുതലാണ്. ജൂണിനെ അപേക്ഷിച്ച് മാസം തോറുമുള്ള വിൽപ്പനയിൽ 3.8% വർധനവുണ്ടായി. മാർച്ചിൽ നിന്ന് മൊത്തത്തിൽ 11.2% വർധനവാണ് രേഖപ്പെടുത്തിയിരിക്കുന്നത്.
ഭവന വിൽപ്പനയിലുണ്ടായ ഈ വർധനവിന് പ്രധാന കാരണം ടൊറന്റോയിലെ വിൽപ്പനയിലുണ്ടായ കുതിപ്പാണ്. മാർച്ചിൽ നിന്ന് ടൊറന്റോയിൽ മാത്രം 35.5% വർധനവുണ്ടായി. സാമ്പത്തിക അനിശ്ചിതത്വം കുറഞ്ഞതും പലിശ നിരക്കുകളിൽ ലഭിച്ച ആശ്വാസവും കൂടുതൽ ആളുകളെ വീടുകൾ വാങ്ങാൻ പ്രേരിപ്പിച്ചു. എന്നാൽ, എല്ലാ പ്രവിശ്യകളിലും ഇത് ഒരുപോലെയല്ല. ബ്രട്ടീഷ് കൊളംബിയ (B.C.), ഒന്റാറിയോ തുടങ്ങിയ സ്ഥലങ്ങളിൽ സാമ്പത്തിക അനിശ്ചിതത്വം കുറഞ്ഞതോടെ കൂടുതൽ ആളുകൾ വീടുകൾ വാങ്ങാനെത്തുന്നുണ്ടെങ്കിലും, ഉയർന്ന വിലയും ദുർബലമായ തൊഴിൽ കമ്പോളവും ഇപ്പോഴും വെല്ലുവിളിയായി തുടരുന്നു.
അതേസമയം, പുതിയ വീടുകളുടെ ലിസ്റ്റിംഗിൽ 0.1% വർധനവ് മാത്രമാണുണ്ടായത്. ജൂലൈ അവസാനത്തോടെ കാനഡയിലുടനീളം വിൽപ്പനയ്ക്ക് ലിസ്റ്റ് ചെയ്തിട്ടുള്ള വീടുകളുടെ എണ്ണം 2,02,500 ആണ്. ഇത് കഴിഞ്ഞ വർഷത്തെ അപേക്ഷിച്ച് 10.1% കൂടുതലാണ്. ജൂലൈയിൽ ഒരു വീടിൻ്റെ ശരാശരി വിൽപ്പന വില 6,72,784 ഡോളറാണ്, ഇത് കഴിഞ്ഞ വർഷത്തെ അപേക്ഷിച്ച് 0.6% വർധനവാണ് കാണിക്കുന്നത്. എന്നിരുന്നാലും, ഭവന വിപണി നിലവിൽ സന്തുലിതവും സ്ഥിരതയുള്ളതുമാണെന്ന് സാമ്പത്തിക വിദഗ്ധർ വിലയിരുത്തുന്നു. പലയിടങ്ങളിലും വില കുറഞ്ഞതോടെ കൂടുതൽ ആളുകൾ വീടുകൾ വാങ്ങാൻ മുന്നോട്ട് വരുന്നുണ്ടെന്നും അവർ കൂട്ടിച്ചേർത്തു.
Housing market heats up in Canada; sales grow 6.6%
