ന്യൂ ബ്രൺസ്വിക്കിൽ ജലക്ഷാമം രൂക്ഷമാകുകയാണ്. തുടർച്ചയായ ദിവസങ്ങളിലെ ചൂടും മഴക്കുറവും കാരണം പുഴകളിലെയും കിണറുകളിലെയും ജലനിരപ്പ് വളരെയധികം താഴ്ന്നതോടെയാണ് അധികൃതർ ജലം ശ്രദ്ധയോടെ ഉപയോഗിക്കണമെന്ന് ജനങ്ങളോട് നിർദ്ദേശിച്ചത്. അസാധാരണമാംവിധം ജലനിരപ്പ് താഴ്ന്നതോടെ പ്രവിശ്യയിലുള്ളവർ കടുത്ത ആശങ്കയിലാണ്.
“കഴിഞ്ഞ ഏതാനും ആഴ്ചകളായുള്ള ഉഷ്ണതരംഗവും മഴക്കുറവും ജലനിരപ്പിനെ കാര്യമായി ബാധിച്ചു. ജലനിരപ്പ് സാധാരണ നിലയിലാക്കാൻ തുടർച്ചയായി മഴ ലഭിക്കേണ്ടതുണ്ട്. അതിനാൽ, എല്ലാവരും വെള്ളം സംരക്ഷിക്കാൻ കഴിയുന്നതെല്ലാം ചെയ്യണമെന്ന് ഞങ്ങൾ അഭ്യർത്ഥിക്കുന്നു,” പരിസ്ഥിതി, കാലാവസ്ഥാ വ്യതിയാന മന്ത്രി ഗില്ലെസ് ലെപേജ് ചൊവ്വാഴ്ച പറഞ്ഞു.
നിലവിൽ ന്യൂ ബ്രൺസ്വിക്കിന്റെ പല ഭാഗങ്ങളിലും പുഴകളിലെ നീരൊഴുക്ക് സാധാരണ നിലയെക്കാൾ വളരെ താഴെയാണ്. വടക്കുപടിഞ്ഞാറൻ മേഖലയിൽ മാത്രമാണ് സാധാരണ നിലയിലുള്ള നീരൊഴുക്ക് രേഖപ്പെടുത്തിയിട്ടുള്ളത്. കിഴക്ക്, തെക്കുകിഴക്കൻ മേഖലകളിലും ബേ ഓഫ് ഫണ്ടി തീരപ്രദേശത്തും ജലനിരപ്പ് റെക്കോർഡ് താഴ്ചയിലാണ്.
അടുത്ത ദിവസങ്ങളിൽ കാര്യമായ മഴ പ്രതീക്ഷിക്കുന്നില്ലാത്തതിനാൽ സാഹചര്യം കൂടുതൽ വഷളാകാൻ സാധ്യതയുണ്ടെന്നും അധികൃതർ മുന്നറിയിപ്പ് നൽകി. കിണറുകളോ മുനിസിപ്പൽ ജലവിതരണ സംവിധാനങ്ങളോ ഉപയോഗിക്കുന്ന എല്ലാവരും ജല ഉപയോഗം കുറയ്ക്കണമെന്ന് ലെപേജ് ഊന്നിപ്പറഞ്ഞു.
വാഹനങ്ങൾ കഴുകുന്നതും പുൽത്തകിടികൾ നനയ്ക്കുന്നതും നീന്തൽക്കുളങ്ങൾ നിറയ്ക്കുന്നതും പോലുള്ള കാര്യങ്ങൾ ഒഴിവാക്കണമെന്ന് അധികൃതർ നിർദ്ദേശിച്ചു. കൂടാതെ, വാഷിംഗ് മെഷീനുകളും ഡിഷ്വാഷറുകളും പൂർണ്ണമായി നിറയുമ്പോൾ മാത്രം പ്രവർത്തിപ്പിക്കുക, കുറഞ്ഞ സമയം മാത്രം ഷവർ ഉപയോഗിക്കുക, ചോർച്ചകൾ ഉടൻ പരിഹരിക്കുക തുടങ്ങിയ മാർഗ്ഗങ്ങൾ സ്വീകരിക്കാനും ജനങ്ങളോട് ആവശ്യപ്പെട്ടിട്ടുണ്ട്.
പ്രവിശ്യയിലെ പരിസ്ഥിതി, തദ്ദേശസ്വയംഭരണ വകുപ്പ് സ്ഥിതിഗതികൾ നിരീക്ഷിച്ചുവരികയാണ്. മഴ, നീരൊഴുക്ക്, ഭൂഗർഭജലനിരപ്പ് എന്നിവയെക്കുറിച്ചുള്ള പ്രതിമാസ വിവരങ്ങൾ ന്യൂ ബ്രൺസ്വിക്ക് വാട്ടർ ക്വാണ്ടിറ്റി ഇൻഫർമേഷൻ വെബ്സൈറ്റിൽ ലഭ്യമാണ്.
New Brunswick is suffering from heat exhaustion; u
