പാതയോരങ്ങൾ ഇനി സൈക്കിൾ യാത്രികർക്ക് പേടിയുടെ വഴിത്താരകളാകില്ല. ഒട്ടാവയിലെ സൈക്കിൾ യാത്രികരെ സഹായിക്കാൻ പുതിയ മൊബൈൽ ആപ്ലിക്കേഷൻ രംഗത്ത്. സുരക്ഷിതവും വേഗതയേറിയതുമായ സൈക്കിൾ റൂട്ടുകൾ കണ്ടെത്താൻ സഹായിക്കുന്നതാണ് ഈ ആപ്ലിക്കേഷൻ. സൈക്കിളിംഗ് പ്രോത്സാഹിപ്പിക്കുന്നതിനുള്ള ഒരു കൂട്ടായ്മയാണ് ഈ സൗജന്യ ആപ്പ് വികസിപ്പിച്ചത്. ‘ബൈക്ക് ഒട്ടാവ’ എന്ന കൂട്ടായ്മ നിർമിച്ച ‘സൈക്ലിംഗ് ഗൈഡ്’ എന്ന ആപ്ലിക്കേഷനാണ് യാത്രികർക്ക് സഹായകമാകുന്നത്.
കുറഞ്ഞ ബുദ്ധിമുട്ടുകളുള്ളതും സൗകര്യപ്രദവും സൈക്കിളിംഗിന് അനുയോജ്യമായതുമായ റൂട്ടുകളാണ് ആപ്പ് നൽകുന്നത്. സൈക്കിളിംഗ് ഒരു പ്രധാന യാത്രാമാർഗമായി ഉപയോഗിക്കാൻ ആഗ്രഹിക്കുന്നവർക്ക് എളുപ്പത്തിൽ മനസിലാക്കാൻ കഴിയുന്ന തരത്തിൽ നിറങ്ങൾ ഉപയോഗിച്ചാണ് റൂട്ടുകൾ അടയാളപ്പെടുത്തിയിരിക്കുന്നത്.
“മറ്റുള്ള ആപ്ലിക്കേഷനുകൾ നിങ്ങൾക്ക് ഒരു റൂട്ട് നൽകിയേക്കാം, പക്ഷേ ആ റൂട്ട് എങ്ങനെയായിരിക്കുമെന്ന് നിങ്ങൾക്ക് അറിയാൻ കഴിയില്ല.
ഈ ആപ്പ് ഉപയോഗിക്കുമ്പോൾ നിങ്ങൾക്ക് ഒരു റൂട്ടിൽ എന്തെല്ലാം പ്രതീക്ഷിക്കാമെന്ന് ഉറപ്പുനൽകുന്നു. ഏറ്റവും സുരക്ഷിതമായ റൂട്ട് എല്ലായ്പ്പോഴും പച്ച നിറത്തിലാണ് അടയാളപ്പെടുത്തുന്നത്, പച്ച നിറം സുരക്ഷയെ സൂചിപ്പിക്കുന്നു,” ബൈക്ക് ഒട്ടാവയിലെ വോളണ്ടിയർ ആയ ഡേവ് റോബർട്ട്സൺ പറയുന്നു. ഒട്ടാവ നിവാസികൾക്ക് മാത്രമല്ല, നഗരം സന്ദർശിക്കുന്നവർക്കും നഗരം ചുറ്റിക്കാണാൻ ഈ ആപ്പ് ഉപയോഗിച്ച് എളുപ്പത്തിൽ ഇതര റൂട്ടുകൾ കണ്ടെത്താൻ കഴിയും.
നിലവിൽ ഉപയോഗിക്കുന്ന ഭൂരിഭാഗം നാവിഗേഷൻ ആപ്ലിക്കേഷനുകളും യാത്രികന്റെ സുരക്ഷയോ സൗകര്യമോ കണക്കിലെടുക്കുന്നില്ലെന്നും റോബർട്ട്സൺ ചൂണ്ടിക്കാട്ടി.
കൂടുതൽ വേഗത്തിൽ ലക്ഷ്യസ്ഥാനത്ത് എത്താൻ ആഗ്രഹിക്കുന്നവർക്ക് കൂടുതൽ ഗതാഗതക്കുരുക്കുള്ള, എന്നാൽ അല്പം കൂടി വേഗതയേറിയ മറ്റൊരു റൂട്ടും ആപ്പ് നിർദേശിക്കുന്നുണ്ട്. ഈ വർഷം തന്നെ ആപ്ലിക്കേഷൻ മറ്റ് കനേഡിയൻ നഗരങ്ങളിലും ലഭ്യമാക്കുമെന്ന് അണിയറപ്രവർത്തകർ അറിയിച്ചു. ആൻഡ്രോയിഡ്, ഐഫോൺ ഉപയോക്താക്കൾക്ക് ഈ സൗജന്യ ആപ്ലിക്കേഷൻ ഡൗൺലോഡ് ചെയ്യാം.
