2026-ൽ നടക്കുന്ന ഫിഫ ലോകകപ്പിനായി സന്നദ്ധപ്രവർത്തകരെ തേടി സംഘാടകർ. 48 ടീമുകളും 104 മത്സരങ്ങളും അരങ്ങേറുന്ന ഈ വലിയ കായിക മാമാങ്കത്തിനായി ഏകദേശം 65,000 സന്നദ്ധപ്രവർത്തകരെയാണ് ആവശ്യമായി വരുന്നത്. കാനഡ, മെക്സിക്കോ, അമേരിക്ക എന്നീ മൂന്ന് രാജ്യങ്ങളിലായി 16 വേദികളിലായാണ് മത്സരങ്ങൾ നടക്കുക. ഫിഫയുടെ ചരിത്രത്തിലെ ഏറ്റവും വലിയ സന്നദ്ധസേവാ പരിപാടിയാണിത്. കാനഡയിൽ മാത്രം 6,000 സന്നദ്ധപ്രവർത്തകരെ ആവശ്യമുണ്ടെന്ന് സംഘാടകർ അറിയിച്ചു.
സ്റ്റേഡിയങ്ങൾ, പരിശീലന കേന്ദ്രങ്ങൾ, വിമാനത്താവളങ്ങൾ, ഹോട്ടലുകൾ തുടങ്ങിയ ഔദ്യോഗികവും അനൗദ്യോഗികവുമായ വേദികളിലായി 23 വിവിധ മേഖലകളിൽ സന്നദ്ധപ്രവർത്തകർക്ക് സേവനം ചെയ്യാം. ഈ പരിപാടിക്ക് തുടക്കം കുറിച്ചുകൊണ്ട് ഫിഫ പ്രസിഡന്റ് ജിയാനി ഇൻഫാന്റിനോ, സന്നദ്ധപ്രവർത്തകർ ഫിഫ ടൂർണമെന്റുകളുടെ ഹൃദയവും ആത്മാവും പുഞ്ചിരിയുമാണെന്ന് പറഞ്ഞു. ലോകത്തിന് മുന്നിൽ തങ്ങളുടെ അഭിമാനം പ്രകടിപ്പിക്കാനും ടൂർണമെന്റിന്റെ പിന്നാമ്പുറ കാഴ്ചകൾ അറിയാനും അതുപോലെ ജീവിതകാലം മുഴുവൻ നിലനിൽക്കുന്ന സൗഹൃദങ്ങൾ നേടാനും ഇത് സഹായിക്കുമെന്നും അദ്ദേഹം കൂട്ടിച്ചേർത്തു.
താൽപര്യമുള്ളവർക്ക് ഫിഫയുടെ ഔദ്യോഗിക വോളണ്ടിയർ പോർട്ടൽ വഴി ഓൺലൈനായി അപേക്ഷ സമർപ്പിക്കാവുന്നതാണ്. അപേക്ഷിക്കുന്ന സമയത്ത് 18 വയസ്സ് പൂർത്തിയായിരിക്കണം എന്നതാണ് പ്രധാന യോഗ്യത. 2026 ജൂൺ 11 മുതൽ ജൂലൈ 19 വരെയുള്ള കാലയളവിൽ കുറഞ്ഞത് എട്ട് ഷിഫ്റ്റുകളിൽ ജോലി ചെയ്യാൻ തയ്യാറായിരിക്കണം. ഇംഗ്ലീഷ് ഭാഷ സംസാരിക്കാൻ അറിയണം. ഫ്രഞ്ച്, സ്പാനിഷ് തുടങ്ങിയ ഭാഷകൾ അറിയുന്നവർക്ക് മുൻഗണനയുണ്ട്. കൂടാതെ ഒരു പശ്ചാത്തല പരിശോധനയിലും വിജയിക്കേണ്ടതുണ്ട്. തിരഞ്ഞെടുക്കപ്പെടുന്നവർക്കായി ഒക്ടോബറിൽ ട്രൈഔട്ടുകളും മാർച്ചിൽ പരിശീലനവും സംഘടിപ്പിക്കും. സന്നദ്ധസേവനം ചെയ്യുന്ന നഗരം തിരഞ്ഞെടുക്കാൻ അവസരമുണ്ടെങ്കിലും യാത്രാചെലവുകളും താമസസൗകര്യങ്ങളും ഫിഫ നൽകുന്നതല്ല. എന്നാൽ, സന്നദ്ധപ്രവർത്തകർക്ക് യൂണിഫോമും ഷിഫ്റ്റുകൾക്കിടയിൽ ഭക്ഷണവും മറ്റ് ചില ആനുകൂല്യങ്ങളും ലഭിക്കും. കാനഡയിലെ ടൊറന്റോ, വാൻകൂവർ എന്നിവിടങ്ങളിലാണ് മത്സരങ്ങൾ നടക്കുന്നത്.
2026 FIFA World Cup: Canada invites applications for 6,000 volunteers
