കാനഡയിലെ ആരോഗ്യവകുപ്പ് (Health Canada) ബിൽറ്റ്-ഇൻ ഫാനുകളുള്ള സൺ വൈസറുകൾ തിരിച്ചുവിളിക്കാൻ ഉത്തരവിട്ടു. ഈ ഉൽപ്പന്നങ്ങൾ തീപിടിത്തത്തിന് കാരണമായേക്കുമെന്നാണ് മുന്നറിയിപ്പ്. ഈ വർഷം മെയ്-ജൂൺ മാസങ്ങളിൽ ജയന്റ് ടൈഗർ സ്റ്റോറുകൾ വഴി വിറ്റഴിച്ച ‘Chatties’ എന്ന ബ്രാൻഡിന്റെ വൈസറുകളാണ് തിരിച്ചുവിളിക്കുന്നത്. 190818341588, 198018341595, 198018341601, 198018341618 എന്നീ UPC നമ്പറുകളുള്ള ഉൽപ്പന്നങ്ങളാണ് ഇതിൽ ഉൾപ്പെടുന്നത്.
വൈസറിലെ ഇലക്ട്രിക് ഫാൻ ചാർജ് ചെയ്യാനുപയോഗിക്കുന്ന കേബിൾ ചൂടാകാൻ സാധ്യതയുണ്ടെന്നും ഇത് പൊള്ളലിനും തീപിടിത്തത്തിനും കാരണമായേക്കുമെന്നും ഹെൽത്ത് കാനഡ അറിയിച്ചു.ജൂലൈ അവസാനത്തോടെ ഈ ഉൽപ്പന്നങ്ങളുമായി ബന്ധപ്പെട്ട് മൂന്ന് അപകടങ്ങൾ റിപ്പോർട്ട് ചെയ്യപ്പെട്ടിട്ടുണ്ട്. എന്നാൽ ആർക്കും പരിക്കേറ്റിട്ടില്ല. രാജ്യവ്യാപകമായി 892 വൈസറുകളാണ് വിറ്റഴിച്ചിട്ടുള്ളത്. ഈ ഉൽപ്പന്നങ്ങൾ ഉപയോഗിക്കുന്നത് ഉടനടി നിർത്തി ജയന്റ് ടൈഗർ സ്റ്റോറുകളിൽ തിരികെ നൽകി പണം തിരികെ വാങ്ങാൻ ഉപഭോക്താക്കൾക്ക് നിർദ്ദേശം നൽകിയിട്ടുണ്ട്. തിരിച്ചുവിളിച്ച ഉൽപ്പന്നങ്ങൾ വീണ്ടും വിൽക്കുകയോ മറ്റുള്ളവർക്ക് നൽകുകയോ ചെയ്യരുതെന്നും നിർദ്ദേശമുണ്ട്.
കൂടുതൽ വിവരങ്ങൾക്കായി 1-833-848-4437 എന്ന നമ്പറിൽ ബന്ധപ്പെടുകയോ customerservice@gianttiger.com എന്ന ഇമെയിൽ വിലാസത്തിൽ ബന്ധപ്പെടുകയോ അവരുടെ വെബ്സൈറ്റ് സന്ദർശിക്കുകയോ ചെയ്യാം. ഈ ഉൽപ്പന്നങ്ങളുമായി ബന്ധപ്പെട്ട മറ്റ് അപകടങ്ങൾ ഓൺലൈൻ ഫോം വഴി ഹെൽത്ത് കാനഡയെ അറിയിക്കാവുന്നതാണ്.
Visors with built-in fans recalled for burn, fire hazards
