സർക്കാർ ജീവനക്കാർക്ക് ഇനി മൊബൈൽ ഫോൺ വേണ്ട!; സോഫ്റ്റ്‌ ഫോണുകളിലേക്കുള്ള മാറ്റത്തിനൊരുങ്ങി കാനഡ സർക്കാർ

ഫെഡറൽ സർക്കാർ തങ്ങളുടെ ജീവനക്കാർക്ക് നൽകിയിരുന്ന ഔദ്യോഗിക സെൽഫോണുകൾക്ക് പകരം കമ്പ്യൂട്ടർ അധിഷ്ഠിത സോഫ്റ്റ്‌ഫോൺ സാങ്കേതികവിദ്യയിലേക്ക് മാറാൻ ഒരുങ്ങുന്നു. ഇത് സർക്കാരിന്റെ ചിലവുകൾ വെട്ടിച്ചുരുക്കുന്നതിന്റെ ഭാഗമായാണ് നടപ്പിലാക്കുന്നത്. നിലവിൽ, ഷെയേർഡ് സർവീസസ് കാനഡ (SSC) 45 പങ്കാളികൾക്കും 10 ക്ലയന്റ് ഡിപ്പാർട്ട്‌മെന്റുകളിലുമായി ഏകദേശം 180,000 ഹാൻഡ്‌ഹെൽഡ് ഉപകരണങ്ങൾ (iOS, Android) കൈകാര്യം ചെയ്യുന്നുണ്ട്. പുതിയതായി ജോലിക്കെടുക്കുന്ന മിക്ക സർക്കാർ ജീവനക്കാർക്കും ഇനി സർക്കാർ നൽകുന്ന സെൽഫോണുകൾ ലഭിക്കില്ലെന്ന് SSC സ്ഥിരീകരിച്ചിട്ടുണ്ട്. സ്ഥാനത്തിന്റെ പ്രാധാന്യമോ പ്രവർത്തനപരമായ ആവശ്യകതയോ ഉണ്ടെങ്കിൽ മാത്രമേ സെൽഫോണുകൾ തുടർന്നും ലഭ്യമാക്കുകയുള്ളൂ എന്ന് SSC വക്താവ് അറിയിച്ചു.

പൊതു ഫണ്ടുകളുടെ ഉത്തരവാദിത്തമുള്ള ഉപയോഗം ഉറപ്പാക്കിക്കൊണ്ട് ആധുനികവും സുരക്ഷിതവും കാര്യക്ഷമവുമായ ടെലിഫോണി സൊല്യൂഷനുകൾ നൽകാനാണ് SSC ലക്ഷ്യമിടുന്നത്. 2024-25 സാമ്പത്തിക വർഷത്തിൽ മൊബൈൽ ഫോണുകൾക്കായി ഷെയേർഡ് സർവീസസ് കാനഡ 89.4 ദശലക്ഷം ഡോളറാണ് ചെലവഴിച്ചത്. ഇത് 2023-24 ലെ 157.7 ദശലക്ഷം ഡോളറിൽ നിന്നും 2022-23 ലെ 174.1 ദശലക്ഷം ഡോളറിൽ നിന്നും വലിയ കുറവാണ്. 2025-26 ലെ ഡിപ്പാർട്ട്‌മെന്റൽ പ്ലാൻ അനുസരിച്ച്, വിദേശത്തുള്ള മിഷനുകളിൽ പ്രവർത്തിക്കുന്നവരടക്കം എല്ലാ സർക്കാർ ജീവനക്കാർക്കും സോഫ്റ്റ്‌ഫോൺ ടെലിഫോണി സൊല്യൂഷൻ നടപ്പിലാക്കുന്നതിൽ SSC ശ്രദ്ധ കേന്ദ്രീകരിക്കുന്നുണ്ട്.

സർക്കാർ പറയുന്നതനുസരിച്ച്, സോഫ്റ്റ്‌ഫോൺ സാങ്കേതികവിദ്യ “സുരക്ഷിതവും, പ്രകൃതിക്ക് ദോഷകരമല്ലാത്തതും, ഉപയോഗിക്കാൻ എളുപ്പമുള്ളതുമായ ഒരു സംവിധാനമാണെന്നാണ്. ഇത് സർക്കാർ ചെലവുകൾ കുറയ്ക്കുകയും എന്റർപ്രൈസ് തലത്തിൽ വിവരങ്ങൾ സംരക്ഷിക്കുകയും ചെയ്യുന്നതിലൂടെ GC-യുടെ സുരക്ഷ വർദ്ധിപ്പിക്കാൻ സഹായിക്കും. ഡെസ്‌ക്ടോപ്പ് കമ്പ്യൂട്ടറുകളിലോ ടാബ്‌ലെറ്റുകളിലോ സോഫ്റ്റ്‌ഫോൺ സോഫ്റ്റ്‌വെയർ ഉപയോഗിച്ച് ജോലി സംബന്ധമായ കോളുകൾ ചെയ്യുന്നതിലൂടെ മൊബൈൽ ഉപകരണങ്ങളോ ഡെസ്ക് ഫോണുകളോ ഉപയോഗിക്കുന്നത് കുറയ്ക്കാൻ കഴിയുമെന്ന് സർക്കാർ വ്യക്തമാക്കുന്നു. 2024-25 ൽ 15,000 ഫിക്സഡ് ലൈനുകൾ ഒഴിവാക്കിയതായും മൂന്ന് വർഷത്തിനുള്ളിൽ 90 ശതമാനം ലൈനുകളും വിച്ഛേദിക്കുന്നതിലൂടെ “അവശ്യമല്ലാത്ത ലൈനുകൾ വിച്ഛേദിക്കുന്നതിലും” സർക്കാർ ശ്രദ്ധ കേന്ദ്രീകരിക്കുന്നുണ്ട്. ഈ നീക്കം, അടുത്ത മൂന്ന് വർഷത്തിനുള്ളിൽ വകുപ്പ് ബഡ്ജറ്റുകളിൽ 15 ശതമാനം ലാഭം കണ്ടെത്താനുള്ള ഫെഡറൽ സർക്കാരിന്റെ വിശാലമായ പദ്ധതിയുടെ ഭാഗമാണ്.