കാനഡയിൽ അഞ്ചാംപനി കേസുകൾ വർദ്ധിക്കുന്നത് ആരോഗ്യ വിദഗ്ധരെയും പൊതു ജനാരോഗ്യ പ്രവർത്തകരെയും ആശങ്കയിലാക്കുന്നു. ആൽബെർട്ടയിലും ഒന്റാറിയോയിലുമാണ് രോഗബാധ കൂടുതലെങ്കിലും, മറ്റ് പ്രവിശ്യകളിലും സ്ഥിതി അതീവ ഗുരുതരമാണ്. ഈ വർഷം ഇതുവരെ ആൽബെർട്ടയിലും ഒന്റാറിയോയിലും 3,400-ലധികം പേർക്ക് അഞ്ചാംപനി സ്ഥിരീകരിച്ചിട്ടുണ്ട്. അഞ്ചാംപനി വായുവിലൂടെ അതിവേഗം പകരുന്ന ഒരു വൈറസ് രോഗമാണെന്ന് പകർച്ചവ്യാധി വിദഗ്ധർ മുന്നറിയിപ്പ് നൽകുന്നുണ്ട്. വാക്സിനേഷൻ എടുക്കാത്തവരിൽ രോഗം പടരാനുള്ള സാധ്യത കൂടുതലാണെന്നും ഇത് കാനഡയെ “മീസിൽസ് മുക്ത രാജ്യം” എന്നതിൽ നിന്ന് മാറ്റിയേക്കാമെന്നും ആരോഗ്യ വിദഗ്ധർ ചൂണ്ടിക്കാട്ടുന്നു.
സസ്കച്ചെവാനിലെ റോയൽ യൂണിവേഴ്സിറ്റി ഹോസ്പിറ്റലിലെ ക്ലിനിക്കൽ മൈക്രോബയോളജി വിഭാഗം മേധാവി ജോസഫ് ബ്ലോണ്ടോയുടെ അഭിപ്രായത്തിൽ, രോഗ വ്യാപനം കൂടുന്നതിനനുസരിച്ച് രോഗബാധിതരായ ആളുകൾക്ക് അറിയാതെ തന്നെ മറ്റുള്ളവരുമായി ഇടപഴകാനും രോഗം പടർത്താനുമുള്ള സാധ്യത വർദ്ധിക്കുന്നു. പനി, ചുമ, കണ്ണിലെ ചുവപ്പ്, മോണയിലെ വെളുത്ത പാടുകൾ, മുഖത്തു നിന്ന് തുടങ്ങി ശരീരത്തിലേക്ക് പടരുന്ന തിണർപ്പ് എന്നിവയാണ് അഞ്ചാം പനിയുടെ പ്രധാന ലക്ഷണങ്ങൾ. ഈ രോഗം ന്യുമോണിയ, തലച്ചോറിലെ അണുബാധ തുടങ്ങിയ ഗുരുതരമായ സങ്കീർണ്ണതകളിലേക്ക് നയിക്കാനും മരണകാരണമാകാനും സാധ്യതയുണ്ടെന്ന് ഡോ. ബ്ലോണ്ടോ പറയുന്നു.
മാനിറ്റോബയിലും ഈ അഞ്ചാംപനി കേസുകളിൽ കാര്യമായ വർദ്ധനവ് രേഖപ്പെടുത്തിയിട്ടുണ്ട്. ഇവിടെ ഏറ്റവും കൂടുതൽ രോഗബാധയുള്ളത് വാക്സിനേഷൻ നിരക്ക് കുറഞ്ഞ തെക്കുപടിഞ്ഞാറൻ മേഖലയിലാണ്. വാക്സിനേഷൻ ലഭ്യത ഉറപ്പാക്കാൻ, മാനിറ്റോബയിൽ വീടുകളിലെത്തി വാക്സിൻ നൽകുന്ന ക്ലിനിക്കുകളും, മൊബൈൽ ക്ലിനിക്കുകളും, വൈകുന്നേരങ്ങളിൽ പ്രവർത്തിക്കുന്ന ക്ലിനിക്കുകളും ആരംഭിച്ചിട്ടുണ്ട്. അഞ്ചാംപനി വ്യാപിക്കുന്ന ചില പ്രവിശ്യകളിൽ ആറു മാസം മുതൽ 12 മാസം വരെ പ്രായമുള്ള കുഞ്ഞുങ്ങൾക്ക് “ഡോസ് സീറോ” വാക്സിൻ നൽകാനുള്ള യോഗ്യതയുണ്ട്. ഇത് കുട്ടികൾക്ക് നേരത്തെ പ്രതിരോധശേഷി നൽകാൻ സഹായിക്കും. കാനഡയിലെ കാട്ടുതീ കാരണം മാറ്റിപ്പാർപ്പിച്ചവർക്കും വാക്സിൻ നൽകുന്നുണ്ട്.
അഞ്ചാംപനി കേസുകൾ റിപ്പോർട്ട് ചെയ്യപ്പെടുന്നത് യഥാർത്ഥ സംഖ്യകളേക്കാൾ കുറവാകാമെന്നും വിദഗ്ധർ മുന്നറിയിപ്പ് നൽകുന്നു. അഞ്ചാംപനി ബാധിച്ച ഓരോ വ്യക്തിക്കും, രോഗം വന്നിട്ടും പരിശോധിക്കപ്പെടാതെ പോയ നിരവധി പേർ ഉണ്ടാവാമെന്ന് ഡോ. ഡേവിന്ദർ സിംഗ് അഭിപ്രായപ്പെടുന്നു. വാക്സിനേഷൻ എടുക്കാത്തവർക്കിടയിലാണ് രോഗം പ്രധാനമായും പടരുന്നത്. മീസിൽസ്, മംപ്സ്, റുബെല്ല (MMR) വാക്സിൻ രണ്ട് ഡോസുകളായി എടുക്കുന്നത് 97% വരെ സംരക്ഷണം നൽകുന്നു. പൊതു ജനാരോഗ്യത്തിന്റെ പ്രാധാന്യം കണക്കിലെടുത്ത്, അഞ്ചാംപനി തടയാൻ വാക്സിനേഷൻ ഡ്രൈവുകൾ കാര്യക്ഷമമാക്കേണ്ടത് അത്യന്താപേക്ഷിതമാണ്.
