മോൺട്രിയലിലെ പൊതുഗതാഗത സംവിധാനം ആധുനികമാക്കാൻ ബ്രിട്ടീഷ് കമ്പനിക്ക് 146 മില്യൺ ഡോളറിന്റെ കരാർ ലഭിച്ചു. Autorité régionale de transport métropolitain (ARTM) ലണ്ടൻ ആസ്ഥാനമായുള്ള Masabi എന്ന കമ്പനിയുമായാണ് 146 മില്യൺ ഡോളറിന്റെ കരാർ ഒപ്പിട്ടത്. ഇതനുസരിച്ച് മോൺട്രിയലിൽ നിലവിലുള്ള OPUS കാർഡ് സംവിധാനം മാറ്റി പുതിയ ഡിജിറ്റൽ ടിക്കറ്റിംഗ് കൊണ്ടുവരും.
Masabi-യുടെ ‘Justride’ എന്ന ക്ലൗഡ് അധിഷ്ഠിത പ്ലാറ്റ്ഫോം ലോകമെമ്പാടുമുള്ള 200-ൽ അധികം ട്രാൻസിറ്റ് ഏജൻസികൾ ഉപയോഗിക്കുന്നുണ്ട്. ലോസ് ഏഞ്ചൽസ്, കാൽഗറി, ന്യൂയോർക്ക് തുടങ്ങിയ നഗരങ്ങളിലെല്ലാം ഇത് വിജയകരമായി പ്രവർത്തിക്കുന്നുണ്ട്. ഈ പുതിയ സംവിധാനം വരുന്നതോടെ യാത്രക്കാർക്ക് തങ്ങളുടെ കോൺടാക്റ്റ്ലെസ് ബാങ്ക് കാർഡുകൾ, മൊബൈൽ വാലറ്റുകൾ, സ്മാർട്ട് കാർഡുകൾ എന്നിവ ഉപയോഗിച്ച് ടാപ്പ് ചെയ്ത് യാത്ര ചെയ്യാനാകും.
20 വർഷത്തോളം ഉപയോഗിച്ചിരുന്ന OPUS കാർഡ് സംവിധാനത്തിനാണ് ഇതിലൂടെ മാറ്റം വരുന്നത്. ഈ വലിയ പദ്ധതിക്ക് ഏകദേശം 12,000-ൽ അധികം ഉപകരണങ്ങളിൽ മാറ്റങ്ങൾ വരുത്തേണ്ടതുണ്ട്. Société de transport de Montréal (STM), Réseau de transport de Longueuil (RTL), Société de transport de Laval (STL), exo കമ്യൂട്ടർ ട്രെയിൻ ശൃംഖല എന്നിവയുൾപ്പെടെ അഞ്ച് പ്രദേശങ്ങളിലെ പങ്കാളികളുമായി സഹകരിച്ചാണ് Masabi ഈ പദ്ധതി നടപ്പിലാക്കുന്നത്.
Concerto എന്ന് പേരിട്ടിരിക്കുന്ന ഈ പദ്ധതി, പൊതുഗതാഗത ഉപഭോക്താക്കളുടെ യാത്രാനുഭവം മെച്ചപ്പെടുത്താൻ സഹായിക്കുമെന്ന് ARTM എക്സിക്യൂട്ടീവ് ഡയറക്ടർ ബെനോയിട്ട് ജെൻറോൺ പറഞ്ഞു. ഈ വർഷം അവസാനത്തോടെ ഉപഭോക്താക്കൾക്ക് സ്മാർട്ട്ഫോൺ ഉപയോഗിച്ച് ടിക്കറ്റുകൾ സ്കാൻ ചെയ്യാനുള്ള സൗകര്യവും ലഭ്യമാകും.
നിലവിൽ കുറച്ച് ആളുകളിൽ ഇത് പരീക്ഷണാടിസ്ഥാനത്തിൽ നടന്നുവരികയാണ്. മൊത്തം ചെലവ് കുറയ്ക്കാനും നിലവിലുള്ള ഉപകരണങ്ങൾ ഉപയോഗിക്കാനും സാധിച്ചതുകൊണ്ട് ഈ പദ്ധതിക്ക് ലോകത്തിലെ സമാന പദ്ധതികളെ അപേക്ഷിച്ച് ചെലവ് കുറവാണെന്നും ARTM അറിയിച്ചു.
