വടക്കൻ ആൽബർട്ടയിലെ ലെസ്സർ സ്ലേവ് തടാകത്തിൽ കഴിഞ്ഞ വെള്ളിയാഴ്ചയുണ്ടായ (ജൂലൈ 11) ബോട്ടപകടത്തിൽ കാണാതായ ഗ്രാന്റ് പ്രയറി സ്വദേശിയായ 39 വയസ്സുകാരൻ കോൾ കണ്ണിംഗ്ഹാമിന്റെ മൃതദേഹം കണ്ടെത്തി. അഞ്ച് പേരുണ്ടായിരുന്ന ബോട്ടിൽ നിന്ന് മറ്റ് നാല് പേരെ കഴിഞ്ഞ വെള്ളിയാഴ്ച തന്നെ രക്ഷപ്പെടുത്തിയിരുന്നു.
കഴിഞ്ഞ വെള്ളിയാഴ്ച രാത്രി 10:30 ഓടെയാണ് ഹൈ പ്രെയറി ആർ.സി.എം.പിക്ക് വിവരമ ലഭിച്ചത്. ശക്തമായ കാറ്റിൽ ബോട്ട് നിയന്ത്രണം വിട്ട് ഒഴുകിപ്പോയതിനെ തുടർന്ന് ഒരു മണൽത്തിട്ടയിൽ കുടുങ്ങിയ ഒരു കൂട്ടം ആളുകളെക്കുറിച്ചായിരുന്നു സന്ദേശം. ബോട്ടിലുണ്ടായിരുന്ന അഞ്ച് പേരിൽ ഒരാൾ, ഒഴുകിപ്പോയ ബോട്ട് വീണ്ടെടുക്കാൻ ശ്രമിക്കുന്നതിനിടെ വെള്ളത്തിനടിയിലേക്ക് ഒഴുകിപ്പോകുകയും കാണാതാവുകയുമായിരുന്നു. ശേഷിച്ച നാല് പേരെ ബിഗ് ലേക്സ് കൗണ്ടി ഫയർ ഡിപ്പാർട്ട്മെന്റ് രക്ഷപ്പെടുത്തി. ആർ.സി.എം.പി., അൽബെർട്ട ഡിസ്ട്രിക്റ്റ് ജനറൽ ഇൻവെസ്റ്റിഗേഷൻ വിഭാഗം, പ്രവിശ്യാ തിരച്ചിൽ, രക്ഷാപ്രവർത്തന ഡൈവ് ടീം, കൂടാതെ നിരവധി പ്രാദേശിക സന്നദ്ധപ്രവർത്തകർ എന്നിവരുടെ സഹായത്തോടെ രക്ഷാപ്രവർത്തനം അതിവേഗം വിപുലീകരിച്ചു.
കാണാതായ ബോട്ട് ഇന്നലെ (തിങ്കളാഴ്ച) ഒരു പ്രാദേശിക ഹെലികോപ്റ്റർ കണ്ടെത്തുകയുണ്ടായി. തുടർന്ന്, ഇന്ന് രാവിലെ സോണാർ ഉപകരണം ഉപയോഗിച്ച് ഒരു മത്സ്യത്തൊഴിലാളിയാണ് കാണാതായ കോൾ കണ്ണിംഗ്ഹാമിന്റെ മൃതദേഹം വെള്ളത്തിനടിയിൽ നിന്ന് കണ്ടെത്തിയത്. ഗ്രാൻഡ് പ്രയറി കമ്മ്യൂണിറ്റിയിലെ അംഗവും അഞ്ച് കുട്ടികളുടെ പിതാവുമാണ് മരണപ്പെട്ട കോൾ കണ്ണിംഗ്ഹാം. “ചുറ്റുമുള്ള എല്ലാവരിലും കോൾ ശാശ്വതമായ സ്വാധീനം ചെലുത്തിയിരുന്നു, അദ്ദേഹത്തെ വല്ലാതെ മിസ് ചെയ്യും,” സുഹൃത്ത് ജെന്ന ലെറ്റെൻഡ്രെ ഒരു പ്രസ്താവനയിൽ പറഞ്ഞു.
സംഭവത്തെക്കുറിച്ചുള്ള അന്വേഷണം തുടരുകയാണെന്നും പോസ്റ്റ്മോർട്ടം റിപ്പോർട്ട് കാത്തിരിക്കുകയാണെന്നും ആർ.സി.എം.പി. അറിയിച്ചു. ശക്തമായ കാറ്റാണ് ബോട്ട് ഒഴുകിപ്പോകാൻ സാധ്യതയുള്ള പ്രധാന കാരണമെന്ന് ആൽബെർട്ട ആർ.സി.എം.പി.യിലെ കോർപ്പറൽ മാത്യു ഹവൽ നിരീക്ഷിച്ചു. രക്ഷാപ്രവർത്തനങ്ങൾക്കും മൃതദേഹം വീണ്ടെടുക്കുന്നതിനും ലഭിച്ച സാമൂഹിക പിന്തുണയെയും അദ്ദേഹം പ്രശംസിച്ചു.
Northern Alberta boating accident: Body of missing 39-year-old found
