ഒരു കാലത്ത് ഹോങ്കോങ്ങിലെ ജനാധിപത്യ പ്രക്ഷോഭങ്ങളുടെ അവസാനത്തെ പ്രധാന ശക്തിയായിരുന്ന സോഷ്യൽ ഡെമോക്രാറ്റ്സ് ലീഗ് (League of Social Democrats – LSD) എന്ന പാർട്ടി പിരിച്ചുവിട്ടു. ഏകദേശം 20 വർഷത്തോളം ഹോങ്കോങ്ങിന്റെ രാഷ്ട്രീയ രംഗത്ത് സജീവമായിരുന്ന ഈ പാർട്ടി, തെരുവു പ്രതിഷേധങ്ങൾക്ക് പേരുകേട്ടവരായിരുന്നു. “ചാരം ആകാൻ ഞങ്ങൾ ഒരുക്കമാണ്, വെറും പൊടിയാകില്ല” എന്ന മുദ്രാവാക്യവുമായി നിലകൊണ്ടിരുന്ന ഒരു പാർട്ടിയാണ് ഇപ്പോൾ ഇല്ലാതാകുന്നത്, ഹോങ്കോങ്ങിൽ ഈ വർഷം ഇല്ലാതാകുന്ന മൂന്നാമത്തെ പ്രധാന പ്രതിപക്ഷ പാർട്ടിയാണ് ഇത്.
LSD-യുടെ ചെയർപേഴ്സൺ ചാൻ പോ യിംഗ് (Chan Po Ying) പറയുന്നത് “നിയന്ത്രണ രേഖകൾ ഇപ്പോൾ എല്ലായിടത്തും ഉണ്ട്” എന്നാണ്. “സമ്മർദ്ദം കാരണമാണ് പിരിച്ചുവിടാൻ തീരുമാനിച്ചത്.” എന്നും അവർ കൂട്ടിച്ചേർത്തു. ഹോങ്കോങ്ങിലെ കാര്യങ്ങൾ എല്ലാം രാഷ്ട്രീയവൽക്കരിക്കപ്പെട്ടു എന്നും അവർ പറഞ്ഞു.
ദേശീയ സുരക്ഷാ നിയമം ബീജിംഗ് നടപ്പിലാക്കിയതിന്റെ അഞ്ചാം വാർഷികത്തിന് ദിവസങ്ങൾ മാത്രം ശേഷിക്കെയാണ് ഈ പ്രഖ്യാപനം. പാർട്ടിയുടെ ബാങ്ക് അക്കൗണ്ടുകൾ 2023-ൽ അടച്ചുപൂട്ടിയെന്നും കഴിഞ്ഞ അഞ്ച് വർഷത്തിനിടെ ആറ് പാർട്ടി അംഗങ്ങളെ തടവിലാക്കിയെന്നും അവർ വെളിപ്പെടുത്തി. ദേശീയ സുരക്ഷാ നിയമം ഹോങ്കോങ്ങിൽ ക്രമസമാധാനം പുനഃസ്ഥാപിക്കാൻ ആവശ്യമാണെന്ന് അധികാരികൾ പറയുന്നുണ്ടെങ്കിലും, പ്രതിപക്ഷത്തെ ഇല്ലാതാക്കാൻ ഇത് ഉപയോഗിക്കുന്നു എന്ന് വിമർശകർ ചൂണ്ടിക്കാട്ടുന്നു.
ഹോങ്കോങ്ങിലെ ഭൂരിഭാഗം രാഷ്ട്രീയ പ്രതിപക്ഷ നേതാക്കളും ഒന്നുകിൽ നാടുവിട്ടുപോയി അല്ലെങ്കിൽ തടവിലാക്കപ്പെട്ടു. ഒരു രാഷ്ട്രീയ പാർട്ടി നടത്തുന്നത് ഇപ്പോൾ സുരക്ഷിതമല്ലെന്നും ഹോങ്കോങ്ങിൽ രാഷ്ട്രീയ അവകാശങ്ങൾ ഏതാണ്ട് പൂർണ്ണമായും ഇല്ലാതായി എന്നും പാർട്ടി വൈസ് ചെയർമാൻ ഡിക്സൺ ചൗ (Dickson Chau) മാധ്യമങ്ങളോട് പറഞ്ഞു.
ഒരുമിച്ച് നിന്നാൽ എത്രത്തോളം ശക്തരാകുമെന്ന് ആളുകൾ മറന്നുപോകുമെന്നും, ഒരു സാധാരണ പൗരന് പോലും സ്വന്തം അവകാശങ്ങൾ വിനിയോഗിക്കാൻ പ്രയാസകരമായ സാഹചര്യമാണ് ഹോങ്കോങ്ങിൽ നിലവിലുള്ളതെന്നും ചൗ ആശങ്കപ്പെടുന്നു. ഹോങ്കോങ്ങിൽ ഒരു ആക്ടിവിസ്റ്റ് ആയതുകൊണ്ട് മാത്രം ഇങ്ങനെയൊരു പ്രതിസന്ധി നേരിടേണ്ടി വരുമെന്ന് ഒരിക്കലും പ്രതീക്ഷിച്ചില്ല എന്നും അദ്ദേഹം കൂട്ടിച്ചേർത്തു.
