ഓട്ടാവയുടെ ഡൗൺടൗൺ പ്രദേശത്തുള്ള ഹൈവേ 417-ൽ കിഴക്കോട്ടുള്ള പാതകൾ നാല് മണിക്കൂറോളം അടച്ചിട്ടതിന് ശേഷം വ്യാഴാഴ്ച ഉച്ചയ്ക്ക് ശേഷം ഗതാഗതത്തിനായി തുറന്നു കൊടുത്തു. രണ്ട് വാഹനങ്ങൾ കൂട്ടിയിടിച്ചതിനെ തുടർന്നായിരുന്നു ഹൈവേ അടച്ചിട്ടത്.
രാവിലെ 11:55-ഓടെ നിക്കോളാസ് സ്ട്രീറ്റിന് തൊട്ടുമുമ്പ് ഹൈവേ 417-ന്റെ ഇടതുവശത്തെ പാതയിൽ അപകടം നടന്നതായി അടിയന്തര സേനാംഗങ്ങൾക്ക് വിവരം ലഭിച്ചു.
ഒരു വാഹനം പിന്നിൽ നിന്ന് ഇടിക്കുകയും തുടർന്ന് മീഡിയനിൽ തട്ടുകയുമായിരുന്നുവെന്ന് ഓട്ടാവ പാരാമെഡിക് സർവീസ് വക്താവ് അറിയിച്ചു. അപകടത്തിൽപ്പെട്ട ഒരു വാഹനത്തിലെ ഡ്രൈവരെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിച്ചു. വാഹനത്തിലുണ്ടായിരുന്ന വസ്തുക്കൾ തട്ടി ഡ്രൈവർക്ക് പരിക്കേറ്റതാകമെന്നാണ് പാരാമെഡിക് വക്താവ് പറയുന്നത്.
മന്ത്രാലയം പുറത്തുവിട്ട സിസിടിവി ദൃശ്യങ്ങളിൽ ഒരു വാഹനം ഹൈവേയിൽ അതിവേഗ പാതയ്ക്ക് കുറുകെ നിൽക്കുന്നതായാണ് കാണപ്പെടുന്നത്. ആദ്യം രണ്ട് പാതകൾ മാത്രമാണ് അന്വേഷണത്തിനായി ഒന്റാറിയോ പ്രൊവിൻഷ്യൽ പോലീസ് അടച്ചത്. എന്നാൽ, ഉച്ചയ്ക്ക് 2 മണിയോടെ കിഴക്കോട്ടുള്ള എല്ലാ പാതകളും അന്വേഷണത്തിനായി പൂർണ്ണമായി അടച്ചിടുകയായിരുന്നു.
ഇത് മെറ്റ്കാൾഫ് മുതൽ വുഡ്റോഫ് അവന്യൂ വരെ ഹൈവേ 417-ൽ കിഴക്കോട്ടുള്ള പാതകളിൽ വലിയ ഗതാഗതക്കുരുക്കിന് കാരണമായി. അപകടത്തെക്കുറിച്ച് ഒന്റാറിയോ പ്രൊവിൻഷ്യൽ പോലീസ് അന്വേഷണം തുടരുകയാണ്.
