കാനഡയിലെ ഭവന വിൽപ്പന രംഗത്ത് പുതിയ സൂചനകൾ നൽകി മേയ് മാസത്തിൽ നേരിയ വർധനവ് രേഖപ്പെടുത്തി. 2025 മേയ് മാസത്തിലെ വീടു വിൽപ്പന കഴിഞ്ഞ വർഷം ഇതേ കാലയളവിനെ അപേക്ഷിച്ച് 4.3% കുറവ് രേഖപ്പെടുത്തിയെങ്കിലും, ഏപ്രിൽ മാസത്തെ അപേക്ഷിച്ച് 3.6% വർധനവ് ഉണ്ടായി. കഴിഞ്ഞ ആറു മാസത്തിനിടയിലെ ആദ്യത്തെ മാസന്തര വർധനവാണിത്. ഇത് കനേഡിയൻ റിയൽ എസ്റ്റേറ്റ് അസോസിയേഷൻ (CREA) പുറത്തുവിട്ട കണക്കുകളിലാണ് വ്യക്തമാക്കുന്നത്.
വിപണി ഇപ്പോഴും മന്ദഗതിയിലാണെങ്കിലും, കാര്യമായ തിരിച്ചടി നേരിടുന്നില്ലെന്ന് CREA-യുടെ സീനിയർ ഇക്കണോമിസ്റ്റ് ഷോൺ കാത്കാർട്ട് നിരീക്ഷിച്ചു. 2025-ന്റെ തുടക്കത്തിൽ വ്യാപാര നികുതികളുമായി ബന്ധപ്പെട്ട് നിലനിന്ന അനിശ്ചിതത്വങ്ങൾ കാരണം വീട് വാങ്ങൽ മാറ്റിവെച്ചവർ ഇപ്പോൾ വീണ്ടും സജീവമാകുന്നതിൻ്റെ സൂചനയാണിതെന്നും അദ്ദേഹം വിലയിരുത്തി.
മേയ് മാസത്തിൽ പുതിയ ലിസ്റ്റിംഗുകളുടെ എണ്ണത്തിൽ 3.1% വർധനവ് ഉണ്ടായി.
മേയ് അവസാനത്തോടെ കാനഡയിൽ വിൽപ്പനയ്ക്ക് ലഭ്യമായ ആകെ വീടുകളുടെ എണ്ണം 2,01,880 ആണ്. ഇത് ഒരു വർഷം മുമ്പുള്ളതിനേക്കാൾ 13.2% കൂടുതലാണെങ്കിലും, ദീർഘകാല ശരാശരിയായ 2,11,500 ലിസ്റ്റിംഗുകളേക്കാൾ 5% കുറവാണിത്. അതേസമയം, മേയ് മാസത്തിൽ വിറ്റ വീടുകളുടെ ശരാശരി വില $691,299 ആയി കുറഞ്ഞു, ഇത് കഴിഞ്ഞ വർഷത്തെ അപേക്ഷിച്ച് 1.8% ഇടിവാണ് രേഖപ്പെടുത്തുന്നത്.
കാനഡയിലെ ഭവന വിപണി ഇപ്പോഴും പൂർണ്ണമായും ഉണർന്നിട്ടില്ലെങ്കിലും, അത് വീണ്ടും താഴേക്ക് പതിക്കുന്നില്ലെന്നും കെട്ടിട നിർമ്മാണ പ്രവർത്തനങ്ങൾ തുടരുന്നുണ്ടെന്നും BMO-യുടെ സീനിയർ ഇക്കണോമിസ്റ്റ് റോബർട്ട് കവ്ചിക് അഭിപ്രായപ്പെട്ടു. വാണിജ്യ മേഖലയിലെ അനിശ്ചിതത്വങ്ങൾ കുറഞ്ഞതും, രാഷ്ട്രീയപരമായ കാര്യങ്ങളിൽ വ്യക്തത വന്നതും, ഉപഭോക്താക്കളുടെ ആത്മവിശ്വാസം വർദ്ധിക്കാൻ തുടങ്ങിയതുമാണ് വിപണിയിലെ ഈ നേരിയ മാറ്റത്തിന് പിന്നിലെ പ്രധാന കാരണങ്ങളായി കവ്ചിക് ചൂണ്ടിക്കാട്ടുന്നത്. എന്നിരുന്നാലും, ഭവന വായ്പാ നിരക്കുകളിൽ കാര്യമായ കുറവുണ്ടായാൽ മാത്രമേ യഥാർത്ഥമായ ഒരു വീണ്ടെടുക്കലിനും നിക്ഷേപകരുടെ തിരിച്ചുവരവിനും സാധ്യതയുള്ളൂവെന്നും അദ്ദേഹം കൂട്ടിച്ചേർത്തു.
