ഒന്റാറിയോയിലെ നയാഗ്ര വെള്ളച്ചാട്ടത്തിനടുത്തുള്ള പ്രശസ്തമായ മറൈൻലാൻഡിന്റെ പ്രവർത്തനം അനിശ്ചിതത്വത്തിൽ. 2025-ൽ ഇത് വീണ്ടും തുറക്കുമോ എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണമൊന്നും ലഭ്യമല്ല. കഴിഞ്ഞ വർഷം ജൂണോടെയാണ് പാർക്ക് വീണ്ടും തുറന്നത്.
പാർക്കിന്റെ ഉടമസ്ഥാവകാശം മാറുന്നതുമായി ബന്ധപ്പെട്ട ചർച്ചകൾ നടക്കുകയാണെന്ന് മറൈൻലാൻഡ് അധികൃതർ അറിയിച്ചു. മൃഗങ്ങളുടെ ദീർഘകാല ക്ഷേമത്തിന് മുൻഗണന നൽകിക്കൊണ്ടാണ് ഈ മാറ്റങ്ങളെന്നാണ് അവരുടെ വിശദീകരണം.
അതേസമയം, മൃഗസംരക്ഷണവുമായി ബന്ധപ്പെട്ട് നിരവധി അന്വേഷണങ്ങൾ മറൈൻലാൻഡിനെതിരെ നടന്നിട്ടുണ്ട്. 2019 മുതൽ ഇവിടെ 18 ബെലൂഗ തിമിംഗലങ്ങൾ, ഒരു ഓർക്ക, ഒരു ഡോൾഫിൻ എന്നിവ ചത്തതായി റിപ്പോർട്ടുണ്ട്. 2020 മുതൽ ഒന്റാറിയോയുടെ ആനിമൽ വെൽഫെയർ സർവീസസ് ഇരുന്നൂറിലധികം തവണ പാർക്കിൽ സന്ദർശനം നടത്തിയിട്ടുണ്ട്. 2024-ൽ കരടികളെ പാർപ്പിച്ച കൂടുകൾ അപര്യാപ്തമാണെന്ന് കണ്ടെത്തിയതിനെ തുടർന്ന് മൃഗങ്ങളോടുള്ള ക്രൂരതയുമായി ബന്ധപ്പെട്ട നിയമപ്രകാരം മറൈൻലാൻഡ് കുറ്റക്കാരെന്ന് കണ്ടെത്തുകയും ചെയ്തിരുന്നു.
സ്ഥിരമായി 500-നും 700-നും ഇടയിൽ സീസണൽ ജീവനക്കാരെ നിയമിച്ചിരുന്ന മറൈൻലാൻഡ് ഈ വർഷം പുതിയ തൊഴിലവസരങ്ങളൊന്നും പ്രഖ്യാപിച്ചിട്ടില്ല.
മൃഗങ്ങളെ കയറ്റുമതി ചെയ്യാനുള്ള അനുമതിക്കായി മറൈൻലാൻഡ് ഫെഡറൽ സർക്കാരിനെ സമീപിച്ചിട്ടുണ്ട്. വംശനാശഭീഷണി നേരിടുന്ന ജീവിവർഗ്ഗങ്ങളുടെ അന്താരാഷ്ട്ര വ്യാപാരത്തിനുള്ള അനുമതികൾ നേടിയെടുക്കുന്നതിനായി ഒരു ലോബിസ്റ്റിനെയും അവർ നിയമിച്ചു. സാമ്പത്തികപരമായ നീക്കങ്ങളും പാർക്കിൽ നടക്കുന്നു. ഒരു മറൈൻലാൻഡ് പ്രോപ്പർട്ടി 2.7 മില്യൺ ഡോളറിന് വിറ്റു. പാർക്കിന്റെ പ്രവർത്തനം തുടരുന്നതിനും മൃഗങ്ങളുടെ കൈമാറ്റത്തിന് ഫണ്ടിംഗ് ലഭ്യമാക്കുന്നതിനും വേണ്ടി, ഭൂമി താൽക്കാലികമായി വിഭജിച്ച് ധനസഹായം നേടുന്ന ശ്രമത്തിലാണ്.
