സ്പാനിഷ് ലാലിഗ ഫുട്ബോളിലെ ഏറ്റവും പ്രശസ്തമായ പോരാട്ടം എൽ ക്ലാസിക്കോ ഇന്ന് വീണ്ടും അരങ്ങേറുകയാണ്. ബാഴ്സലോണയും റയൽ മാഡ്രിഡും തമ്മിലുള്ള ഈ മത്സരം വെറുമൊരു പോരാട്ടമല്ല, മറിച്ച് ഇത്തവണത്തെ ലാലിഗ കിരീടം ആരുടേതാകുമെന്ന് തീരുമാനിക്കുന്ന നിർണായക ഘട്ടമാണ്. നിലവിൽ ഇരു ടീമുകളും 34 മത്സരങ്ങൾ പൂർത്തിയാക്കി കഴിഞ്ഞു. ബാഴ്സലോണ 25 ജയവും നാല് സമനിലയും അടക്കം 79 പോയിന്റുമായി ഒന്നാം സ്ഥാനത്താണ്. റയൽ മാഡ്രിഡ് 23 ജയവും അഞ്ച് സമനിലയും അടക്കം 75 പോയിന്റുമായി രണ്ടാം സ്ഥാനത്തും.
ഇന്നത്തെ മത്സരഫലം ലാലിഗ കിരീടത്തിന്റെ ഭാവി നിർണയിക്കും. ബാഴ്സലോണയ്ക്ക് ജയിക്കാനായാൽ, റയൽ മാഡ്രിഡുമായുള്ള പോയിന്റ് വ്യത്യാസം വർദ്ധിപ്പിച്ച് കിരീടം ഉറപ്പിക്കാനാകും. എന്നാൽ റയൽ മാഡ്രിഡ് ജയിച്ചാൽ, ടീമുകൾ തമ്മിലുള്ള പോയിന്റ് വ്യത്യാസം കുറയുകയും, കിരീട പോരാട്ടം കൂടുതൽ ആവേശകരമാവുകയും ചെയ്യും. സീസണിന്റെ അവസാന ഘട്ടത്തിൽ ഈ മത്സരം ടീമുകളുടെ മാനസിക ഉറപ്പിനും വലിയ പ്രാധാന്യമുണ്ട്.
ഈ ഫുട്ബോൾ സീസണിൽ ഇരു ടീമുകളും നേർക്കുനേർ വരുന്നത് ഇത് നാലാം തവണയാണ്. ഇതുവരെ നടന്ന മൂന്ന് ഏറ്റുമുട്ടലുകളിലും ബാഴ്സലോണയാണ് വിജയം നേടിയിട്ടുള്ളത്. കഴിഞ്ഞ മാസം നടന്ന കോപ്പ ഡെൽ റേ ഫൈനലിൽ ബാഴ്സലോണ രണ്ടിനെതിരെ മൂന്ന് ഗോളുകൾക്ക് റയൽ മാഡ്രിഡിനെ പരാജയപ്പെടുത്തി. ഈ മത്സരം റയൽ മാഡ്രിഡിന് പ്രതികാരത്തിനുള്ള അവസരമാണ്. ആരാധകർക്ക് മറക്കാനാകാത്ത ഒരു ഫുട്ബോൾ അനുഭവമായി ഇന്നത്തെ എൽ ക്ലാസിക്കോ മാറുമെന്ന് ഉറപ്പാണ്.
