2025-ലെ ഫെഡറൽ തിരഞ്ഞെടുപ്പിൽ വിജയം നേടിയ ലിബറൽ പാർട്ടി നേതാവ് മാർക്ക് കാർണി രാജ്യത്തിന്റെ കുടിയേറ്റ നയത്തിൽ സമഗ്രമായ മാറ്റങ്ങൾ പ്രഖ്യാപിച്ചിട്ടുണ്ട്.സ്ഥിരതാമസക്കാരായി അനുവദിക്കുന്നവരുടെ എണ്ണം കാനഡയിലെ ജനസംഖ്യയുടെ 1% ത്തിൽ താഴെയാക്കി പരിമിതപ്പെടുത്തുമെന്ന് പുതിയ നയം വ്യക്തമാക്കുന്നു.
2025-ൽ 395,000 പേരെയും, 2026-ൽ 380,000 പേരെയും, 2027-ൽ 365,000 പേരെയും മാത്രം അനുവദിക്കുന്ന തരത്തിലുള്ള പരിഷ്കരണമാണ് നടപ്പാക്കുന്നത്. അതോടൊപ്പം തന്നെ താൽക്കാലിക താമസക്കാരുടെ എണ്ണം നിലവിലെ 7.25% ത്തിൽ നിന്നും 2027 ആകുമ്പോഴേക്കും 5% ത്തിൽ താഴെയാക്കാനും ലക്ഷ്യമിടുന്നു.
“കാനഡയുടെ വികസനവും പൗരജനതയുടെ സുരക്ഷിതത്വവും തമ്മിൽ സന്തുലിതമായ സമീപനമാണ് ഞങ്ങൾ സ്വീകരിക്കുന്നത്. പുതിയ കുടിയേറ്റ നയം ഈ രണ്ട് ലക്ഷ്യങ്ങളും നിറവേറ്റുന്നതിന് ഞങ്ങൾ പ്രതിജ്ഞാബദ്ധരാണ്.,” എന്ന് പ്രധാനമന്ത്രി മാർക്ക് കാർണി പ്രസ്താവിച്ചു.
ഈ പുതിയ നയം ഫ്രഞ്ച് സംസാരിക്കുന്ന കുടിയേറ്റക്കാർക്ക് കൂടുതൽ അവസരങ്ങൾ നൽകുന്നതോടൊപ്പം, വിദഗ്ധ ജോലിക്കാർക്ക് പ്രത്യേകിച്ച് സാങ്കേതിക, ആരോഗ്യ മേഖലകളിൽ പ്രവർത്തിക്കുന്നവർക്ക് മുൻഗണന നൽകുമെന്നും വ്യക്തമാക്കിയിട്ടുണ്ട്. നിലവിൽ കാനഡയിൽ താമസിക്കുന്ന താൽക്കാലിക കുടിയേറ്റക്കാർക്ക് സ്ഥിരതാമസത്തിനുള്ള അവസരം മെച്ചപ്പെടുത്തുമെങ്കിലും, പുതിയ വിദ്യാർത്ഥികൾക്കും തൊഴിലാളികൾക്കും കൂടുതൽ മത്സരം നേരിടേണ്ടി വരും.
