തിരുവനന്തപുരം: മലയാള സിനിമാ വ്യവസായത്തിന് ആഗോളതലത്തിൽ പുതിയ മാനങ്ങൾ നൽകിക്കൊണ്ട് 2026-ൽ വൻ റിലീസുകൾ എത്തുന്നു. മമ്മൂട്ടിയും മോഹൻലാലും ഒന്നിക്കുന്ന മെഗാ പ്രോജക്റ്റായ ‘പേട്രിയറ്റ്’ മുതൽ ബോക്സ് ഓഫീസ് വിസ്മയം തീർത്ത ‘ദൃശ്യം’ മൂന്നാം ഭാഗം വരെ നീളുന്ന വൻ നിരയാണ് പുതുവർഷത്തിൽ പ്രേക്ഷകരെ കാത്തിരിക്കുന്നത്. ഇതോടെ 2026 മലയാള സിനിമയുടെ ചരിത്രത്തിലെ ഏറ്റവും ലാഭകരമായ വർഷമായി മാറുമെന്നാണ് സിനിമാ മേഖലയിലുള്ളവരുടെ വിലയിരുത്തൽ.
സിനിമാ പ്രേമികൾ ഏറെക്കാലമായി കാത്തിരിക്കുന്ന മമ്മൂട്ടി-മോഹൻലാൽ ചിത്രം ‘പേട്രിയറ്റ്’ (Patriot) 2026 വിഷു റിലീസായി തിയേറ്ററുകളിലെത്തും. പ്രശസ്ത സംവിധായകൻ മഹേഷ് നാരായണൻ ഒരുക്കുന്ന ഈ പൊളിറ്റിക്കൽ ത്രില്ലറിൽ നയൻതാര, ഫഹദ് ഫാസിൽ, കുഞ്ചാക്കോ ബോബൻ എന്നിവരും പ്രധാന വേഷങ്ങളിലെത്തുന്നുണ്ട്. നീണ്ട ഇടവേളയ്ക്ക് ശേഷം സൂപ്പർ താരങ്ങൾ ഒന്നിക്കുന്നു എന്നത് ചിത്രത്തെ ഇതിനോടകം തന്നെ ദേശീയ ശ്രദ്ധയിൽ എത്തിച്ചിട്ടുണ്ട്.
മലയാള സിനിമയുടെ വിപണി മൂല്യം വർദ്ധിപ്പിച്ച ‘ദൃശ്യം’ പരമ്പരയിലെ മൂന്നാം ഭാഗം ഏപ്രിലിൽ റിലീസ് ചെയ്തേക്കും. ജീത്തു ജോസഫ് സംവിധാനം ചെയ്യുന്ന ഈ ചിത്രത്തിന്റെ ഷൂട്ടിംഗ് 2025 ഡിസംബർ 2ന് പൂർത്തിയായിരുന്നു . ജോർജ്കുട്ടിയും കുടുംബവും നേരിടുന്ന പുതിയ നിയമപ്രശ്നങ്ങൾ എന്താണെന്നറിയാനുള്ള ആകാംക്ഷയിലാണ് ആരാധകർ.
നിസാം ബഷീർ സംവിധാനം ചെയ്യുന്ന പൃഥ്വിരാജ് ചിത്രം ‘ഐ, നോബഡി’ (I, Nobody) ഒരു സോഷ്യോ-പൊളിറ്റിക്കൽ ഹൈസ്റ്റ് മൂവിയായിട്ടാണ് അണിയറയിൽ ഒരുങ്ങുന്നത്. മമ്മൂട്ടിയുടെ ‘റോഷാക്കി’ന് ശേഷം നിസാം ഒരുക്കുന്ന ചിത്രം എന്ന നിലയിൽ ഇതിന് വലിയ പ്രാധാന്യമുണ്ട്. കൂടാതെ, ദുൽഖർ സൽമാൻ നായകനാകുന്ന ബിഗ് ബജറ്റ് ചിത്രം ‘ഐ ആം ദ ഗെയിം’ (I’m the Game) 2026-ലെ മലയാളത്തിലെ മറ്റൊരു സുപ്രധാന റിലീസായിരിക്കും.
ആരാധകരുടെ പ്രിയപ്പെട്ട ഷാജി പാപ്പനും സംഘവും ‘ആട് 3’ലൂടെ 2026-ൽ മടങ്ങിയെത്തും. മിഥുൻ മാനുവൽ തോമസ് സംവിധാനം ചെയ്യുന്ന ചിത്രം ത്രീഡിയിൽ ആയിരിക്കും പുറത്തിറങ്ങുക. ഫഹദ് ഫാസിൽ, ടൊവിനോ തോമസ്, ബേസിൽ ജോസഫ് എന്നിവരുടെ ബിഗ് ബജറ്റ് ചിത്രങ്ങളും വിവിധ ഘട്ടങ്ങളിലായി അണിയറയിൽ ഒരുങ്ങുന്നുണ്ട്. ആഗോള വിപണി ലക്ഷ്യമിട്ടുള്ള ഈ ചിത്രങ്ങൾ മലയാള സിനിമയുടെ പെരുമ വീണ്ടും വർദ്ധിപ്പിക്കുമെന്നാണ് സൂചന.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Years of waiting are over, Lalettan and Mammootty are coming together again; 2026 movie calendar aims for records
