എഡ്മിന്റൻ: എഡ്മിന്റണിലുള്ള നാനാക്സർ സിഖ് ഗുരുദ്വാരയിൽ വെളളിയാഴ്ച പുലർച്ചെയുണ്ടായ കത്തിക്കുത്തിൽ രണ്ട് പേർക്ക് പരിക്കേറ്റു. സംഭവത്തിൽ ഒരാളെ പോലീസ് സംഭവസ്ഥലത്തു വെച്ച് തന്നെ അറസ്റ്റ് ചെയ്തു. വെള്ളിയാഴ്ച പുലർച്ചെ 5:08-നാണ് 14 സ്ട്രീറ്റിലെയും ഹോഴ്സ്ഹിൽ റോഡിലെയും ഗുരുദ്വാരയിൽ നിന്ന് പോലീസിന് സന്ദേശം ലഭിക്കുന്നത്. പരിക്കേറ്റ രണ്ട് പുരുഷന്മാരെയും ആശുപത്രിയിൽ പ്രവേശിപ്പിച്ചു. ഇവരുടെ പരിക്ക് ഗുരുതരമല്ലെന്ന് എഡ്മിന്റൻ പോലീസ് സർവീസ് (EPS) സ്ഥിരീകരിച്ചു.
സമീപകാലത്തായി സിഖ് ആരാധനാലയങ്ങൾക്ക് നേരെ ഉയരുന്ന ഭീഷണികളുടെയും ആക്രമണങ്ങളുടെയും തുടർച്ചയാണിതെന്ന ആശങ്ക ഉയർന്നിട്ടുണ്ട്. കഴിഞ്ഞ വാരാന്ത്യത്തിൽ കാൽഗറിയിലെ സിഖ് ആരാധനാലയത്തിലേക്ക് ഭീഷണി ഫോൺ കോളുകൾ വന്നിരുന്നതായും ഇതിനെ കാൽഗറി മേയർ ജെറോമി ഫാർകസ് ശക്തമായി അപലപിച്ചിരുന്നതായും റിപ്പോർട്ടുകളുണ്ട്.
READ MORE: ടൊറന്റോയിൽ പാർക്കിൽ കളിച്ചുകൊണ്ടിരുന്ന കുട്ടിക്ക് ലൈംഗികാതിക്രമം; പ്രതിക്കായി തിരച്ചിൽ ഊർജ്ജിതമാക്കി പോലീസ്
ആക്രമണത്തെ എഡ്മിന്റൻ-സ്ട്രാത്ത്കോണ എം.പി ഹെതർ മക്ഫെർസൺ സോഷ്യൽ മീഡിയയിലൂടെ അപലപിച്ചു. “ആരാധനാലയങ്ങൾ സുരക്ഷിതത്വത്തിന്റെയും സമാധാനത്തിന്റെയും ഇടങ്ങളാകണം. സ്വന്തം മതം പിന്തുടരുന്നതിന്റെ പേരിൽ ആരും ആക്രമിക്കപ്പെടരുത്. വർദ്ധിച്ചുവരുന്ന സിഖ് വിരുദ്ധ വിദ്വേഷങ്ങളെ ഗൗരവമായി കാണണം,” എന്ന് അവർ കുറിച്ചു. സംഭവത്തിൽ സമഗ്രമായ അന്വേഷണവും ശക്തമായ നടപടികളും വേണമെന്നും അവർ ആവശ്യപ്പെട്ടു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
