ഓട്ടവ: തനിക്ക് ഇന്ത്യ എന്ന രാജ്യത്തോടല്ല, മറിച്ച് തന്റെ വീടിനോടും അവിടെയുള്ള ആറ് ആളുകളോടും മാത്രമാണ് ‘ഹോംസിക്ക്നെസ്’ ഉള്ളതെന്നാണ് മാന്യ വീഡിയോയിലൂടെ വ്യക്തമാക്കുന്നത്. ഞാൻ ഇന്ത്യയെ മിസ് ചെയ്യുന്നില്ല എന്ന് പറയുമ്പോൾ കേൾക്കാൻ അത് വിചിത്രമായി തോന്നാമെങ്കിലും അതിനുപിന്നിലെ കാരണം വ്യക്തമാക്കാമെന്ന് പറഞ്ഞുകൊണ്ടാണ് മാന്യ തന്റെ റീൽസ് വീഡിയോ ആരംഭിക്കുന്നത്.
കാനഡയിലും അമ്മ ഉണ്ടാക്കുന്നതുപോലെ പറാത്തകൾ ഉണ്ടാക്കാൻ സാധിക്കുമെന്നും മികച്ച ഇന്ത്യൻ ഭക്ഷണശാലകളും ദീപാവലി ആഘോഷങ്ങളുമെല്ലാം ഇവിടെ ലഭ്യമാണെന്നും മാന്യ പറയുന്നു. എന്നാൽ ഈ അനുഭവങ്ങളൊന്നും സ്വന്തം വീടിന്റെ അനുഭവം നൽകുന്നില്ല. 150 കോടി ജനങ്ങളുള്ള ഒരു വലിയ രാജ്യത്തെയല്ല ഞാൻ മിസ് ചെയ്യുന്നത്, മറിച്ച് എന്റെ കുടുംബത്തിലെ ആറ് മനുഷ്യരെയും ഒരു പ്രത്യേക മുറിയെയുമാണ്. രാവിലെ 11 മണിക്ക് അമ്മ അടുക്കളയിൽ പറാത്ത ഉണ്ടാക്കുമ്പോൾ അത് കാത്തിരിക്കുന്നതും, പത്രം വായിക്കുമ്പോൾ അച്ഛൻ പേജ് മറിക്കുന്ന ശബ്ദവും, വീട്ടിലെ ഒരു ഊഞ്ഞാലിനായി എല്ലാവരും വഴക്കിടുന്നതുമൊക്കെയാണ് തന്റെ യഥാർത്ഥ ഓർമ്മകളെന്ന് അവർ വ്യക്തമാക്കുന്നു.
നൊസ്റ്റാൾജിയയെക്കുറിച്ച് സതാംപ്റ്റൺ സർവകലാശാല 20 വർഷമായി നടത്തുന്ന ഗവേഷണങ്ങളെക്കുറിച്ചും മാന്യ വീഡിയോയിൽ പരാമർശിക്കുന്നുണ്ട്. ആളുകൾ തങ്ങളുടെ പ്രിയപ്പെട്ട ഓർമ്മകളെക്കുറിച്ച് എഴുതുമ്പോൾ അതിൽ എപ്പോഴും പ്രിയപ്പെട്ട മനുഷ്യർ ഉണ്ടാകുമെന്നാണ് പഠനങ്ങൾ വ്യക്തമാക്കുന്നത്. ആളുകൾ ഒരു സ്ഥലത്തെയല്ല, മറിച്ച് ആ സ്ഥലത്ത് പ്രിയപ്പെട്ടവർക്കൊപ്പം ചിലവഴിച്ച നിമിഷങ്ങളെയാണ് മിസ് ചെയ്യുന്നത്. ഈ തിരിച്ചറിവ് തന്റെ അടുത്ത നാട്ടിലെത്തലിൽ വലിയ മാറ്റം വരുത്തുമെന്നും, ഇനി നാട്ടിൽ വരുമ്പോൾ ഷോപ്പിംഗിനോ എല്ലാവരുടെയും വീടുകൾ സന്ദർശിക്കാനോ സമയം കളയാതെ അമ്മയുടെ അടുക്കളയിൽ എത്ര സമയം ഇരിക്കാൻ സാധിക്കുമോ അത്രയും സമയം അവിടെയിരിക്കാനാണ് ആഗ്രഹിക്കുന്നതെന്നും മാന്യ കൂട്ടിച്ചേർക്കുന്നു. ഇത് തികച്ചും തന്റെ വ്യക്തിപരമായ അനുഭവമാണെന്നും ഇന്ത്യയെയും കാനഡയെയും തമ്മിൽ താരതമ്യം ചെയ്യുകയല്ല തന്റെ ലക്ഷ്യമെന്നും യുവതി വ്യക്തമാക്കുന്നുണ്ട്.
ALSO READ: ഒന്റാരിയോ നിവാസികളെ അറിഞ്ഞോ? ഈ മാസം രണ്ട് CRA ആനുകൂല്യങ്ങൾ അക്കൗണ്ടിലെത്തും, തീയതികൾ അറിയാം
വീഡിയോയ്ക്ക് താഴെ നിരവധിയാളുകളാണ് പ്രതികരണങ്ങളുമായി എത്തിയത്. വിദേശത്ത് എത്ര സൗകര്യങ്ങളുണ്ടെങ്കിലും മാതാപിതാക്കളുടെ കൂടെയുള്ള നിമിഷങ്ങളാണ് ഏറ്റവും വിലപ്പെട്ടതെന്നും നാട്ടിലേക്ക് വരുന്നത് തന്നെ കുടുംബത്തിനും വീടിനും വേണ്ടി മാത്രമാണെന്നും ചിലർ കുറിച്ചു. എന്നാൽ, കുടുംബത്തെയാണ് ഏറ്റവും കൂടുതൽ മിസ് ചെയ്യുന്നത് എങ്കിലും ഇന്ത്യയിലെ ആഘോഷങ്ങളുടെയും നാട്ടിൻപുറങ്ങളുടെയും ആ ഒരു ‘വൈബ്’ വിദേശത്ത് എവിടെയും ലഭിക്കില്ലെന്നും ദീപാവലിയൊക്കെ ആഘോഷിക്കാമെങ്കിലും ഇന്ത്യയിലെ ആ അന്തരീക്ഷം മിസ് ചെയ്യുന്നുണ്ടെന്നും അഭിപ്രായപ്പെടുന്നവരുമുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
