വിന്റർലൂഡ് രണ്ടാം വാരത്തിലേക്ക്:ഒട്ടാവയിൽ ഈ വാരാന്ത്യത്തിൽ ആഘോഷങ്ങളുടെ പെരുമഴ

ഒട്ടാവ : ഒട്ടാവയിലും ഗാറ്റിനോയിലുമായി നടക്കുന്ന വിന്റർലൂഡ് ആഘോഷങ്ങൾ രണ്ടാം വാരത്തിലേക്ക് കടന്നു. കോൺഫെഡറേഷൻ പാർക്ക്, ജാക്വസ്-കാർട്ടിയർ പാർക്ക്, സ്പാർക്ക്സ് സ്ട്രീറ്റ് എന്നിവിടങ്ങളിലായി ഐസ് ശില്പങ്ങൾ, സ്നോ സ്ലൈഡുകൾ, തത്സമയ സംഗീതം എന്നിവയുണ്ടാകും. ഫെബ്രുവരി 16 വരെ നീണ്ടുനിൽക്കുന്ന ആഘോഷങ്ങളുടെ ഭാഗമായി മ്യൂസിയം ഓഫ് നേച്ചർ, മ്യൂസിയം ഓഫ് ഹിസ്റ്ററി എന്നിവിടങ്ങളിലും പ്രത്യേക പരിപാടികൾ സംഘടിപ്പിച്ചിട്ടുണ്ട്.

റൈഡോ കനാൽ സ്കേറ്റ്‌വേയുടെ 7.8 കിലോമീറ്റർ ദൈർഘ്യമുള്ള മുഴുവൻ ഭാഗവും ഈ വാരാന്ത്യത്തിൽ സ്കേറ്റിംഗിനായി തുറന്നു നൽകും. റൈഡോ മുതൽ ഡൗസ് തടാകം വരെയുള്ള ഭാഗവും കാൾട്ടൺ സർവകലാശാലാ ലൈബ്രറി വരെയുള്ള പാതയുമാണ് സജ്ജമായിരിക്കുന്നത്. കൂടാതെ ശനിയാഴ്ച ഉച്ചയ്ക്ക് 12:30 മുതൽ വൈകുന്നേരം 4 മണി വരെ റൈഡോ ഹാളിൽ ശീതകാല ആഘോഷങ്ങളും പൊതുജനങ്ങൾക്കായി ഒരുക്കിയിട്ടുണ്ട്.

ബൈവാർഡ് മാർക്കറ്റിൽ ഫ്രീസ്റ്റൈൽ സ്നോമൊബൈൽ പ്രകടനങ്ങൾ ഉൾപ്പെടുന്ന ‘ബാർബെഗാസി’ അരങ്ങേറും. കായികരംഗത്ത്, വെള്ളിയാഴ്ച രാത്രി ടിഡി പ്ലേസ് അരീനയിൽ കാൾട്ടൺ റാവൻസും ഒട്ടാവ സർവകലാശാലാ ടീമും തമ്മിലുള്ള വാർഷിക ബാസ്കറ്റ്ബോൾ മത്സരങ്ങൾ നടക്കും. കനേഡിയൻ ടയർ സെന്ററിൽ ഒട്ടാവ ബ്ലാക്ക് ബിയേഴ്സും കാൽഗറി റഫ്‌നെക്സും തമ്മിലുള്ള ലാക്രോസ് മത്സരവും ശനിയാഴ്ച ക്രമീകരിച്ചിട്ടുണ്ട്.

നാഷണൽ ആർട്‌സ് സെന്ററിൽ ഫീനിക്സ് പാഗ്ലിയാച്ചി, ബൂബെ എന്നിവരുടെ കലാപ്രകടനങ്ങൾ നടക്കും. സാംസ്കാരിക വൈവിധ്യം വിളിച്ചോതുന്ന ഒട്ടാവ ബ്ലാക്ക് ക്രിയേറ്റീവ്സ് ഹബ് ഷോക്കേസ്, ചൈനീസ് പുതുവർഷത്തോടനുബന്ധിച്ചുള്ള പീക്കിംഗ് ഓപ്പറ ഗാല എന്നിവയും വിവിധ തിയേറ്ററുകളിലായി അരങ്ങേറും. അബർഡീൻ പവലിയനിൽ ശനിയാഴ്ച വിന്റർ റോളർ ഡിസ്കോയും ഞായറാഴ്ച ലാൻസ്‌ഡൗൺ ഫാർമേഴ്‌സ് മാർക്കറ്റും പ്രവർത്തിക്കും.

പ്രാദേശിക ആഘോഷങ്ങളുടെ ഭാഗമായി മാനോട്ടിക്കിൽ ‘ഷിവർഫെസ്റ്റ്’, ഗ്രീലിയിൽ ‘ശീതകാല കാർണിവൽ’ എന്നിവ സംഘടിപ്പിച്ചിട്ടുണ്ട്. കാനഡയിലെ ഏറ്റവും പഴയ ക്രോസ്-കൺട്രി സ്കീയിംഗ് ഇവന്റായ കനേഡിയൻ സ്കീ മാരത്തണും ഔട്ടാവായ് മേഖലയിൽ ഈ വാരാന്ത്യത്തിൽ നടക്കും. നഗരസഭയുടെ കീഴിലുള്ള നാല് പ്രധാന ഐസ് റിങ്കുകളും സ്ലെഡ്ഡിംഗ് ഹില്ലുകളും സന്ദർശകർക്കായി തുറന്നിരിക്കും.

പാർലമെന്റ് മന്ദിരങ്ങൾ സന്ദർശിക്കാനുള്ള അവസരത്തിന് പുറമെ, സെന്റർ ബ്ലോക്കിന്റെ 360-ഡിഗ്രി മൾട്ടിമീഡിയ ഷോയും സ്പാർക്ക്സ് സ്ട്രീറ്റിൽ ലഭ്യമാണ്. സമീപ നഗരങ്ങളായ കിംഗ്സ്റ്റണിൽ റീൽഔട്ട് ക്വീർ ഫിലിം ഫെസ്റ്റിവലും കോൺവാളിൽ ജൂറി ആർട്ട് എക്സിബിഷനും ബ്രോക്‌വില്ലിൽ മാക് ആൻഡ് ചീസ് ഫെസ്റ്റും ഈ ദിവസങ്ങളിൽ നടക്കുമെന്ന് ബന്ധപ്പെട്ട അധികൃതർ അറിയിച്ചു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Winterlude enters second week: A flurry of festivities this weekend in Ottawa