റെജീന: സസ്കാച്ചവാൻ പ്രവിശ്യയിലെ ഹോസ്പിറ്റാലിറ്റി മേഖല നേരിടുന്ന രൂക്ഷമായ തൊഴിൽക്ഷാമം പരിഹരിക്കാൻ പുതിയ നീക്കവുമായി പ്രമുഖ ടൂറിസം സംഘടനയായ ‘ഹോസ്പിറ്റാലിറ്റി സാസ്കാച്വൻ’. റെസ്റ്റോറന്റുകളിലും ബാറുകളിലും മദ്യം വിളമ്പുന്നതിനും ടേബിളുകൾ വൃത്തിയാക്കുന്നതിനും 14 വയസ്സും അതിനുമുകളിലും പ്രായമുള്ള കൗമാരക്കാരെ അനുവദിക്കണമെന്നാണ് സംഘടനയുടെ ആവശ്യം. ഇത് സംബന്ധിച്ച് സർക്കാരിൽ സമ്മർദ്ദം ചെലുത്താനായി സംഘടന ഔദ്യോഗികമായി രജിസ്റ്റർ ചെയ്തു കഴിഞ്ഞു.
നിലവിലെ നിയമമനുസരിച്ച് 19 വയസ്സിൽ താഴെയുള്ളവർക്ക് ഉപഭോക്താക്കളുടെ ടേബിളിൽ മദ്യം എത്തിക്കാനോ, ഉപയോഗിച്ച മദ്യക്കുപ്പികളും ഗ്ലാസുകളും നീക്കം ചെയ്യാനോ അനുവാദമില്ല. ഈ നിബന്ധനയിൽ ഇളവ് വരുത്തുന്നത് വഴി മേഖലയിലെ പ്രതിസന്ധിക്ക് വലിയൊരളവ് പരിഹാരമാകുമെന്നാണ് ഹോസ്പിറ്റാലിറ്റി സാസ്കാച്വൻ സിഇഒ ജിം ബെൻസ് വ്യക്തമാക്കുന്നത്. ഗ്രാമീണ മേഖലകളിലെ ചെറുകിട സ്ഥാപനങ്ങൾ പലപ്പോഴും മതിയായ ജീവനക്കാരില്ലാതെ വലയുകയാണെന്നും, പലയിടങ്ങളിലും നിയമപരമായ പ്രായപരിധിയുള്ള ഒരേയൊരു ജീവനക്കാരൻ മാത്രമാണ് നിലവിലുള്ളതെന്നും അദ്ദേഹം ചൂണ്ടിക്കാട്ടി.
കാനഡയിൽ അന്താരാഷ്ട്ര വിദ്യാർത്ഥികൾക്ക് ഏർപ്പെടുത്തിയ നിയന്ത്രണങ്ങളും ഹോട്ടൽ മാനേജ്മെന്റ് കോഴ്സുകളോടുള്ള താൽപ്പര്യക്കുറവുമാണ് നിലവിലെ പ്രതിസന്ധിക്ക് ആക്കം കൂട്ടിയത്. കാനഡയിലെ തൊഴിലില്ലായ്മ നിരക്ക് പരിശോധിക്കുമ്പോൾ യുവാക്കൾക്കിടയിലെ തൊഴിലില്ലായ്മ ദേശീയ ശരാശരിയേക്കാൾ ഇരട്ടിയാണെന്ന് സ്റ്റാറ്റിസ്റ്റിക്സ് കാനഡയുടെ റിപ്പോർട്ടുകൾ വ്യക്തമാക്കുന്നു. 2026 ഫെബ്രുവരിയിലെ കണക്കുകൾ പ്രകാരം 15 നും 24 നും ഇടയിൽ പ്രായമുള്ളവരുടെ തൊഴിലില്ലായ്മ നിരക്ക് 14.1 ശതമാനമായി ഉയർന്നിട്ടുണ്ട്. നിയമം മാറുന്നതോടെ കൂടുതൽ കൗമാരക്കാർക്ക് തൊഴിൽ മേഖലയിലേക്ക് പ്രവേശിക്കാൻ അവസരമൊരുങ്ങും.
അതേസമയം, ഈ നിർദ്ദേശം പ്രായോഗികമാകാൻ മാസങ്ങളോ വർഷങ്ങളോ എടുത്തേക്കാം. സസ്കാച്ചവാൻ ലിക്വർ ആൻഡ് ഗെയിമിംഗ് അതോറിറ്റി (SLGA), ലേബർ റിലേഷൻസ് വകുപ്പ്, നീതിന്യായ മന്ത്രാലയം എന്നിവരുടെ കർശനമായ പരിശോധനകൾക്കും നിയമനിർമ്മാണത്തിനും ശേഷമേ അന്തിമ തീരുമാനം ഉണ്ടാവുകയുള്ളൂ. വിഷയത്തിൽ സർക്കാരുമായി കൂടുതൽ ചർച്ചകൾ നടത്താൻ തങ്ങൾ തയ്യാറാണെന്ന് ജിം ബെൻസ് അറിയിച്ചു. തൊഴിൽ മേഖലയിലെ ഈ മാറ്റം കൗമാരക്കാർക്ക് വരുമാന മാർഗമാകുന്നതിനൊപ്പം ടൂറിസം മേഖലയ്ക്ക് വലിയ ഉണർവ് നൽകുമെന്നാണ് പ്രതീക്ഷിക്കപ്പെടുന്നത്.
Will 14-year-olds now have to serve alcohol? Saskatchewan prepares for law change
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
