വാഷിംഗ്ടൺ: ചന്ദ്രനിൽ ആദ്യമായി മനുഷ്യനെ ഇറക്കാനുള്ള ബഹിരാകാശ മത്സരത്തിൽ അമേരിക്കയും ചൈനയും തമ്മിൽ കടുത്ത പോരാട്ടമാണെന്ന് വ്യക്തമാക്കി നാസയുടെ ആർട്ടെമിസ് II ദൗത്യസംഘം. കഴിഞ്ഞ ഏപ്രിലിൽ ചന്ദ്രനെ ചുറ്റിയുള്ള ചരിത്രപരമായ യാത്ര വിജയകരമായി പൂർത്തിയാക്കിയ ശേഷം നൽകിയ പ്രത്യേക അഭിമുഖത്തിലാണ് സംഘാംഗങ്ങൾ ഇക്കാര്യം തുറന്നുപറഞ്ഞത്. ചന്ദ്രനിൽ ഇനി ആദ്യം ആര് കാലുകുത്തുന്നു എന്നത് വെറുമൊരു റെക്കോർഡ് മാത്രമല്ലെന്നും, ആദ്യം എത്തുന്നവരായിരിക്കും ഭാവിയിൽ ബഹിരാകാശത്തെ നിയമങ്ങളും മാനദണ്ഡങ്ങളും നിശ്ചയിക്കുകയെന്നും ദൗത്യത്തിൽ പങ്കാളിയായ ബഹിരാകാശയാത്രികർ ചൂണ്ടിക്കാട്ടി.
അമേരിക്കയുടെ റീഡ് വൈസ്മാൻ, വിക്ടർ ഗ്ലോവർ, ക്രിസ്റ്റീന കോച്ച് എന്നിവരും കാനഡക്കാരനായ ജെറമി ഹാൻസനും അടങ്ങുന്ന നാലംഗ സംഘമാണ് 10 ദിവസത്തെ യാത്രയിലൂടെ ചന്ദ്രനെ ചുറ്റി ചരിത്രം കുറിച്ചത്. കഴിഞ്ഞ 50 വർഷത്തിനിടെ മനുഷ്യൻ ചന്ദ്രനിലേക്ക് നടത്തിയ ആദ്യത്തെ വലിയ ചുവടുവെപ്പായിരുന്നു ഇത്. നിലവിൽ 2028-ഓടെ ചന്ദ്രനിൽ മനുഷ്യനെ ഇറക്കാനാണ് നാസ പദ്ധതിയിടുന്നത്. എന്നാൽ, 2030-ഓടെ തങ്ങളുടെ ആളുകളെ ചന്ദ്രനിലെത്തിക്കാൻ ചൈനയും നീക്കങ്ങൾ നടത്തുന്നുണ്ട്. കാനഡ ഉൾപ്പെടെ അറുപതിലധികം രാജ്യങ്ങളുടെ കൂട്ടായ്മയായ ‘ആർട്ടെമിസ് ഉടമ്പടി’യിലൂടെ എല്ലാവരെയും ഒന്നിച്ച് നിർത്തി മുന്നോട്ട് പോകാനാണ് തങ്ങളുടെ ശ്രമമെന്ന് നാസ സംഘം പറഞ്ഞു.
അതേസമയം, കാനഡയും അമേരിക്കയും തമ്മിലുള്ള ബഹിരാകാശ സഹകരണം കൂടുതൽ ശക്തമായി മുന്നോട്ട് പോകുമെന്ന് കനേഡിയൻ പ്രതിനിധിയായ ജെറമി ഹാൻസൻ വ്യക്തമാക്കി. നാസയുടെ പുതിയ ചന്ദ്രപഥ നിലയവുമായി ബന്ധപ്പെട്ട ചില സാങ്കേതിക തീരുമാനങ്ങൾ കഴിഞ്ഞ മാർച്ചിൽ മാറ്റിയതോടെ ഇരുരാജ്യങ്ങളും തമ്മിലുള്ള ബന്ധത്തിൽ നേരിയ ആശങ്കകൾ ഉയർന്നിരുന്നു. എന്നാൽ, കാനഡയുടെ അത്യാധുനിക സാങ്കേതിക മികവ് ഈ ദൗത്യത്തിന് ഒഴിച്ചുകൂടാനാവാത്തതാണെന്നും തങ്ങൾ ഒരുമിച്ചായിരിക്കും ഈ യാത്ര പൂർത്തിയാക്കുകയെന്നും ദൗത്യ തലവൻ റീഡ് വൈസ്മാൻ ഉറപ്പിച്ചു പറഞ്ഞു. ചന്ദ്രനിൽ സ്ഥിരമായി മനുഷ്യന് താമസിക്കാനുള്ള വലിയൊരു പദ്ധതിക്കാണ് തങ്ങൾ തുടക്കമിടുന്നതെന്നും അദ്ദേഹം കൂട്ടിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Whoever lands on the moon first will set the rules'; America and China in fierce competition
