വാങ്കൂവർ: ക്രിസ്മസ്-പുതുവത്സര ആഘോഷങ്ങൾ അവസാനിക്കുമ്പോൾ വീടുകളിൽ കുമിഞ്ഞുകൂടുന്ന പാക്കിംഗ് കവറുകളും ബോക്സുകളും ശാസ്ത്രീയമായി പുനരുപയോഗിക്കാൻ (Recycle) പൊതുജനങ്ങൾക്ക് നിർദ്ദേശം. സമ്മാനങ്ങൾ പൊതിയുന്ന കടലാസുകൾ മുതൽ ഭക്ഷണാവശിഷ്ടങ്ങൾ വരെ കൃത്യമായി തരംതിരിച്ചാൽ മാലിന്യപ്രശ്നം ഒഴിവാക്കാമെന്ന് റീസൈക്കിൾ ബി.സി. പ്രതിനിധി ആൻ ഗോൾഡിംഗ് വ്യക്തമാക്കി.
ആഘോഷവേളകളിൽ വൻതോതിൽ പാക്കേജിംഗ് മാലിന്യങ്ങളാണ് ഉണ്ടാകുന്നത്. ഇവ ഭൂമിയിൽ കുന്നുകൂടുന്നത് ഒഴിവാക്കാൻ പരമാവധി വസ്തുക്കൾ പുനരുപയോഗ ഘട്ടത്തിലേക്ക് മാറ്റണമെന്നാണ് അധികൃതർ നിർദ്ദേശിക്കുന്നത്. സമ്മാനങ്ങൾ പൊതിയുന്ന പേപ്പറുകൾ, പേപ്പർ ബാഗുകൾ എന്നിവ പുനരുപയോഗിക്കാൻ സാധിക്കുന്നവയാണ്. എന്നാൽ പ്ലാസ്റ്റിക് കോട്ടിംഗ് ഉള്ളതോ ഫോയിൽ പേപ്പറോ ഇതിനായി ഉപയോഗിക്കരുത്. പേപ്പറുകളിൽ ഒട്ടിച്ചിട്ടുള്ള റിബണുകൾ, ബോകൾ തുടങ്ങിയ അലങ്കാര വസ്തുക്കൾ മാറ്റിയതിന് ശേഷം മാത്രമേ ഇവ റീസൈക്ലിംഗ് ബിന്നുകളിലേക്ക് ഇടാവൂ എന്നും ആൻ ഗോൾഡിംഗ് ഓർമ്മിപ്പിച്ചു.
സമ്മാനങ്ങൾക്കൊപ്പം ലഭിക്കുന്ന ആശംസ കാർഡുകളും പുനരുപയോഗിക്കാവുന്നതാണ്. എന്നാൽ സംഗീതം കേൾക്കുന്ന തരം കാർഡുകൾ ആണെങ്കിൽ അതിനുള്ളിലെ ബാറ്ററി നീക്കം ചെയ്യാൻ പ്രത്യേകം ശ്രദ്ധിക്കണം. കളിപ്പാട്ടങ്ങൾ വരുന്ന ബോക്സുകളിലെ പ്ലാസ്റ്റിക് കവറുകൾ, ടേപ്പ് ഡിസ്പെൻസറുകൾ എന്നിവ ബ്ലൂ ബിന്നുകളിൽ നിക്ഷേപിക്കാവുന്നതാണ്. ഭക്ഷണം പാകം ചെയ്യുന്നതിനും വിളമ്പുന്നതിനുമായി ഉപയോഗിക്കുന്ന അലുമിനിയം ടിന്നുകൾ, പാത്രങ്ങൾ, മെറ്റൽ കുക്കി ടിന്നുകൾ, പ്ലാസ്റ്റിക് കണ്ടെയ്നറുകൾ എന്നിവയും റീസൈക്ലിംഗ് പരിധിയിൽ വരും. എന്നാൽ ഇവയിൽ ഭക്ഷണാവശിഷ്ടങ്ങൾ ഇല്ലെന്ന് ഉറപ്പുവരുത്താൻ ഒന്ന് കഴുകിയതിന് ശേഷം മാത്രം മാറ്റിവെക്കണം.
ചിപ്സ് കവറുകൾ, ബബിൾ റാപ്പുകൾ തുടങ്ങിയവ നേരിട്ട് ശേഖരിക്കുന്നതിന് പകരം പ്രത്യേക ഡിപ്പോകളിൽ എത്തിക്കേണ്ടതുണ്ട്. മാലിന്യങ്ങൾ തരംതിരിക്കാൻ വീടുകളിൽ തന്നെ ചെറിയ സജ്ജീകരണങ്ങൾ ഒരുക്കാവുന്നതാണെന്ന് ആൻ ഗോൾഡിംഗ് പറഞ്ഞു. ഓരോ വിഭാഗത്തിലുള്ള മാലിന്യങ്ങൾക്കും പ്രത്യേക ബാഗുകളോ ബോക്സുകളോ മാറ്റിവെക്കുന്നത് ജോലി എളുപ്പമാക്കും. ഏതെല്ലാം വസ്തുക്കൾ റീസൈക്കിൾ ചെയ്യാമെന്നതിനെക്കുറിച്ചുള്ള കൂടുതൽ വിവരങ്ങൾ ‘റീസൈക്കിൾ ബി.സി’യുടെ വെബ്സൈറ്റിൽ ലഭ്യമാണ്.
what-to-do-with-all-that-holiday-waste
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
