വിജയ് മല്യ വീണ്ടും ശ്രദ്ധാകേന്ദ്രത്തിലേക്ക്. കിംഗ്ഫിഷർ എയർലൈൻസിന്റെ മുൻ ഉടമയും ഒളിവിൽ കഴിയുന്ന വ്യവസായിയുമായ വിജയ് മല്യ ഒരു പതിറ്റാണ്ടിനുശേഷം മൗനം വെടിഞ്ഞു. ഇന്ത്യയിലെ മോട്ടിവേഷണൽ സ്പീക്കർമാരിലൊരാളായ രാജ് ഷമാനി കഴിഞ്ഞ ദിവസം പുറത്ത് വിട്ട ഒരു പോഡ്കാസ്റ്റിലൂടെയാണ് മല്യ വീണ്ടും ജനപ്രിയമായത്. ഈ അഭിമുഖം യൂട്യൂബിൽ ചരിത്രം കുറിച്ച് മുന്നേറുകയാണ്. പുറത്തിറങ്ങി നാല് ദിവസത്തിനുള്ളിൽ 21 ദശലക്ഷം ആളുകൾ കണ്ട പോഡ്കാസ്റ്റ് വൻ വിജയമായി മാറിയിരിക്കുകയാണ്.
തന്റെ “യഥാർത്ഥ” കഥ കേൾക്കാൻ ആളുകൾ താൽപ്പര്യം കാണിച്ചതിൽ ഏറെ സന്തോഷമുണ്ടെന്ന് മല്യ എക്സിൽ കുറിച്ചു. തനിക്കെതിരായ ആരോപണങ്ങൾ, ഇന്ത്യയിലേക്കുള്ള മടങ്ങി വരവ് എന്നിവയെക്കുറിച്ചെല്ലാം നാല് മണിക്കൂറിലധികം ദൈർഘ്യമുള്ള ഈ അഭിമുഖത്തിൽ മല്യ വിശദീകരിക്കുന്നുണ്ട്.
തനിക്കെതിരെയുള്ള “ചോർ” (കള്ളൻ) എന്ന വിളിയിൽ മല്യ അസന്തുഷ്ടി രേഖപ്പെടുത്തി. 2016-ൽ താൻ ഇന്ത്യ വിട്ടത് ഒളിച്ചോടിയതല്ലെന്നും, മുൻകൂട്ടി നിശ്ചയിച്ച സന്ദർശനത്തിനു വേണ്ടിയായിരുന്നു എന്നും അദ്ദേഹം പറഞ്ഞു. പിന്നീട് തിരിച്ചെത്താൻ കഴിയാത്ത സാഹചര്യങ്ങൾ ഉണ്ടായെന്നും, ന്യായമായ വിചാരണ ലഭിക്കുമെങ്കിൽ ഇന്ത്യയിലേക്ക് മടങ്ങുന്നതിനെക്കുറിച്ച് ഗൗരവമായി ആലോചിക്കുമെന്നും മല്യ വ്യക്തമാക്കി.
നിലവിൽ 2016 മുതൽ യുകെയിലാണ് വിജയ് മല്യ താമസിക്കുന്നത്. കിംഗ്ഫിഷർ എയർലൈൻസിന്റെ തകർച്ചയെക്കുറിച്ചും ബാങ്കുകളുമായുള്ള വായ്പാ പ്രശ്നങ്ങളെക്കുറിച്ചും മല്യ പോഡ്കാസ്റ്റിൽ സംസാരിച്ചു. 2012-നും 2015-നും ഇടയിൽ ബാങ്കുകൾക്ക് നാല് വ്യത്യസ്ത സെറ്റിൽമെന്റ് ഓഫറുകൾ നൽകിയിരുന്നുവെങ്കിലും അവയൊന്നും സ്വീകരിക്കപ്പെട്ടില്ലെന്ന് അദ്ദേഹം പറഞ്ഞു.
തനിക്ക് പണം തിരികെ നൽകാൻ താൽപ്പര്യമില്ലെന്ന് ഒരിക്കലും പറഞ്ഞിട്ടില്ലെന്നും, എപ്പോഴും ഒത്തുതീർപ്പ് മാത്രമായിരുന്നു തന്റെ ലക്ഷ്യമെന്നും മല്യ കൂട്ടിച്ചേർത്തു. ഏകദേശം 6,200 കോടി രൂപ തിരിച്ചടച്ചിട്ടും, ബാങ്കുകൾ ഇതിനകം 14,000 കോടി രൂപ തിരിച്ചുപിടിച്ചതായി മല്യയുടെ അഭിഭാഷകൻ അവകാശപ്പെട്ടിരുന്നു.
വഞ്ചന, കള്ളപ്പണം വെളുപ്പിക്കൽ തുടങ്ങിയ കുറ്റങ്ങളാണ് വിജയ് മല്യക്കെതിരെ ചുമത്തിയിരിക്കുന്നത്. കിംഗ്ഫിഷർ എയർലൈൻസ്, യുണൈറ്റഡ് ബ്രൂവറീസ് (ഹോൾഡിംഗ്സ്) ലിമിറ്റഡ് തുടങ്ങിയ അദ്ദേഹത്തിന്റെ കമ്പനികളും നിയമലംഘനങ്ങളുടെ പേരിൽ അന്വേഷണം നേരിടുന്നുണ്ട്. ഈ പോഡ്കാസ്റ്റ് അഭിമുഖത്തിലൂടെ ഒരു ദശാബ്ദത്തിന് ശേഷം വിജയ് മല്യ വീണ്ടും പൊതുശ്രദ്ധയിലേക്ക് എത്തുകയാണ്.
